الماتى قالاسى اكىمدىگىنىڭ جۇمىس توبى قالاداعى ماڭىزدى مادەني نىسانداردى ارالاپ، قايتا قۇرۋ جۇمىستارىنىڭ بارىسىمەن تانىستى.
اتاپ ايتقاندا، حالىق ءجيى بارىپ، تاعزىم ەتەتىن، عۇرىپتىق راسىمدەر وتەتىن رايىمبەك باتىردىڭ كەسەنەسى مەن مەموريالدىق كەشەنىن كورىپ شىقتى. ىرگەلەس اۋماقتا رايىمبەك باتىر مۋزەيىن، اكىمشىلىك عيمارات سالۋ مەن بۇكىل اۋماقتى اباتتاندىرۋ جوسپارلانعان. قۇرىلىس بيىل مامىردا باستالىپ، 2026 جىلدىڭ مامىرىندا اياقتالماق.
مەردىگەرلەردىڭ ايتۋىنشا، جەكە ۇيلەر تۇرعىندارىمەن كەلىسۋ كەزىندە بەلگىلى ءبىر قيىندىقتار تۋىنداعان، الايدا بارلىق ماسەلە شەشىلىپ، جۇمىس قارقىندى ءجۇرىپ جاتىر.
«جاڭا مۋزەيدە كەلۋشىلەرگە ادەت-عۇرىپ راسىمدەرىنە قاتىسۋ ءۇشىن بارىنشا قولايلى جاعداي جاسالادى»، – دەدى ولار.
الماتى قالاسى اكىمىنىڭ ورىنباسارى ازامات قالدىبەكوۆ بارلىق جۇمىستىڭ بەلگىلەنگەن مەرزىمدە اياقتالۋى قاجەتتىگىن ايتتى.
سونىمەن قاتار، جۇمىس توبى «الاتاۋ» ءداستۇرلى ونەر تەاترى عيماراتىنىڭ قايتا جاڭعىرتۋ جۇمىسىمەن تانىستى. مەردىگەر ۇيىم وكىلدەرى كۇردەلى جوندەۋ جۇمىستارى تۋرالى اقپارات بەردى. قازىرگى تاڭدا عيماراتتىڭ قاسبەتى جاڭارتىلىپ، اۋماقتى اباتتاندىرۋ، كورەرمەن زالىنداعى ورىندىقتار مەن كىلەمدەردى اۋىستىرۋ قولعا الىنعان. سونداي-اق، عيمارات قۇرىلىمدارى كۇشەيتىلىپ، سەيسميكالىق توزىمدىلىگى بەكيدى، جەلدەتۋ، ينجەنەرلىك جەلىلەر، جىلۋ، ەلەكترمەن جابدىقتاۋ جانە ءورت قاۋىپسىزدىگى جۇيەلەرى اۋىستىرىلادى.
بۇزۋ جۇمىستارى اياقتالعان، ءقازىر عيماراتتى قاپتاۋ مەن ىشكى ارلەۋ جۇمىستارىنا دايىندىق ءجۇرىپ جاتىر. جۇرگىنشىلەر جولىنا توسەلەتىن ماتەريالدار، ىشكى قابىرعالار مەن سىرتقى قاسبەتتەردى قاپتاۋعا قولدانىلاتىن قۇرىلىس زاتتارىنىڭ ساپاسىنا ەرەكشە ءمان بەرىلىپ وتىر.
«جۇمىس كەستەسى تولىق ساقتالادى»، – دەيدى مەردىگەر ۇيىم وكىلدەرى. تەاتردىڭ جوندەۋ جۇمىستارى بيىل جىل سوڭىنا دەيىن اياقتالماق.
سونداي-اق، جۇمىس ساپارى اياسىندا دەلەگاسيا قالاداعى ورتالىق ستاديونعا دا باردى. مۇندا 30 قىركۇيەكتە «قايرات» پەن «رەال» فۋتبول كوماندالارىىڭ ماچى وتەدى. قىزمەت كورسەتۋشى ۇيىم وكىلدەرى سپورت نىسانىنىڭ دايىندىق بارىسى تۋرالى باياندادى: ينجەنەرلىك جەلىلەردى تەكسەرۋ، جارىقتاندىرۋ مەن قاۋىپسىزدىك جۇيەلەرىن جاڭارتۋ، سونىمەن قاتار اۋماقتى اباتتاندىرۋ جۇمىستارى جۇرگىزىلىپ جاتىر.
اكىمنىڭ ورىنباسارى ستاديوننىڭ حالىقارالىق تالاپتارعا ساي جاڭارۋعا ءتيىس ەكەنىن اتادى.