ون ءبىرىنشى سىنىپ وقۋشىلارى ەرەسەك ءومىر جولىن مەكتەپ اۋلاسىنا اعاش وتىرعىزۋدان باستادى.
اعاش وتىرعىزۋ تۇلەكتەر اراسىندا داستۇرگە اينالعان. ءار جىلدىڭ مەكتەپ بىتىرۋشىلەرى ءبىلىم ورداسىنا دەگەن العىستارىن وسىلاي بىلدىرەدى. بيىل بۇل ءۇردىس مەملەكەت باسشىسىنىڭ «تازا قازاقستان» ەكولوگيالىق ناۋقانى جانە «الماتى – ءبىزدىڭ ورتاق ءۇيىمىز» كالالىق كامپانيا اياسىندا جالعاسىن تاپتى.
بۇگىنگى «تۇلەكتەردىڭ اعاش وتىرعىزۋى» رەسپۋبليكالىق ەكو-چەللەندجى بارىسىندا الماتىلىق تۇلەكتەر 400-دەن استام جەمىس اعاشتارى مەن 500-گە جۋىق گۇل كوشەتتەرىن وتىرعىزدى. وسى ورايدا بوستاندىق اۋدانىنداعى №105 گيمنازيانىڭ تۇلەكتەرى دە اۋقىمدى ناۋقانعا ءوز ۇلەستەرىن قوستى. ولار اكسيا اياسىندا وقۋ عيماراتىنىڭ اۋلاسىنا 60-تان استام جەمىس جانە تۋيا اعاشتارىن وتىرعىزدى.
«بۇل تەك قوعامدىق پايدالى جۇمىس ەمەس، ءبىزدى وقىتقان مەكتەبىمىزدى، سۇيىكتى قالامىزدى كوگالداندىرۋعا جانە جاقسارتۋعا قوسقان ۇلەسىمىز دەپ ەسەپتەيمىز. بىرنەشە جىلدان سوڭ، مەكتەبىمىزدى ساعىنىپ كەلگەندە وسى اعاشتاردىڭ جايقالىپ ءوسىپ تۇرعانىن ەلەستەتسەم، كەۋدەمدى قۋانىش سەزىمى كەرنەيدى»، - دەيدى №105 گيمنازيانىڭ 11 سىنىپ وقۋشىسى الۋا تولەعۇلوۆا.
جاس تۇلەكتەر وسىنداي ماڭىزدى شاراعا ۇلكەن جاۋاپكەرشىلىكپەن قارادى. ءارقايسىسى تىڭ دايىندىقپەن كەلگەن. اعاشتار شىنايى كوڭىلمەن جانە اسا قامقورلىقپەن وتىرعىزىلدى. ولار ەندى تامىرىن تەرەڭىنەن جايىپ، قالانىڭ ودان ءارى جاسىل جەلەككە اينالۋىنا سەبەپ بولماق .
ەكولوگيالىق ناۋقانعا قولداۋ بىلدىرگەن الماتى قالاسى ءبىلىم باسقارماسىنىڭ باسشىسى لياززات جىلقىبايەۆا جانە باسشى ورىنباسارى باقىتجان بيەكوۆا دا №180، №105 مەكتەپ تۇلەكتەرىمەن بىرگە وقۋ عيماراتىنىڭ اۋلاسىنا جەمىس اعاشتارىن وتىرعىزدى.
ايتا كەتەيىك، بيىل الماتىدا 15 مىڭنان استام وقۋشى (13106 –مەملەكەتتىك مەكتەپتەر، 2528 – جەكە) 11 سىنىپتى اياقتاپ، التىن ۇيا مەكتەبىمەن قوشتاسادى. «الماتى – ءبىزدىڭ ورتاق ءۇيىمىز» ناۋقانىنا قاتىسىپ، بەلسەندىلىك تانىتقان مەكتەپ ءبىتىرۋشى تۇلەكتەرگە الداعى ەمتيحاننان سۇرىنبەي ءوتىپ، قالاعان ماماندىقتارىنا تۇسۋگە تىلەكتەسپىز.
ەستەرىڭىزگە سالا كەتەيىك، 8 ءساۋىر مەن 8 مامىر ارالىعىندا الماتىدا «الماتى – ءبىزدىڭ ورتاق ءۇيىمىز» ناۋقانى ءوتىپ جاتىر. ءاربىر تۇرعىن قالانىڭ دامۋى مەن اباتتاندىرىلۋىنا ءوز ۇلەسىن قوسا الادى.
بارلىق اقپارات almaty.kz سايتىندا، الماتى اكىمدىگىنىڭ الەۋمەتتىك جەلىلەرىندە ورنالاسقان. سونداي-اق، ۆەب-سايتقا ارنايى QR-كود ارقىلى قالا بويىنشا ورنالاستىرىلعان باننەرلەردە، پلاكاتتاردا جانە افيشالاردا كىرۋگە بولادى.
ناۋقاننىڭ بەلسەندى قاتىسۋشىلارىنا ارنالعان الەۋمەتتىك جەلىدەگى حەشتەگتەر: #الماتىناشوبششييدوم، #ناسمنوگوگورودودين، #ءالماتىبىزدىڭورتاقۇيىمىز، #بىزكوپپىزقالاجالعىز.