الماتى قولداۋدى جالعاستىرۋدا: تۇرعىن ءۇيدىڭ 20%-ى جەتىم بالالار مەن وسال ساناتتارعا بولىنەدى
2025 جىلعا ارنالعان جوسپار 7 284 ادامدى، ونىڭ ىشىندە جەتىم بالالاردى تۇرعىن ۇيمەن قامتاماسىز ەتۋدى قامتيدى، دەپ حابارلايدى aqshamnews.kz.
الماتى اكىمى ەربولات دوسايەۆتىڭ تاپسىرماسى بويىنشا بەلگىلەنگەن 20% كۆوتاعا سايكەس كوپبالالى وتباسىلاردى، حالىقتىڭ الەۋمەتتىك وسال توپتارىن جانە بيۋدجەتتىك ۇيىمدار قىزمەتكەرلەرىن قوسا العاندا، ازاماتتاردىڭ نەعۇرلىم وسال ساناتتارىنا تۇرعىن ءۇي بەرىلەدى.
«تۇرعىن ءۇي قاتىناستارى تۋرالى» قازاقستان رەسپۋبليكاسى زاڭىنىڭ 74-بابىنا سايكەس كوممۋنالدىق تۇرعىن ءۇي قورىنان تۇرعىن ءۇي كەزەكتىلىك تارتىبىمەن عانا بەرىلەدى. 2024 جىلى وسى باعدارلاما بويىنشا 5 594 ادام باسپانامەن قامتاماسىز ەتىلدى.
باعدارلاما اياسىندا 2000 ازامات كوممۋنالدىق تۇرعىن ءۇي قورىنان جالدامالى پاتەرلەر الدى. ونىڭ ىشىندە 404 پاتەر جەتىم بالالارعا ءبولىندى، بۇل بەرىلگەن تۇرعىن ءۇيدىڭ جالپى سانىنىڭ 20% - نا سايكەس كەلەدى. سونىمەن قاتار، وتكەن جىلى 257،7 ملن تەڭگەگە 207 تۇرعىن ءۇي سەرتيفيكاتى بەرىلدى. سەرتيفيكات الۋشىلار 1 جانە 2 توپتاعى مۇگەدەكتەر، مۇگەدەك بالالارى بار وتباسىلار، كوپبالالى وتباسىلار جانە جەتىم بالالار بولدى.
2025 جىلى ءحاوت جانە جەتىم بالالارعا بولىنەتىن تۇرعىن ءۇي ۇلەسى 20% دەڭگەيىندە ساقتالادى.