قوعامدىق كولىك ءۇزىلىسسىز قىزمەت كورسەتۋدە: الماتى تاسىمالداۋشىلارى ايازعا دايىنداۋدا، دەپ حابارلايدى Almaty-akshamy.kz
اۋا تەمپەراتۋراسىنىڭ كۇرت تومەندەۋى مەن 12 جەلتوقساندا جاۋعان قالىڭ قارعا قاراماستان قوعامدىق كولىكتىڭ شىعۋى 91% بولىپ، ءۇزىلىسسىز جۇمىس ىستەدى.
بۇعان دەيىن قالالىق موبيلدىلىك باسقارماسىنىڭ نۇسقاۋلىعىمەن قالاداعى تاسىمالداۋشى مەكەمەلەر كولىك قۇرالدارىن قىسقى كەزەڭگە دايىنداۋ بويىنشا قاجەتتى ءىس-شارا جۇرگىزگەن ەدى. الايدا اۆتوبۋستاردى جولعا شىعارۋ كەزىندە اۋا-رايىنا بايلانىستى تەحنيكالىق اقاۋلار انىقتالىپ جاتتى. سول سەبەپتى اۆتوبۋستاردىڭ ءبىر بولىگى قىزمەت كورسەتۋگە جارامسىز بولدى.
بۇل رەتتە تاسىمالداۋشىلار تاراپىنان اقاۋلاردى جويۋ بويىنشا قاجەتتى شارالار قابىلدانۋدا. بارلىق اۆتوپاركتەردە كەزەكشىلىك ۇيىمداستىرىلىپ، جاۋاپتى قىزمەتكەرلەردىڭ جۇمىسى كۇشەيتىلدى. تۇندە جەلىگە ۋاقتىلى شىعۋ ءۇشىن قوزعالتقىشتى بىرنەشە رەت جىلىتۋ جۇرگىزىلەدى.
ايتا كەتۋ كەرەك، رەيستەردىڭ جۇيەلىلىگىنە قالا بويىنشا ورىن العان ۇلكەن كەپتەلىستەر دە اسەرىن تيگىزدى. كوممۋنالدىق قىزمەتتەر قالانىڭ بارلىق اۋماعىندا قار تازالاۋ جانە جولداردى تازالاۋ جۇمىسىن قارقىندى جۇرگىزۋدە. سينوپتيكتەردىڭ ايتۋىنشا، ءبىر كۇندە جاۋىن-شاشىننىڭ ايلىق مولشەرىنىڭ 28%-ى تۇسكەن. بۇگىندە الماتىدا 176 تۇراقتى قالالىق جانە قالا ماڭىنداعى مارشرۋتتار بار. بارلىعى 2297 بىرلىك اۆتوبۋس پەن تروللەيبۋس قىزمەت كورسەتەدى. مارشرۋتتارعا "الماتىەلەكتروترانس" ج ش س 23 جەكە جانە 1 كوممۋنالدىق اۆتوبۋس پاركى قىزمەت كورسەتەدى.
بيىل گازبەن جۇرەتىن 600 اۆتوبۋسى مەن 100 تروللەيبۋس ساتىپ الىندى. سونداي-اق، جەكە اۆتوپاركتەر دە قوسىمشا جىلجىمالى بىرلىكتەردى ساتىپ الۋدا. بۇل شارا قالانىڭ قولدانىستاعى اۆتوپاركىن ايتارلىقتاي جاڭارتۋعا مۇمكىندىك بەرەدى.