جىلىتۋ ماۋسىمىنا بارلىق جۇمىستار كەستە بويىنشا جۇرگىزىلۋدە، دەپ حابارلايدى Almaty-akshamy.kz
الماتى قالاسىنىڭ اكىمى ەربولات دوسايەۆ الداعى جىلىتۋ ماۋسىمىنا دايىندىق بويىنشا شتابتىڭ كەزەكتى كەڭەسىن وتكىزدى.
جوندەۋ جانە دايىندىق جۇمىستارىنىڭ ارالىق قورىتىندىلارى تۋرالى ەنەرگەتيكا جانە سۋمەن جابدىقتاۋ باسقارماسىنىڭ، سونداي-اق «الماتى جىلۋ جەلىلەرى» ج ش س، «الماتىتەپلوكوممۋنەنەرگو» ج ش س، «الماتى سۋ» مكك، «الماتى ەلەكتر ستانسيالارى» اق، «الاتاۋ جارىق كومپانياسى» اق، «قازترانسگاززايماق» اق جانە ت. ب. باسشىلارى باياندادى.
قالا باسشىسى الماتىنىڭ جىلىتۋ ماۋسىمىنا دايىندىعى ەرەكشە باقىلاۋدا ەكەنىن، كوممۋنالدىق كاسىپورىندار بەكىتىلگەن كەستەگە سايكەس بارلىق دايىندىق شارالارىن اياقتاۋى قاجەت ەكەنىن اتاپ ءوتتى.
ەنەرگەتيكتەردىڭ اقپاراتى بويىنشا، قالالىق جىلۋ ەنەرگەتيكالىق كەشەننىڭ جىلۋ بەرۋ كەزەڭىنە دايىندىعى جوسپار بويىنشا جۇرۋدە جانە ول 75،6% -دى قۇرايدى. بۇل رەتتە گاز جەلىلەرىنىڭ دايىندىعى 76،7%، سۋمەن جابدىقتاۋ – 80%، ەلەكتر جەلىلەرى – 72%.
قالانىڭ قىسقى ماۋسىمعا 100% دايىندىعى 2023 جىلدىڭ 1 قازانىنا دەيىن قامتاماسىز ەتىلەدى.
وسى جىلدىڭ جىلۋارالىق كەزەڭىندە الماتىدا 17،7 كم جىلۋمەن جابدىقتاۋ، 120 كم ەلەكترمەن جابدىقتاۋ، 43 كم سۋمەن جابدىقتاۋ، 29 كم گازبەن جابدىقتاۋ جەلىلەرى قايتا جاڭارتىلىپ، جوندەلۋدە.
قازىرگى ۋاقىتتا الماتى قالاسىنىڭ تۇتىنۋشىلارىنا ۇزدىكسىز جىلۋ بەرۋدى قامتاماسىز ەتۋ ءۇشىن «الماتىجىلۋكوممۋنەنەرگو» ج ش س 84 قازاندىعىن جوندەۋ جۇمىستارى جۇرگىزىلۋدە.
دايىندىق جۇمىستارى «الماتى ەلەكتر ستانسيالارى» اق نىساندارىندا دا جۇرگىزىلۋدە: جىلىتۋ ماۋسىمىنىڭ ويداعىداي ءوتۋى ءۇشىن ەنەرگەتيكالىق گەنەراسيالايتىن جابدىققا جوندەۋ جۇمىستارى جۇرگىزىلۋدە. جەو-2ء-نىڭ 5 قازاندىعىن جوندەۋ اياقتالدى، بۇل مەگاپوليس تۇرعىندارىن جىلىتۋ ماۋسىمىندا جىلۋمەن قامتاماسىز ەتۋگە مۇمكىندىك بەرەدى. سونىمەن قاتار، بەكىتىلگەن كەستەگە سايكەس بيىلعى جىلدىڭ قاراشا ايىنا جوسپارلانعان قوسىمشا 3 قازاندىقتى جوندەۋ جۇمىستارى قازان ايىنىڭ سوڭىنا دەيىن اياقتالاتىن بولادى.بۇل شارالار جىلىتۋ ماۋسىمىن ۋاقتىلى باستاۋعا جانە قىركۇيەك ايىنىڭ سوڭىندا اينالىمدى بۇرۋعا مۇمكىندىك بەرەدى.
كەڭەس بارىسىندا ەربولات دوسايەۆ الەۋمەتتىك نىساندار مەن تۇرعىن ۇيلەردى كۇزگى-قىسقى كەزەڭگە دايىنداۋ ماسەلەسىنە ەرەكشە نازار اۋداردى. ەنەرگەتيكتەردىڭ دەرەكتەرى بويىنشا تۇرعىن ءۇي قورىنىڭ دايىندىعى بەكىتىلگەن كەستەگە سايكەس – 59،5%، ءبىلىم بەرۋ وبەكتىلەرى – 76،2%، دەنساۋلىق ساقتاۋ – 66،4%.
كەڭەس قورىتىندىسى بويىنشا قالا اكىمى ەنەرگەتيكا باسقارماسىنا ءبىرقاتار تاپسىرمالار بەردى: جىلۋمەن جابدىقتاۋ وبەكتىلەرىندەگى دايىندىق جۇمىستارىنىڭ بارىسىن باقىلاۋعا، سونىمەن قاتار رەكونسترۋكسيالاۋ اياقتالعان سوڭ بوستاندىق اۋدانىنىڭ بۇرىننان بار 200 مىڭنان استام تۇتىنۋشىسىن، سونداي-اق پەرسپەكتيۆاداعى تۇتىنۋشىلاردىن (سالىنىپ جاتقان تۇرعىن ءۇي كەشەندەرىن) جىلۋمەن قامتاماسىز ەتەتىن يۋجنىي اۋداندىق قازاندىعىنا ەرەكشە نازار اۋداردى. سونداي-اق، قالا باسشىسى اعىمداعى جىلدىڭ 1 قىركۇيەگىنە دەيىن جول جابىندىسىن جانە باسقا دا ورىنداردى قالپىنا كەلتىرۋ بويىنشا بارلىق جۇمىستاردى اياقتاۋ تۋرالى تاپسىرما بەردى.
ايتا كەتەرلىگى، قالالىق نىسانداردى الداعى جىلىتۋ ماۋسىمىنا دايىنداۋ ماسەلەلەرى بويىنشا كەڭەستەر اي سايىن وتكىزىلەتىن بولادى.