وپەراسيا ءساتتى ءوتتى.
قالقامانداعى №7 اۋرۋحانانىڭ دارىگەرلەرى سيرەك كەزدەسەتىن جارىقتى الىپ تاستادى. وتا اۋرۋحاناداعى ومىرتقا حيرۋرگياسى بولىمشەسىندە مىندەتتى الەۋمەتتىك مەديسينالىق ساقتاندىرۋ شەڭبەرىندە جاسالدى، دەپ حابارلايدى Almaty-akshamy.kz اۋرۋحانانىڭ باسپا ءسوز قىزمەتىنە سىلتەمە جاساپ.
حابارلاماعا سۇيەنسەك، پاسيەنت ۇزاق ۋاقىت بويى ارقاسى اۋىرعانىن ايتقان. كەيدە ءتىپتى، اياعى مەن قولى ۇيىپ، جۇرە الماي قالاتىن.
«بۇل اۋرۋدىڭ بەلگىلەرى ءارتۇرلى بولۋى مۇمكىن. مىسالى، ءىش قۇرىلىسى، جۇرەكتىڭ تۇسى اۋىرۋى مۇمكىن. ادام ەنتىگىپ، تىنىس الۋى قيىندايدى، ءوت پەن باۋىر تۇسى شانشىپ اۋىرادى. ۋاقتىلى ەمدەلمەسە، پاسيەنت جۇرە الماي، سال بولىپ قالۋى دا ىقتيمال»، - دەيدى بولىمشە مەڭگەرۋشىسى باقىت اعلاقوۆ.
ايتۋىنشا، ومىرتقانىڭ كەۋدە تۇسىنداعى جارىق وتە سيرەك كەزدەسەدى جانە وتە ءقاۋىپتى اۋرۋ بولىپ ەسەپتەلەدى. سوندىقتان مۇنداي بەلگىلەر بايقالعان جاعدايدا بىردەن نەيروحيرۋرگ مامانعا قارالعان ءجون.
«كوپ جاعدايدا پاسيەنتتەرگە وتا جاساۋ تۋرالى كەڭەس بەرىلەدى. ءبىز بۇل پاسيەنتكە دە وتا جاساپ، جارىقتى الىپ تاستادىق. وپەراسيا ءساتتى ءوتتى، ناۋقاس وتادان كەيىن وزدىگىمەن ءجۇرىپ-تۇرا باستادى، كەۋدە تۇسىنىڭ اۋىرعانى باسىلدى»، - دەيدى دارىگەر.
ماماندار ومىرتقا اراسىنداعى تىندەردىڭ سىرتقا شىعىپ، جارىق پايدا بولۋىنا جول بەرمەۋ ءۇشىن ءجيى ءارى ۇزاق سەرۋەندەۋگە كەڭەس بەرەدى. ءجۇزۋ، يوگا، گيمناستيكامەن اينالىسۋ، جۇمىس ورنىندا تىك، دۇرىس وتىرۋ، تاڭەرتەڭ جانە كۇنى بويى جاتتىعۋ جاساۋ ارقىلى بۇل دەرتتىڭ الدىن الۋعا بولادى. سونىمەن قاتار، ارتىق سالماق تا ومىرتقادا جارىق پايدا بولۋىنا اكەپ سوقتىرادى. سول سەبەپتى زياندى، اششى جانە مايلى تاعامداردان باس تارتىپ، جەمىس-كوكونىستەرمەن پايدالى تاماقتانۋ قاجەت، - دەيدى ماماندار.