قالامىزداعى قابىلداۋ ۇيىندە كورنەكتى جازۋشى، مادەنيەتتانۋشى مۇرات اۋەزوۆتىڭ ومىردەن وزعانىنا 40 كۇن تولۋىنا وراي اس بەرىلدى.
جيىنعا ەلىمىزدىڭ ءار وڭىرىنەن لاۋازىمدى تۇلعالار، مەملەكەت جانە قوعام قايراتكەرلەرى، زيالى قاۋىم وكىلدەرى، جازۋشىنىڭ تۋىستارى مەن ارىپتەستەرى قاتىستى، دەپ حابارلايدى Almaty-akshamy.kz
قازاق مادەنيەتى مەن ادەبيەتىنە ەڭبەگى سىڭگەن جازۋشىنىڭ قايتىس بولۋىنا قىرىق كۇن تولۋىنا وراي وتكەن قوناقاسىدا مۇرات اۋەزوۆتىڭ ادامي قاسيەتتەرى مەن شىعارماشىلىعى تۋرالى جۇرەكجاردى ەستەلىكتەر مەن قيماس سوزدەر ايتىلدى.
اتاپ ايتقاندا، جازۋشى دۋلات يسابەكوۆ، قازاقستان جازۋشىلار وداعىنىڭ ءتوراعاسى مەرەكە قۇلكەنوۆ، امانتاي قاجى حانتەمىر ۇلى، ت.ب. جازۋشىنىڭ كوزىن كورگەن، قىزمەتتەس بولعان قوعام زيالىلارى مۇرات مۇحتار ۇلىنىڭ ادەبي-رۋحاني مۇراسىمەن قاتار قايراتكەرلىگىن دە ايتىپ ءوتتى.
ەسكە الۋ جيىنى ق ر پارلامەنتى سەناتىنىڭ ءتوراعاسى ماۋلەن اشىمبايەۆتىڭ حاتىن وقۋدان باستالدى. حاتتا مۇرات اۋەزوۆتىڭ قازاقستان مادەنيەتى مەن تاريحىن ساقتاۋ مەن دامىتۋداعى وراسان زور ءرولى تۋرالى جازىلعان.
«مۇرات اۋەزوۆ قازاق مادەنيەتىنە، رۋحانياتىنا دەگدارلىقتى، دارالىق پەن دانالىقتى الىپ كەلگەن ادام. وقۋى دا، توقۋى دا، ىزدەنىسى دە ەرەكشە بولدى. ەڭ باستىسى، ەلى مەن جەرىن، ءوزىنىڭ حالقىن ءسۇيۋدىڭ جارقىن ۇلگىسىن كورسەتىپ كەتتى. حالقىن بار بولمىسىمەن ءسۇيدى. سەبەبى، ول ۇلى اكەنىڭ رۋحاني مەيىرىمىن كورگەن ادام. ءومىر باقي سول مەيىرىمدى ءوز حالقىنا جۇمسادى. «جاس تۇلپار» دەگەن اتاقتى ۇيىم بولدى. ول زاماندا مۇنداي ۇيىم قۇرۋ جۇيەگە قارسى شىعۋمەن تەڭ ەدى. سونىڭ بارلىعى كەشەگى الاشتىڭ رۋحىمەن وسكەنىنىڭ ارقاسى. بيلىككە دە، باسقاعا دا ەشقاشان مويىماعان ادام. تەك قانا ەلگە بار بولمىسىمەن، بىلىمىمەن ەڭبەك ەتتى. كەيىنگى 60-جىلدارداعى بۋىن مۇرات اۋەزوۆ، تولەن ابدىك، ت.ب. اعا بۋىننىڭ تاربيەسىن كوردىك. مۇرات مۇحتار ۇلىنىڭ سالعان سارا جولى ەشقاشان وشپەيدى. قازاق باردا ونىڭ ءىلىمى جاساي بەرەدى»، - دەدى جازۋشى قالي سارسەنباي.