الماتى اۋەجايىندا توبەلەس بولىپ، پوليسيا قىزمەتتىك قارۋدان وق اتتى

توبەلەسكە قاتىسۋشىلار ۇستالدى.

اۋەجايدىڭ اۆتوتۇراعىندا ماس ءۇش ەر ادام توبەلەستى. كەيىن ولاردىڭ ءبىرى بوتەلكەنى سىندىرىپ، كەلگەن پوليسەيلەرگە قاراي جۇگىردى، دەپ حابارلايدى Almaty-akshamy.kz قازاقپاراتقا سىلتەمە جاساپ.

ونىڭ ۆيدەوسى الەۋمەتتىك جەلىدە تاراپ جاتىر.

الماتى قالالىق پوليسيا دەپارتامەنتىنىڭ مالىمەتىنشە، 26 شىلدەدە تۇنگى ساعات ءبىر شاماسىندا الماتى حالىقارالىق اۋەجايى اۋماعىنداعى تۋريستىك پوليسيا بەكەتىنىڭ قۇرامىنداعى پوليسيا قىزمەتكەرلەرىنە ەر ادام كەلىپ، كولىك تۇراعىندا توبەلەس بولىپ جاتقانىن ايتقان.

«اقپارات راستالدى، انىقتالعانىنداي، ىشىمدىك ىشكەن ءۇش ەر ادام توبەلەسىپ جاتتى. ولار پوليسيا قىزمەتكەرلەرىنىڭ تالابىنا اگرەسسيامەن جاۋاپ بەردى. توبەلەسۋشىلەردىڭ ءبىرى، بۇرىن سوتتالعان، 1994 جىلى تۋعان ۋ. ەسىمدى ازامات سىرانىڭ شىنى بوتەلكەسىن سىندىرىپ، پوليسەيگە قاراي جۇگىرىپ، ونى سوققىعا جىقپاق بولدى. اۋىر قىلمىستىڭ جولىن كەسكەن ءتارتىپ ساقشىسى قىزمەتتىك قارۋىنان اسپانعا ەسكەرتۋ وق اتتى»، - دەپ حابارلادى قالالىق پوليسيادان.

ناتيجەسىندە توبەلەسكە قاتىسۋشىلار ۇستالدى. ولار - الماتى جانە تۇركىستان وبلىستارىنىڭ تۇرعىندارى. ەكەۋى بۇرىن ادام توناعانى جانە بوتەننىڭ مۇلكىن ۇرلاعانى ءۇشىن سوتتى بولعان.

«ولاردىڭ ارەكەتى قك-نىڭ 293-بابى 2-بولىگى – بۇزاقىلىقپەن سارالانىپ، قاماۋعا الىندى. اتالعان دەرەك بويىنشا سوتقا دەيىنگى تەرگەۋ باستالدى»،- دەپ اتاپ ءوتتى ۆەدومستۆودان. سونىمەن قاتار، قىزمەتتىك قارۋدى قولدانۋ دەرەگى بويىنشا قىزمەتتىك تەكسەرۋ جۇرگىزىلەتىن بولادى.