ءدىني قىزمەتكەرلەر ەرىكتىلەردىڭ قولداۋىمەن بۇگىن تاڭەرتەڭنەن باستاپ يسلامنىڭ زاڭدارى مەن سانيتارلىق-ەپيدەميولوگيالىق تالاپتاردى ساقتاي وتىرىپ، قۇرباندىق شالۋ ءراسىمىن باستادى. وسىلايشا ءدىن قىزمەتكەرلەرى qurban2021.kz. سايتى ارقىلى قايىرىمدى جاندار تاپسىرىس بەرگەن قۇرباندىق مالىن جەتكىزدى.
الماتىدا قۇربان ايتتىڭ ءبىرىنشى كۇنى 220 جانۋار قۇرباندىققا شالىندى، ولاردى الماتى تۇرعىندارى ونلاين قۇربان ەتتى، دەپ حابارلايدى Almaty-akshamy.kz
قۇربان ايت مەرەكەسى ەكىنشى جىل قاتارىنان قاشىقتان وتۋىنە بايلانىستى، قۇرباندىق شالۋ ءراسىمى qurban2021.kz. ينتەرنەت پلاتفورماسىندا ءوتىنىم جاساعان تاپسىرىس بەرۋشىلەردىڭ قاتىسۋىنسىز ءوتتى.
بۇل سايت ءوز كەزەگىندە قايىرىمدىلىق جاسايتىندار مەن مۇقتاج ادام اراسىنداعى بايلانىستىرۋشى قۇرال. تاپسىرىس بەرۋشىلەرگە ءراسىمدى وتكىزۋ تۋرالى تولىق بەينەبايان كورسەتىلەدى. مۇنىڭ ءبارى ارنايى مال سويۋ ورىندارىندا ادام كوپ جينالمايتىنداي ەتىپ ويلاستىرىلعان.
سايت مۇمكىندىگىن تەك قۇرباندىققا شالعىسى كەلەتىندەر عانا ەمەس، مۇقتاج ادامدار دا پايدالانا الدى. بارلىق ەت از قامتىلعان ادامدارعا تاراتىلدى. مەرەكەنىڭ العاشقى كۇنىندە 680 وتباسى ەت تۇرىندە كومەك الدى. ونى ءدىن وكىلدەرى، يمامدار مەن ەرىكتىلەر جەتكىزدى.
«وربيتا» مەشىتىنىڭ باس يمامى جانبولات ساپاشوۆ قۇرباندىق شالۋدىڭ جاڭا فورماتىنا قاراماستان، يگى ءىس جاساپ، مۇقتاج جاندارعا كومەك كورسەتۋگە شەشىم قابىلداعان بارلىق ەرىكتىلەرگە، قايىرىمدىلىق جاساۋشىلارعا العىسىن ءبىلدىردى. ول الماتىنىڭ بارلىق تۇرعىندارىنا دەنساۋلىق، اماندىق پەن اللانىڭ راقىمىن تىلەدى.
يمامداردىڭ ايتۋىنشا، تاپسىرىس بەرۋشىلەر قۇرباندىق راسىمىنە قاتىسا المادى دەپ الاڭداۋدىڭ قاجەتى جوق. كەز كەلگەن يگى ءىستى اللا تاعالا مىندەتتى تۇردە باعالايدى. دىنگە سايكەس، باسقا مۇسىلمانعا وكىلەتتىك بەرۋ ارقىلى جانۋاردى ءوز اتىنان قۇربان ەتۋگە رۇقسات ەتىلەدى.
مۇقتاج جاندارعا كومەك كەلەسى ەكى كۇندە دە جالعاسادى. ءوز كەزەگىندە كومەك العان وتباسى مۇشەلەرى، سونداي-اق جالعىز باستى زەينەتكەرلەر الماتى مۇسىلماندارىنىڭ ءدىني باسقارماسىنا، ەرىكتىلەر مەن قايىرىمدىلىق جاساۋشىلارعا جومارتتىعى مەن قايىرىمدىلىعى ءۇشىن العىستارىن ءبىلدىردى.
ەسكە سالساق، بيىل بۇكىل الەمدە قۇربان ايت مەرەكەسى ىندەتكە بايلانىستى شەكتەۋلەرمەن ءوتتى. الماتىدا قۇرباندىق شالۋ راسىمدەرى ونلاين تۇردە ءوتتى، ال ۇجىمدىق نامازدارعا تىيىم سالىندى.