كەشە الماتى اكىمى دارحان ساتىبالدى تۇركسىب اۋدانىنداعى «تاماريكس» تۇرعىن ءۇي كەشەنىنىڭ تۇرعىندارىمەن جۇزدەستى. تۇرعىندار قازاندىقتىڭ جۇمىسى، اۋماقتى جارىقتاندىرۋ جانە باسقارۋشى كومپانيانىڭ قىزمەتىنە قاتىستى ماسەلەلەردى كوتەردى. بۇل تاقىرىپتار بۇعان دەيىن دە ازاماتتاردى جەكە قابىلداۋ كەزىندە قوزعالعان بولاتىن.
جىلۋمەن قامتاماسىز ەتۋ ماسەلەسى بيىلعى قىركۇيەك ايىنىڭ سوڭىنا دەيىن شەشىلەدى. قالانىڭ قۇرىلىس باسقارماسىنىڭ مەردىگەر ۇيىمى «اتكە» جشس-مەن جانە قۇرىلىس كومپانياسىمەن بىرلەسە وتىرىپ، قولدانىستاعى قازاندىقتى قوسىمشا جابدىقتاۋ جۇمىستارىن باستادى.
تۇرعىن ءۇي كەشەنى اۋماعىن جارىقتاندىرۋ بويىنشا دا وڭ شەشىم قابىلداندى. سونداي-اق تۇرعىندار بالالارعا ارناپ فۋتبول الاڭىن سالۋدى ۇسىندى. قالا اكىمى بۇل جوبانى ىسكە اسىرۋ مۇمكىندىگىن قاراستىرۋدى تاپسىردى.
كەزدەسۋ بارىسىندا باسقارۋشى كومپانيانىڭ جۇمىسىنا بايلانىستى شاعىمدار دا ءتۇستى. بارلىق ءوتىنىش زاڭ اياسىندا تىركەلىپ، قارالادى. 15 قىركۇيەكتەن باستاپ «تۇرعىن ءۇي قاتىناستارى تۋرالى» زاڭعا ەنگىزىلگەن وزگەرىستەرگە سايكەس، تۇرعىنداردا باسقارۋشى كومپانيالاردىڭ قىزمەتىن باقىلاۋعا قوسىمشا مۇمكىندىكتەر پايدا بولادى.