الماتى قالاسىنىڭ اكىمى دارحان ساتىبالدى مەگاپوليستىڭ سۋمەن جابدىقتاۋ جۇيەسىن دامىتۋ جانە جاڭعىرتۋعا باعىتتالعان ينجەنەرلىك ينفراقۇرىلىمنىڭ ماڭىزدى نىساندارىن ارالادى.
جۇمىس ساپارى بارىسىندا قالا باسشىسى سالىنىپ جاتقان ءبىرقاتار قۇرىلىس نىساندارىندا بولدى، ولار نەگىزگى سۋ تازارتۋ قۇرىلعىلارى، اقساي وزەنىندەگى سۋ قويماسى، نۇرلىتاۋ شاعىن اۋدانىنداعى سۋ جيناقتاۋ كەشەنى، سونداي-اق نۇر الاتاۋ شاعىن اۋدانىنداعى رەزەرۆتىك گيدروتەحنيكالىق قۇرىلعى.
العاشقى نىسان 1948 جىلى سالىنعان، كەيىن 2015 جىلى سوڭعى رەت رەكونسترۋكسيالانعان باستى سۋ تازارتۋ قۇرىلعىلارى بولدى. بۇگىندە بۇل نىسان الماتى حالقىنىڭ شامامەن 20%-ىن، ونىڭ ىشىندە بوستاندىق اۋدانى مەن المالى، مەدەۋ جانە اۋەزوۆ اۋداندارىنىڭ كەي بولىكتەرىن سۋمەن قامتاماسىز ەتىپ وتىر. اكىمنىڭ ايتۋىنشا، مۇنداي ستانسيالاردىڭ تۇراقتى جۇمىسى قالا تۇرعىندارىنىڭ دەنساۋلىعى مەن قاۋىپسىزدىگىنە تىكەلەي اسەر ەتەدى.
كەلەسى نىسان – ناۋرىزباي اۋدانىنىڭ تاۋجولى شاعىناۋدانىنداعى سۋ تارتۋ ستانسياسىنىڭ قۇرىلىسى. قۇرىلىس-مونتاج جۇمىستارى 2025 جىلدىڭ قاراشاسىندا اياقتالادى دەپ جوسپارلانعان. جوبا ناۋرىزباي جانە ءىشىنارا قاراساي اۋداندارىنىڭ 100 مىڭنان استام تۇرعىنىن ساپالى اۋىز سۋمەن قامتاماسىز ەتۋگە مۇمكىندىك بەرەدى.
«سۋ – ءومىردىڭ كوزى! سوندىقتان مۇنداي جوبالار ۋاقىتىندا اياقتالىپ، بارلىق ستاندارتتارعا ساي بولۋى كەرەك»، – دەپ اتاپ ءوتتى دارحان ساتىبالدى.
نۇرلىتاۋ شاعىناۋدانىندا سۋ دايىنداۋ كەشەنى مەن سۋ قىسىمىن ارتتىرۋعا ارنالعان سورعى ستانسياسىنىڭ قۇرىلىسى ءجۇرىپ جاتىر. بۇل جوبا نۇر الاتاۋ، ەرمەنساي، رەميزوۆكا، اقتوبە جانە باسقا دا شاعىناۋدانداردىڭ 45 مىڭنان استام تۇرعىنىن سۋمەن قامتۋدى جاقسارتۋعا باعىتتالعان. اكىم جۇمىس قارقىنىن كۇشەيتىپ، نىساندى 2026 جىلدىڭ جاز ماۋسىمىنىڭ سوڭىنا دەيىن اياقتاۋدى تاپسىردى.
«سۋمەن قامتاماسىز ەتۋ – ەرەكشە باقىلاۋدا. قالا ءوسىپ كەلەدى، سوندىقتان الماتىنىڭ اۋقىمىنا ساي قوسىمشا قۋات كوزدەرى قاجەت»، – دەدى اكىم.
جۇمىس ساپارىنىڭ سوڭىندا قالا باسشىسى نۇر الاتاۋ شاعىناۋدانىندا سالىنىپ جاتقان رەزەرۆتىك گيدروتەحنيكالىق نىساندا بولدى. بۇل جوبا قالانىڭ سۋمەن جابدىقتاۋ جۇيەسىنىڭ شارىقتاۋ كەزەڭدەرىندەگى تۇراقتىلىعىن ارتتىرىپ، بۇكىل ينفراقۇرىلىمنىڭ سەنىمدى جۇمىسىن قامتاماسىز ەتۋگە باعىتتالعان.