يسپانياداعى تانىمال "مادريدتىكتەر بۇكىل الەمدە" تەلەجوباسىنىڭ مادريدتە ەفيرگە شىققان جاڭا شىعارىلىمى قازاقستانعا ارنالدى. باعدارلاما اۆتورلارى ەلدىڭ ەڭ كورىكتى ءارى وزىندىك بوياۋى قانىق مەگاپوليستەرىنىڭ ءبىرى رەتىندە الماتىعا ەرەكشە نازار اۋداردى. بۇل تۋرالى الماتى قالاسى تۋريزم باسقارماسىنىڭ وكىلدەرى ايتتى.
ءتۇسىرىلىم جۇمىستارى Almaty Tourism Bureau قولداۋىمەن ءوتتى. مەكەمە تەلەتوپقا ىلەسىپ، قالانىڭ تۋريستىك الەۋەتىن تانىستىردى. شىعارىلىمدا ۆوزنەسەنسكيي سوبورىنا، كوك بازار جانە Atlético de Madrid فۋتبول كلۋبىنىڭ اكادەمياسى كورسەتىلدى.
تەلەجوبا الماتىنىڭ كۇندەلىكتى تىنىس-تىرشىلىگىن، مادەني سان الۋاندىعىن، ءسالت-داستۇرى مەن كوركەم تابيعي كەلبەتىن ايشىقتايدى. ال جوبانىڭ كەيىپكەرلەرى – مادريدتىك ميگەل، نيكولاس پەن اۆرورا قالا مەن ونىڭ تۇرعىندارى تۋرالى اسەرىن ايتادى.
باعدارلاما Telemadrid تەلەارناسىنان كورسەتىلەدى. ول شەتەلدە ءومىر ءسۇرىپ نەمەسە ساياحاتتاپ جۇرگەن يسپاندىقتاردىڭ وقيعاسى ارقىلى كورەرمەندەردى ءارتۇرلى ەلدەردىڭ تۇرمىس-تىرشىلىگىمەن، مادەنيەتى مەن وزىندىك ەرەكشەلىكتەرىمەن تانىستىرادى.
قالالىق تۋريزم باسقارماسىنىڭ دەرەگىنە سايكەس، 2025 جىلدىڭ العاشقى توعىز ايىندا الماتىعا كەلگەن يسپاندىق تۋريستەر سانى 2024 جىلدىڭ وسى كەزەڭىمەن سالىستىرعاندا 37،8 پايىزعا ارتقان. ال بولجام بويىنشا 2026 جىلى الماتى شامامەن 750 مىڭ شەتەلدىك قوناقتى قابىلدايدى. بۇل قالانىڭ حالىقارالىق تۋريستىك كەڭىستىكتەگى بەدەلىنىڭ ارتىپ كەلە جاتقانىن اڭعارتادى.