الماتىنىڭ قوعامدىق كولىك پاركى گازبەن جۇرەتىن 105 جاڭا ەكولوگيالىق تازا جانە جايلى Golden Dragon اۆتوبۋستارىمەن تولىقتى. جاقىن ارادا تاعى 45 اۆتوموبيل جەتكىزىلەدى دەپ كۇتىلۋدە. اعىمداعى جىلى ەكولوگيالىق تازا كولىك ۇلەسىن 50%-عا دەيىن جەتكىزۋ جوسپارلانۋدا، دەپ حابارلايدى اlmaty-akshamy.kz.
سىيىمدىلىعى 90 ادام ەۆرو-5 ەكولوگيالىق كلاستى ەدەنى تومەن، ءۇش ەسىكتى اۆتوبۋستار كونديسيونەرمەن، بەينەباقىلاۋ كامەرالارىمەن، ايالدامالاردىڭ اۆتوماتتى داۋىستىق حابارلاندىرۋمەن، جۇرگىزۋشىنىڭ شارشاعانىن تىركەيتىن داچيكپەن، بەينەتىركەگىشپەن، ەرەكشە قاجەتتىلىكتەرى بار ادامدارعا ارنالعان پاندۋسپەن جانە باسقا دا وپسيالارمەن جابدىقتالعان.
تەحنيكالىق جابدىقتالعاننان كەيىن بۇگىن №44 باعىت بويىنشا 14 جاڭا اۆتوبۋس جولعا شىعادى. قالعان اۆتوبۋستار جاقىن كۇندەرى تەحنيكالىق دايىندىعىنا قاراي ەڭ كوپ جۇرەتىن باعىتتاردى جاڭارتۋ جانە كۇشەيتۋ ءۇشىن جولعا شىعادى.
جالپى، ءبىرىنشى جارتىجىلدىقتىڭ سوڭىنا دەيىن قوعامدىق كولىك پاركى 300 جاڭا اۆتوبۋس الاتىن بولادى. جىل ىشىندە قوسىمشا گازبەن جۇرەتىن 250 اۆتوبۋستى جەكە تاسىمالداۋشى ساتىپ الادى.
بۇگىندە قالا اكىمدىگى ەكولوگيالىق جاعدايدى جاقسارتۋعا باعىت الدى. بۇل باعىتتا ەكولوگيالىق تازا كولىك سانىن ارتتىرۋ، اۋانىڭ جاعدايىن جاقسارتۋ، حالىقتىڭ ءومىرى مەن دەنساۋلىعى ءۇشىن جايلى قورشاعان ورتانى قامتاماسىز ەتۋ، اۆتوبۋستاردىڭ جۇكتەمەسىن ازايتۋ جانە جولاۋشىلار اينالىمىن ۇلعايتۋ بويىنشا جۇمىستار جۇرگىزىلۋدە.