الماتى اكىمى ەربولات دوسايەۆتىڭ قالا تۇرعىندارىمەن كەزەكتى كەزدەسۋى ناۋرىزباي اۋدانىندا ءوتتى. قالا باسشىسى اۋداننىڭ دامۋى جانە وتكەن جىلى تۇرعىنداردان تۇسكەن ۇسىنىستار بويىنشا اتقارىلعان جۇمىستار تۋرالى ايتىپ بەردى. كەزدەسۋگە 350-دەن استام ادام كەلدى، دەپ حابارلايدى اlmaty-akshamy.kz.
قارقىندى دامىپ كەلە جاتقان ناۋرىزباي اۋدانى ءۇشىن جول جانە الەۋمەتتىك ينفراقۇرىلىمدى، ينجەنەرلىك كوممۋنيكاسيالاردى، ءبىرىنشى كەزەكتە سۋمەن جابدىقتاۋدى، كارىزدى جانە ەلەكتر جەلىلەرىن دامىتۋ ماسەلەلەرى بارىنشا وزەكتى بولىپ تابىلادى.
وتكەن جىلى اۋداندا شامامەن 85 شاقىرىم سۋمەن جابدىقتاۋ جانە كارىز جەلىلەرى سالىندى. اعىمداعى جىلى تۇرعىنداردى ساپالى جانە سۋمەن تۇراقتى قامتاماسىز ەتۋ بويىنشا جۇمىستار جالعاسادى: 19،9 شاقىرىم جەلى سالىنۋدا، 335 شاقىرىم جەلىنىڭ قۇرىلىسىن جوبالاۋ جوسپارلانۋدا. "اقجار" جانە "قاراعايلى" شاعىناۋداندارى بويىنشا جسق مەملەكەتتىك ساراپتاماعا جىبەرىلدى. قارعالى وزەنىندە سۋ قويماسىنىڭ قۇرىلىسى اياقتالىپ، اقساي وزەنىندە سۋ قويماسىنىڭ قۇرىلىسى جالعاسادى. ناتيجەسىندە، 2025 جىلدىڭ سوڭىنا دەيىن ناۋرىزباي اۋدانىن ساپالى سۋمەن تۇراقتى قامتاماسىز ەتۋ ماسەلەسى شەشىلەتىن بولادى.
اۋدان تۇرعىندارىن تۇراقتى ەلەكترمەن قامتاماسىز ەتۋ ءۇشىن ەلەكتر جەلىلەرىن جاڭعىرتۋ جالعاسۋدا. وسىلايشا، 2022 جىلى 79 ترانسفورماتورلىق قوسالقى ستانسيا جوندەلىپ، 3،8 كم ەلەكتر جەلىلەرى رەكونسترۋكسيالاندى. اعىمداعى جىلى تاعى 35 ترانسفورماتورلىق قوسالقى ستانسيا مەن 84 كم ەلەكتر جەلىلەرىن، ونىڭ ىشىندە "اقجار"، "قالقامان-2"، "قاراعايلى"، "قۇرامىس" جانە "تاۋسامالى" شاعىناۋداندارىنداعى جەلىلەردى جوندەۋ جوسپارلانعان.
اۋداننىڭ جول-كولىك ينفراقۇرىلىمىن دامىتۋ ماسەلەسى وزەكتى بولىپ قالۋدا. 2022 جىلى 4 جاڭا باعىت اشىلىپ، قولدانىستاعى 4 قوعامدىق كولىك باعىتى ۇزارتىلدى. 13 باعىتتاعى جىلجىمالى سوستاۆ (173 اۆتوبۋس) جاڭارتىلدى، 12 ايالداما كەشەنى جابدىقتالدى. 10 شاقىرىم جول جانە 8 كم جاياۋ جۇرگىنشىلەر تروتۋارلارى سالىندى، 23 شاقىرىم جول جابىنىنا ورتاشا جوندەۋ جۇرگىزىلدى.
