قالا مەرەكەسىنە وراي، الماتى قالاسى مادەنيەت باسقارماسىنا قاراستى «الاتاۋ» ءداستۇرلى ونەر تەاترىنىڭ كورۋ مۇمكىندىگى شەكتەۋلى جانداردىڭ مادەني دەمالىسىن ۇيىمداستىرۋ بولىمىندە «الماتى – اسەم قالا» اتتى ادەبي-سازدى كونسەرت ءوتتى.
قوس جانارىنان ايرىلسا دا جۇرەگى ونەر دەپ سوققان ەرەكشە جانداردان ۇيىمداستىرىلعان «اتا مۇرا» ۇلت-اسپاپتار ءانسامبلى كۇمبىرلەگەن كۇيلەرىمەن ءىس-شارانى باستادى. ق ر ءبىلىم بەرۋ ءىسىنىڭ ۇزدىگى، ارداگەر-ۇستاز، اقىن گۇلقاديشا نىسانبايەۆا الماتىعا ارنالعان ولەڭدەرىن وقىسا، جەلتوقسان كوتەرىلىسىنىڭ قاھارمانى جۇلدىزاي قاناپيا قىزى مەن كاسىپكەر امينا تولەكوۆا اق تىلەكتەرىن جەتكىزدى.
«ارمانداستار» ءانسامبلى «ساعىندىم الماتىنى»، «جايلاۋكول كەشتەرى» اندەرىن اۋەلەتە شىرقاسا، انسامبل سوليستەرى: اسپەتكۇل ايتجانوۆا، ۆلاديمير ۋمەروۆ، سۆەتلانا توقابايەۆا، النورا مۋردينوۆا اسەم قالامىز تۋرالى تانىمال اندەردى قازاق، ورىس تىلدەرىندە شىرقادى. ءبولىم باسشىسى ق ر مادەنيەت قايراتكەرى عازيزحان ءادىلحانوۆ كەلگەن قوناقتار مەن ونەرپازدارعا ۇلكەن العىسىن ءبىلدىردى. كونسەرتتى ءبولىمنىڭ كوركەمدىك جەتەكشىسى گۇلميرا بوبەشىكوۆا جۇرگىزدى.
