2023 جىلى الماتى قالاسى ەكونوميكالىق ءوسىم بويىنشا رەكوردتىق كورسەتكىشكە قول جەتكىزدى. بۇل تۋرالى ورتالىق كوممۋنيكاسيالار قىزمەتىندە وتكەن بريفينگتە الماتى اكىمى ەربولات دوسايەۆ حابارلادى. ونىڭ ايتۋىنشا، قالا ەكونوميكاسىنىڭ تۇراقتى دامۋ قارقىنى الداعى جىلدارى دا جالعاسىن تابادى، دەپ حابارلايدى aqshamnews.kz
2024 جىلدىڭ 11 ايىنىڭ قورىتىندىسى بويىنشا الماتىنىڭ قىسقا مەرزىمدى ەكونوميكالىق ينديكاتورى 6،6%-عا دەيىن ءوستى. بۇل قالاداعى الەۋمەتتىك-ەكونوميكالىق دامۋ باعدارلامالارىنىڭ ءتيىمدى جۇزەگە اسىرىلىپ جاتقانىن كورسەتەدى. 2024 جىلدىڭ قورىتىندىسى بويىنشا ەكونوميكانىڭ جالپى ءوسىمى 5،5%-دى قۇرايدى دەپ بولجانۋدا، ال 2025 جىلى بۇل كورسەتكىش 6،4%-عا دەيىن جەدەلدەيدى.
الماتىنىڭ جالپى وڭىرلىك ءونىمى 2023 جىلى 24،8 ترلن تەڭگەگە جەتتى، بۇل سوڭعى 10 جىلداعى ەڭ جوعارى كورسەتكىش بولىپ تابىلادى. ەكونوميكانىڭ نەگىزگى درايۆەرلەرى رەتىندە وڭدەۋ ونەركاسىبى، ساۋدا، قارجى جانە ساقتاندىرۋ قىزمەتى (+12%)، اقپارات جانە بايلانىس سالالارى ايقىندالدى.
الماتىنىڭ ەكونوميكالىق تۇراقتىلىعى مەن جوعارى الەۋەتى ونى ورتالىق ازيانىڭ جەتەكشى ەكونوميكالىق ورتالىقتارىنىڭ ءبىرى رەتىندە كورسەتىپ وتىر. «مەملەكەت باسشىسىنىڭ تاپسىرمالارىن جانە قالامىزدىڭ دامۋ باعدارلاماسىن ءتيىمدى جۇزەگە اسىرۋ ونىڭ ەكونوميكاسىنىڭ تۇراقتى وسۋىمەن تىعىز بايلانىستى»، – دەدى ەربولات دوسايەۆ.
2025 جىلعا قاراي الماتىنىڭ ەكونوميكالىق دامۋى ودان ءارى جەدەلدەپ، ءوڭىردىڭ تۇراقتى دامۋىنا قوسىمشا سەرپىن بەرەدى دەپ كۇتىلۋدە. بۇل كورسەتكىشتەر الماتىنىڭ ەل ەكونوميكاسىنداعى باستى ءرولىن ايقىنداي تۇسەدى.
الماتى ءوز تۇرعىندارى مەن بيزنەسىنە قولايلى جاعداي جاساپ، قازاقستاننىڭ جانە ورتالىق ازيانىڭ ەكونوميكالىق دامۋىنىڭ كوشباسشىسى بولۋدى جالعاستىرۋدا.