الماتى جىلۋ جەلىلەرىنىڭ باسشىلىعىنا سوت ۇكىمى شىقتى

كاسىپكەردەن پارا العان الماتى جىلۋ جەلىلەرىنىڭ باسشىلىعىنا 2 ملرد تەڭگە ايىپپۇل سالىندى

الماتى قالاسى مەدەۋ اۋدانىنىڭ №2 سوتى پارا العاندارعا ۇكىم شىعاردى، دەپ حابارلايدى Almaty-akshamy.kz انتيكورعا سىلتەمە جاساپ.

سوگت ۇكىمىمەن «الماتى جىلۋ جەلىلەرى» ج ش س باس ديرەكتورى ك. بەيسەنبينوۆكە 560 ملن تەڭگە سوماسىندا، وسى كومپانيانىڭ باس ينجەنەرى د. قازىمبەتوۆكە 560 ملن تەڭگە سوماسىندا، «الماتى جىلۋ جەلىلەرى» كۇردەلى قۇرىلىس باسقارماسىنىڭ باستىعى س. دجينگيلبايەۆقا 560 ملن تەڭگە كولەمىندە ايىپپۇل سالىندى.

پارا بەرگەنى ءۇشىن «سپەسكوممۋنستروي» ج ش س ديرەكتورى ب.رازيمبەكوۆكە 400 ملن تەڭگە ايىپپۇل تۇرىندە جازا تاعايىندالدى.

اتالعان ادامدار مەملەكەتتىك قىزمەتتە قىزمەت اتقارۋ قۇقىعىنان ءومىر بويىنا ايىرىلدى.

سوتتالعاندار ءۇشىن ايىپپۇلدىڭ جالپى سوماسى - 2 ملرد 80 ملن تەڭگە. بۇل 350 ورىندىق مەكتەپ نەمەسە 320 ورىندىق بالاباقشا قۇرىلىسىنىڭ بيۋدجەتىنە تەڭ.

«الماتى جىلۋ جەلىلەرى» لاۋازىمدى تۇلعالارىنا الماتى قالاسىندا جىلۋ جەلىلەرىن قايتا قۇرۋ تۋرالى شارت بويىنشا ورىندالعان جۇمىس اكتىلەرىنە كەدەرگىسىز قول قويعانى جانە اقشا اۋدارعانى ءۇشىن ب. رازيمبەكوۆتەن 16 ملن تەڭگە سوماسىندا پارا الدى دەگەن ايىپ تاعىلعان ەدى.

ق ر قك 41-بابىنا سايكەس ايىپپۇل بەلگىلەنگەن مەرزىمدە تولەنبەگەن جاعدايدا جازا شاراسى باس بوستاندىعىنان ايىرۋعا اۋىستىرىلادى (سوت ۇكىمى زاڭدى كۇشىنە ەنگەن جوق).