الماتى حالىقارالىق اۋەجايىندا تاكسي تاريفتەرىن بەلگىلەۋ ۇسىنىلادى

الماتى قالاسىنىڭ تۋريزم جونىندەگى كەڭەسى اياسىندا قالانىڭ كاسىپكەرلەر پالاتاسى جانىنان جۇمىس توبى قۇرىلدى، ونىڭ قۇرامىنا الماتى قالاسىنىڭ كاسىپكەرلەر پالاتاسىنىڭ، اۆياسيالىق كولىك پروكۋراتۋراسىنىڭ، الماتى قالاسىنىڭ تۋريزم باسقارماسىنىڭ، الماتى قالاسىنىڭ حالىقارالىق اۋەجايىنىڭ، الماتى قالاسىنىڭ حالىقارالىق اۋەجايىنىڭ جپق، تۇركسىب اۋدانىنىڭ جپق، الماتى قالاسىنىڭ مەملەكەتتىك كىرىستەر دەپارتامەنتىنىڭ، الماتى قالاسى ءىىد-نىڭ، قازاقستاندىق تۋريستىك قاۋىمداستىقتىڭ، الماتى ق. تجك وڭىرلىك پالاتاسىنىڭ جانە تاعى باسقالارىنىڭ وكىلدەرى ەندى، دەپ حابارلايدى almaty-akshamy.kz

ەكى اپتا ىشىندە جۇمىس توبى تاكسيگە تاپسىرىس بەرۋ قىزمەتتەرى (AparuTaxi، Region، Yandex Taxi، Uber، Blue Sky Energy جانە ت.ب.) ۇسىناتىن تاكسيلەردىڭ قۇنىن تالدادى، ءجۇرۋدىڭ ورتاشا باعاسى ەسەپتەلدى. جولاۋشىلاردى تاسىمالداۋ تاريفتەرى وتىرعان جەردەن باراتىن پۋنكتكە دەيىن قاشىقتىققا ءارى تاكسي كلاسىنا بايلانىستى 1200-دەن 12000 تەڭگەگە دەيىن وزگەرەدى. ەڭ جوعارى باعا اۋەجاي تەرمينالىنان «شىمبۇلاق» تاۋ شاڭعىسى كۋرورتىنا دەيىنگى تاكسيدىڭ پرەميۋم سەگمەنتىندە كورسەتىلەدى.

ايتا كەتەرلىگى، بۇل تۇراقتى ەمەس، ءبىراق جولاۋشىلار ءۇشىن ۇسىنىلاتىن باعا، تاكسي قىزمەتتەرىنىڭ قۇنى اۋا-رايىن، سۇرانىستى جانە باسقا دەرەكتەردى ەسكەرە وتىرىپ وزگەرۋى مۇمكىن. ۇسىنىلعان باعالاردى ەسكەرە وتىرىپ، جولاۋشىلار باعا ساياساتىن باسشىلىققا الا الادى.

تۋريستەر ءۇشىن وسى ۇسىنىستاردى ازىرلەۋدىڭ ماقساتى – جاۋاپسىز تاكسي جۇرگىزۋشىلەرىنىڭ زاڭسىز ارەكەتتەرىن رەتتەۋ.

بۇگىندە جۇمىس توبى قالالىق ايماقتاردى جانە ۇسىنىلاتىن باعالاردى قوسا العاندا، رەسمي تاكسي وپەراتورلارىنىڭ قىزمەتتەرىنە تاريفتەردى كورسەتە وتىرىپ، اقپاراتتىق ستەندتەر مەن بۋكلەتتەر ازىرلەدى. ماتەريالدار قازاق، ورىس، اعىلشىن جانە جۇڭگو تىلدەرىندە جاريالاندى. تولىق قامتۋ ءۇشىن اقپاراتتىق ستەندتەر الماتى قالاسىنىڭ حالىقارالىق اۋەجايىنىڭ تەرمينالدارىندا ىلىنەدى. كەدەندىك باقىلاۋ ايماعىندا شەتەل ازاماتتارىنىڭ پاسپورتتارىنا اقپاراتتىق قوسىمشا پاراقتاردى تاراتۋ كوزدەلگەن. سونداي-اق، قوناقتار تەرمينالدان شىعاتىن تۋريستىك اقپاراتتىق ورتالىقتىڭ تۇعىرىنان تولىق اقپاراتتى الا الادى.