الماتى قالاسىنىڭ اكىمى دارحان ساتىبالدى تۇركسىب اۋدانىنا جۇمىس ساپارىمەن بارىپ، ەكولوگيالىق جاعدايدى جاقسارتۋعا جانە قالالىق ينفراقۇرىلىمدى دامىتۋعا باعىتتالعان جوبالاردىڭ جۇزەگە اسىرۋ بارىسىمەن تانىستى.
ساپار كەزىندە ءبىرىنشى نىسان التىنكول كولى بولدى. مۇندا جاقىندا №18 جانە №19 توعانداردى مەحانيكالىق تازالاۋ جۇمىستارى باستالادى. جۇمىستار 26 مىڭ شارشى مەتردەن استام اۋماقتى قامتيدى. كولدىڭ اينالاسى لايدان، قامىس جانە قوقىستان تازارتىلادى. بۇل سۋ قويماسىنىڭ ەكولوگيالىق جاعدايىن قالپىنا كەلتىرۋگە جانە ونىڭ دەمالىس الەۋەتىن ارتتىرۋعا مۇمكىندىك بەرەدى.
بۇدان سوڭ قالا باسشىسى رىسقۇلوۆ داڭعىلىنان اۋەجاي كولىنە دەيىنگى ارالىقتاعى كىشى الماتى وزەنىن قايتا جاڭارتۋ جوباسىمەن تانىستى. جاعالاۋ اۋماعىن كەشەندى اباتتاندىرۋ، كوپىرلەر سالۋ، جاعالاۋلاردى نىعايتۋ جانە وزەن بويىندا زاماناۋي ساياباق ايماعىن قۇرۋ جوسپارلانعان. ديزاين بيىل جىل سوڭىنا دەيىن اياقتالادى.
جوبالاۋ كەزىندە جايلى قالالىق ورتانى تابيعي تەپە-تەڭدىكپەن ۇيلەستىرۋگە باعىتتالعان زاماناۋي قالا قۇرىلىسى تاسىلدەرى قولدانىلىپ جاتىر. اۋماقتا بيولوگيالىق ارتۇرلىلىك جوعارى، ياعني كوپتەگەن قۇس، جاندىك تۇرلەرى جانە وسىمدىكتەر كەزدەسەدى. جوبا اياسىندا ولاردى ساقتاۋ شارالارى قاراستىرىلعان.
بۇدان وزگە، اۋەجاي كولىن مەحانيكالىق تازارتۋ جانە سۋ دەڭگەيى مەن سۋ الماسۋدى رەتكە كەلتىرۋ ءۇشىن شاندور قۇرىلعىلارىن قالپىنا كەلتىرۋ جۇمىستارى جوسپارلانۋى ءتيىس دەگەن تاپسىرما بەرىلدى.
سونداي-اق، قالا اكىمى نۇرشاشقان شاعىناۋدانىنداعى اۋماقتى ارالادى. قالا قۇرىلىسى قۇجاتتاماسىنا سايكەس، بۇل اۋماقتى كوگالداندىرىلعان دەمالىس ايماعىنا اينالدىرۋ جوسپارلانعان.
جوبانى جۇزەگە اسىرۋ 15 تۇرعىن ۇيگە قاتىنايتىن جولدى قامتاماسىز ەتىپ، جاقىن ماڭداعى تۇرعىن ۇيلەردىڭ 7 مىڭنان استام تۇرعىنى ءۇشىن جاسىل ايماقتارعا قولجەتىمدىلىكتى ارتتىرادى.
ساپار قورىتىندىسى بويىنشا دارحان ساتىبالدى سۋ ايدىندارىن تازارتۋ، جاعالاۋ اۋماقتارىن اباتتاندىرۋ، جاڭا قوعامدىق كەڭىستىكتەر قۇرۋ جونىندەگى جەرگىلىكتى باستامالار ءبىرىڭعاي ەكولوگيالىق جانە قالا قۇرىلىسى ساياساتىنىڭ بولىگى رەتىندە ىسكە اسىرىلۋى ءتيىس ەكەنىن اتاپ ءوتتى. قالا تۇرعىندارىنىڭ يگىلىگىنە نەگىزدەلگەن ورنىقتى، جايلى ءارى ءقاۋىپسىز قالالىق ورتا قالىپتاستىرۋعا باسىمدىق بەرىلەدى.