الماتى قالاسىنىڭ جاستارىنا تۇرعىن ءۇي ساتىپ الۋعا ارنالعان جەڭىلدەتىلگەن نەسيە الۋ باعدارلاماسىنا ءوتىنىش قابىلداۋ باستالدى، دەپ حابارلايدى aqshamnews.kz
35 جاسقا دەيىنگى جاستار 29 شىلدە مەن 7 تامىز ارالىعىندا almaty-zhastary2024.kz سايتى ارقىلى ءوتىنىش بەرە الادى. ءوتىنىش بەرۋ ءۇشىن ەلەكتروندىق سيفرلىق قولتاڭبا قاجەت.
باعدارلاما اياسىندا نەسيە بەرۋ شارتتارى:
- قارىزدىڭ ەڭ كوبى – 18 ملن تەڭگەگە دەيىن؛
- پايىزدىق مولشەرلەمە – 5%؛
- باستاپقى جارنا – 10%؛
- باستاپقى جانە قايتالاما تۇرعىن ءۇي الۋ مۇمكىندىگى.
بيىل 1 200 ادامدى قامتۋ جوسپارلانعان. باعدارلاماعا قاتىسۋ ءۇشىن قويىلاتىن نەگىزگى تالاپتار:
- قازاقستان رەسپۋبليكاسىنىڭ ازاماتتىعى.
- تۇراقتى تىركەۋ: ءوتىنىش بەرۋ كەزىندە ءوتىنىش بەرۋشىنىڭ جانە جۇبايىنىڭ (بار بولسا) الماتى قالاسىندا تۇراقتى تىركەۋى بولۋى.
- جاس شەكتەۋى: ءوتىنىش بەرۋ كەزىندە قاتىسۋشى 35 جاسقا تولماۋى كەرەك، ال جۇبايىنىڭ (بار بولسا) جاسى ەسەپكە الىنبايدى. باعدارلاماعا نەگىزگى قاتىسۋشى رەتىندە ەرلى-زايىپتىنىڭ بىرەۋى عانا قاتىسا الادى.
- تۇرعىن ءۇيدىڭ بولماۋى: قاتىسۋشىنىڭ جانە ونىڭ وتباسى مۇشەسىندە مەنشىك قۇقىعىندا تۇرعىن ءۇيدىڭ بولماۋى، سونداي-اق قازاقستان اۋماعىندا سوڭعى 5 جىل ىشىندە تۇرعىن ءۇي جاعدايىن ادەيى ناشارلاتۋ دەرەگىنىڭ بولماۋى.
- جۇمىس ءوتىلى: قاتىسۋشىنىڭ الماتى قالاسىندا دەنساۋلىق ساقتاۋ، ءبىلىم بەرۋ، مادەنيەت، سپورت، جوو-لار جانە عىلىمي-زەرتتەۋ ينستيتۋتى، جۋرناليستيكا، الەۋمەتتىك سالادا، قۇقىق قورعاۋ ورگاندارىندا، قالالىق كوممۋنالدىق قىزمەتتەردە جانە «جۇمىس ىستەيتىن جاستار» باعدارلاماسى بويىنشا جالدامالى جۇمىس (2019 جىلى جەلتوقسان) ساناتتارىندا ەڭ كەمى سوڭعى 6 اي بويى مىندەتتى زەينەتاقى اۋدارىمى بار جۇمىس ءوتىلى بولۋى قاجەت.
باعدارلاماعا قاتىسۋ ءۇشىن ءوتىنىش بەرۋشىلەر almaty-zhastary2024.kz سايتىنا كىرىپ، قاجەتتى مالىمەتتەردى تولتىرىپ، ەلەكتروندىق سيفرلىق قولتاڭبا ارقىلى وتىنىشتەرىن جىبەرە الادى.
بۇل باعدارلاما جاستاردىڭ تۇرعىن ءۇي ماسەلەسىن شەشۋگە باعىتتالعان ماڭىزدى قادام بولىپ تابىلادى. جاس قازاقستاندىقتاردىڭ ءومىر ءسۇرۋ ساپاسىن جاقسارتۋعا ارنالعان بۇل مۇمكىندىك كوپتەگەن وتباسىلار ءۇشىن قولجەتىمدى بولماق.