جۇڭگو حالىق رەسپۋبليكاسىنا جاساعان جۇمىس ساپارى بارىسىندا الماتى اكىمى دارحان ساتىبالدى شانحايدا ءوتىپ جاتقان حالىقارالىق يمپورتتىق كورمەگە (China International Import Expo، CIIE) باردى، دەپ حابارلايدى aqshamnews.kz
بۇل ءىس-شارا جىل سايىن الەمنىڭ جەتەكشى كومپانيالارىن بىرىكتىرەتىن جانە ساۋدانى، ينۆەستيسيانى ءارى تەحنولوگيالىق ىنتىماقتاستىقتى دامىتۋعا ىقپال ەتەتىن اسا ءىرى حالىقارالىق الاڭداردىڭ ءبىرى سانالادى.
قالا باسشىسى الماتىلىق پاۆيلوننىڭ جۇمىسىمەن تانىستى. مۇندا مەگاپوليستىڭ ەكسپورتتىق جانە ينۆەستيسيالىق الەۋەتىن تانىستىرعان 12 كومپانيا ونىمدەرى مەن جوبالارىن ۇسىندى. الماتىلىق كاسىپورىندار يننوۆاسيا، تەحنولوگيا، تۋريزم، تاماق ونەركاسىبى جانە كرەاتيۆتى يندۋستريا باعىتىنداعى جوبالارىن كورسەتتى.
دارحان ساتىبالدى قازاقستان مەن جۇڭگو اراسىنداعى ەكونوميكالىق ىنتىماقتاستىقتى نىعايتۋعا، سونداي-اق الماتىنىڭ ينۆەستيسيا مەن جوعارى تەحنولوگيا ورتالىعى رەتىندەگى برەندىن ىلگەرىلەتۋگە بۇل كورمەنىڭ ماڭىزى زور ەكەنىن اتاپ ءوتتى.
«الماتى — قازاقستاننىڭ ەڭ ءىرى ەكونوميكالىق ورتالىعى عانا ەمەس، سونىمەن قاتار حالىقارالىق ىسكەرلىك بايلانىستىڭ ماڭىزدى الاڭى. CIIE سياقتى شارالار قالانىڭ الەۋەتىن تانىستىرۋعا جانە ءارتۇرلى ەلدەردەن كەلگەن سەرىكتەستەرمەن تىكەلەي بايلانىس ورناتۋعا مۇمكىندىك بەرەدى»، — دەدى اكىم.
China International Import Expo — جۇڭگو ۇكىمەتىنىڭ حالىقارالىق ساۋدا مەن ينۆەستيسيانى ىنتالاندىرۋعا باعىتتالعان باستى باستامالارىنىڭ ءبىرى. كورمە جاڭا تەحنولوگيالىق شەشىمدەردى ۇسىنۋعا، تاجىريبە الماسۋعا جانە ىسكەرلىك كەلىسىمدەر جاساۋعا ارنالعان امبەباپ پلاتفورما رەتىندە قىزمەت ەتەدى.
الماتى مەن قازاقستاندىق كومپانيالاردىڭ CIIE الاڭىنا قاتىسۋى جۇڭگو ايماقتارىمەن جانە ينۆەستورلارىمەن ىنتىماقتاستىقتى نىعايتۋعا، سونداي-اق ەكى ەل اراسىنداعى مادەني-ەكونوميكالىق بايلانىستى دامىتۋعا ىقپال ەتەدى.