الماتى قالاسىنىڭ وڭىرلىك كوممۋنيكاسيالار قىزمەتىنىڭ الاڭىندا حايۋاناتتار باعىنىڭ دامۋىنا ارنالعان بريفينگ ءوتتى. حايۋاناتتار باعى ديرەكتورى سەيىلحان اقىلبەكوۆتىڭ ايتۋىنشا، جىرتقىش قۇستار كوللەكسياسى ەرەكشە ماقتانۋعا تۇرارلىق، دەپ حابارلايدى almaty-akshamy.kz
سيرەك كەزدەسەتىن قۇستاردىڭ قاتارىندا: اقيىق، تازقارا، قاراقۇس، بۇركىت، يتەلگى، دالا قىرانى بار. ولاردىڭ بارلىعى دەرلىك قىزىل كىتاپقا ەنگىزىلگەن جانە حايۋاناتتار باعىنىڭ ماماندارى ولاردان ۇنەمى ءتول الادى.
سونىمەن قاتار، حايۋاناتتار باعىنىڭ كوللەكسياسىندا ۇلكەن قۇرلىق تورتتىگى بار: ازيالىق ءپىل، بەگەموت، وڭتۇستىك اق ءمۇيىزتۇمسىق جانە وڭتۇستىك افريكا جيرافى.
كوللەكسياداعى بارلىق جانۋارلار جەتى ەكسپوزيسيالىق بولىمگە بولىنەدى: «اكۆاريۋم»، «ەكزوتاريۋم»، «پريماتتار»، جىرتقىش قۇستار، ەكزوتيكالىق قۇستار، تۇياقتىلار، جىرتقىش سۇتقورەكتىلەر. حايۋاناتتار باعىندا ۆەتەرينارلىق ءبولىم، جەم-شوپ اسحاناسى، ۆيۆاريي، قۇرىلىس الاڭى، اۆتوگاراج ورنالاسقان.
2025 جىلعا قاراي جانۋارلار كوللەكسياسىن 400 تۇرگە ( 4000 باس) دەيىن ۇلعايتۋ، ال 2030 جىلعا قاراي 500 تۇرگە (7000 باس) جەتكىزۋ جوسپارلانۋدا.
«ءبىزدىڭ مىندەتىمىز - جانۋارلار جويىلىپ كەتكەن نەمەسە سانى ازايىپ كەتكەن جەرلەرگە ولاردى بوساتۋعا دايىنداۋ. ارينە، ءبىز حايۋاناتتار باعىندا تۋىلعان جانۋارلاردى الىپ، جابايى تابيعاتقا جىبەرە المايمىز. حايۋاناتتار باعىندا جابايى جانۋارلاردى رەينترودۋكسيالاۋ ورتالىعىن سالۋ جانە جانۋارلاردى جابايى تابيعاتقا شىعارۋ ادىستەرىن ازىرلەۋ قاجەت. بۇدان ءارى جانۋارلاردى بوساتۋ زوولوگيا ينستيتۋتىنىڭ زوولوگ عالىمدارىنىڭ، قازاقستان رەسپۋبليكاسى ەكولوگيا جانە تابيعي رەسۋرستار مينيسترلىگى ورمان شارۋاشىلىعى جانە جانۋارلار دۇنيەسى كوميتەتىنىڭ وكىلدەرىنىڭ باقىلاۋىمەن جۇزەگە اسىرىلادى»، - دەپ ءبولىستى س.اقىلبەكوۆ.
اتاپ وتەتىنى، حايۋاناتتار باعىنىڭ جالپى اۋماعى - 20،645 گەكتار