كۇندەلىكتى تاڭعى ساعات 5-تەن باستاپ جۇرگىزىلەتىن ارالاۋ اياسىندا الماتى اكىمىنىڭ ورىنباسارى الماسحان سماتلايەۆ ءبىرقاتار نىسانداعى جۇمىستاردىڭ بارىسىن باقىلاپ، جاۋاپتى قۇرىلىمدارعا ناقتى تاپسىرمالار بەردى.
اكىمنىڭ ورىنباسارى اۋەلى بوستاندىق اۋدانىنداعى ءابىش كەكىلباي ۇلى كوشەسىنەن بوكين كوشەسىنە دەيىنگى كارىز جەلىلەرىن قايتا قۇرۋ جۇمىستارىن كوردى. مۇندا اكىمنىڭ ورىنباسارى قۇرىلىس الاڭىن كورىپ شىعىپ، ماتەريالداردىڭ ساپاسى مەن ينجەنەرلىك كوممۋنيكاسيالاردىڭ جاي-كۇيىن ناقتىلادى. سونىمەن قاتار مەردىگەرگە جۇمىستى جەدەلدەتۋدى تاپسىردى.
سوسىن ول جاروكوۆ جانە دۋنايەۆسكيي كوشەلەرىنىڭ قيىلىسىنداعى جىلۋ جەلىلەرىن قايتا قۇرۋ ۋچاسكەسىن ارالادى. اكىمنىڭ ورىنباسارى بۇل جوبانىڭ تۇرعىن ۇيلەردى سەنىمدى جىلۋمەن قامتۋ ءۇشىن ستراتەگيالىق ماڭىزى بار ەكەنىن اتاپ، جۇمىستى ۋاقىتىلى ورىنداۋدى ءارى تەحنولوگيالىق اقاۋلارعا جول بەرمەۋدى قاتاڭ تاپسىردى.
ا. يمانوۆ اتىنداعى سكۆەردە (مامەتوۆا كوشەسى – جەلتوقسان كوشەسىنىڭ قيىلىسى) الماسحان سماتلايەۆ سانيتارلىق ماقساتتا كەسىلىپ جاتقان اعاشتاردى كورىپ، جاسىل جەلەكتەردىڭ جاي-كۇيىن تەكسەردى. اسىرەسە، قاۋىپسىزدىك ماسەلەسىنە جانە كەسىلگەن بۇتاقتاردى ۋاقىتىلى شىعارۋعا ەرەكشە كوڭىل ءبولىندى.
المالى اۋدانىندا ول ع. مۇسىرەپوۆ اتىنداعى بالالار مەن جاسوسپىرىمدەر تەاترى عيماراتى جانىنداعى سۋبۇرقاقتى كۇردەلى جوندەۋ بارىسىمەن تانىستى. اكىمنىڭ ورىنباسارى بۇل نىساننىڭ قالا تۇرعىندارى مەن قوناقتارى ءۇشىن ماڭىزدى دەمالىس ورنى ەكەنىن اتاپ، ونى قىسقا مەرزىمدە ءارى ساپالى تۇردە اياقتاۋدى مىندەتتەدى.
ساپار سوڭىندا دوستىق داڭعىلى بويىنداعى اباتتاندىرۋ مەن كوگالداندىرۋ جۇمىستارى ءجۇرىپ جاتقان اۋماقتى ارالادى. اكىمنىڭ ورىنباسارى جاياۋ جۇرگىنشىلەر ايماقتارىن ارالاپ، توسەلىپ جاتقان جابىننىڭ ساپاسىن، ينجەنەرلىك شەشىمدەردىڭ دۇرىستىعىن تەكسەردى.
ساپار سوڭىندا الماسحان سماتلايەۆ بارلىق جۇمىستى بەلگىلەنگەن مەرزىمدە اياقتاپ، قاۋىپسىزدىك پەن كوركەيتۋ جۇمىستارىنا ءمان بەرۋدى تاپسىردى. قالاداعى وزگەرىستەر حالىقتىڭ كۇندەلىكتى تۇرمىسىنان انىق بايقالۋعا ءتيىس ەكەنىن اتادى.