اعىمداعى جىلى "اقجار" جانە "شۇعىلا" شاعىناۋداندارىنداعى 20 كوشە بويىنشا 16،4 كم جول سالىنادى. 21 شاقىرىم جولعا ورتاشا جوندەۋ جۇرگىزىلدى. اۆتوبۋس پاركىن جاڭارتۋ، ايالداما كەشەندەرىن سالۋ جالعاسادى.
جىل سوڭىنا دەيىن اباي داڭعىلىن قالا شەكاراسىنا دەيىن ۇزارتۋدى اياقتاۋ جوسپارلانۋدا. سونداي-اق، جۇبانوۆ كوشەسىن مومىش ۇلى كوشەسىنەن قالا شەكاراسىنا دەيىن ۇزارتۋ جوباسى بويىنشا مەملەكەتتىك ساراپتاما قورىتىندىسى كۇتىلۋدە.
ناۋرىزباي اۋدانىنداعى باستى ماسەلە – وقۋشى ورىندارىنىڭ تاپشىلىعىن تومەندەتۋ. وتكەن جىلى "قالقامان" مەن "شۇعىلا" شاعىناۋداندارىندا 5100 ورىندىق 4 مەكتەپ اشىلدى. اۋداندا تۇرعىن ءۇي سالۋ قارقىنىن ەسكەرە وتىرىپ، تاعى 6 مەكتەپتى جوبالاۋ جانە سالۋ جۇمىستارى جۇرگىزىلۋدە.
مەديسينالىق قىزمەت كورسەتۋدىڭ قادامدىق قولجەتىمدىلىگىن قامتاماسىز ەتۋ جانە اۋداندا ەمحانالار تاپشىلىعى پروبلەماسىن شەشۋ ءۇشىن "قۇرامىس" جانە "شۇعىلا" شاعىناۋداندارىندا 500 ادام قابىلدايتىن 2 جاڭا ەمحانا، 1 دارىگەرلىك امبۋلاتوريا سالۋ جوسپارلانۋدا.
سىرتقى جارىقتاندىرۋ بويىنشا ۇلكەن جۇمىس جۇرگىزىلۋدە. 2022 جىلى اۋداننىڭ 10 ۋچاسكەسىندە جۇمىستار ورىندالدى. اقپان ايىنىڭ سوڭىنا دەيىن تاعى ءبىر ۋچاسكەدە – كەنەسارى كوشەسىندە جۇمىستار اياقتالادى.
تۇرعىنداردىڭ كوپتەگەن وتىنىشتەرىنە بايلانىستى اۋداننىڭ باۋ-باقشا سەرىكتەستىكتەرىندە ورنالاسقان 50 كوشەدە (34 كم) سىرتقى جارىقتاندىرۋدى قوسىمشا جۇرگىزۋ جوسپارلانۋدا. جۇمىستاردى «حالىق قاتىساتىن بيۋدجەت» باعدارلاماسى اياسىندا جۇرگىزۋ جوسپارلانۋدا.
وتكەن جىلى قالا اكىمىنىڭ تاپسىرماسى بويىنشا اۋدان ءۇشىن «حالىق قاتىساتىن بيۋدجەت» باعدارلاماسىنا ليميتتەر 500 ملن تەڭگەگە ۇلعايتىلدى. وسى باعدارلاما اياسىندا 2022 جىلى 1،8 ملرد. تەڭگە سوماسىنا 47 جوبا ىسكە اسىرىلدى. قوعامدىق كەڭىستىكتەردىڭ 21 ۋچاسكەسى جانە جول ينفراقۇرىلىمى بويىنشا 26 جوبا اباتتاندىرىلدى. اعىمداعى جىلى وسىنداي سوماعا 46 جوبانى ىسكە اسىرۋ جوسپارلانۋدا.
الماتى اكىمىمەن كەزدەسۋ بارىسىندا اۋدان تۇرعىندارى جولداردى جوندەۋ، كارىز جانە ەلەكتر جەلىلەرىن جاڭعىرتۋ، ت.ب. ماسەلەلەردى كوتەردى.