تۇركيا رەسپۋبليكاسىنىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى مۇستافا كاپۋدجۋدىڭ الماتى قالاسىنا العاشقى ساپارى كەزىندە ەكونوميكالىق، ساۋدا جانە ينۆەستيسيالىق سالالارداعى ىنتىماقتاستىق ماسەلەلەرى تالقىلاندى، دەپ حابارلايدى almaty-akshamy.kz
الماتى اكىمى ەربولات دوسايەۆ اتاپ وتكەندەي، قازىرگى ۋاقىتتا قالادا تۇرىك كاپيتالىنىڭ قاتىسۋىمەن ءبىرقاتار جوبالار تابىستى جۇمىس ىستەۋدە. TAV Airports حولدينگى الماتى حالىقارالىق اۋەجايىنىڭ جاڭا تەرمينالىن سالۋ بويىنشا جۇمىستى باستادى، ول اۋە ايلاعىنىڭ وتكىزۋ قابىلەتىن جىلىنا 14 ملن جولاۋشىعا دەيىن ەكى ەسەگە ارتتىرادى. Iskefe Holding حالىقارالىق كونسەرنى جەلاتين وندىرەتىن زاۋىتتىڭ قۇرىلىسىن جۇرگىزۋدە. Celkonsan Stroy ج ش س مەتالل توسقاۋىل قورشاۋلارىن، كوپىرلەر مەن جول توپتارىنا ارنالعان قورشاۋلاردى ءوندىرۋ جوباسىن ىسكە اسىرۋدا. باسقا دا ماڭىزدى بىرلەسكەن جوبالاردىڭ قاتارىنا Nobel Pharmaceuticals فارماسيەۆتيكالىق ءوندىرىسى («نوبەل افف» اق)، پانەلدەر، توڭازىتقىش جانە مۇزداتقىش كامەرالار شىعاراتىن Akay Trade ج ش س، Orhun Medical ج ش س دياگنوستيكالاۋ جانە ەمدەۋ ءۇشىن مەديسينالىق ورتالىقتار جەلىسى، ت.ب. كىرەدى.
قالا باسشىسىنىڭ ايتۋىنشا، تۇرىك كاسىپورىندارى ۇزاق مەرزىمدى جوسپارلار قۇرىپ، ءوز قىزمەتىن كەڭەيتۋ مۇمكىندىكتەرىن ىزدەيدى. تۇركيادان كاپيتال تارتۋ قالا ەكونوميكاسىنىڭ دامۋىنا قۋاتتى سەرپىن بەرەدى.
ەڭ ءىرى ينۆەستيسيالىق جوبالار الماتىنىڭ يندۋستريالىق ايماعىندا جانە «يننوۆاسيالىق تەحنولوگيالار پاركى» ارنايى ەكونوميكالىق ايماعىندا ىسكە اسىرىلۋدا، وندا كومپانيالارعا ينجەنەرلىك ينفراقۇرىلىمعا قولجەتىمدىلىك بەرىلدى، بيزنەستى جۇرگىزۋ ءۇشىن جەڭىلدىكتى جاعدايلار ەنگىزىلگەن.
تۇركيا ەڭ ءىرى 10 ينۆەستوردىڭ قاتارىنا كىرەدى: 2005 جىلدان باستاپ شامامەن 1،2 ملرد اقش دوللارى تارتىلدى (ق ر بويىنشا تىكەلەي شەتەلدىك ينۆەستيسيالار كولەمى 4،6 ملرد اقش دوللارىن قۇرادى). قازاقستاندا تۇرىك كاپيتالى بار بارلىق كاسىپورىنداردىڭ جارتىسىنان كوبى الماتىدا ورنالاسقان – 2302 (قازاقستاندا – 4280). 2022 جىلى الماتى قالاسى مەن تۇركيا رەسپۋبليكاسى اراسىنداعى تاۋار اينالىمى شامامەن 1 ملرد اقش دوللارىن (977 ملن اقش دوللارىنان استام) قۇرادى، بۇل وتكەن جىلمەن سالىستىرعاندا 64%-عا ارتىق (2021 جىلى – 596 ملن).
تاراپتار الماتى مەن تۇركيا اراسىنداعى ىنتىماقتاستىق ءبىزدىڭ حالىقتارىمىزدىڭ تىعىز باۋىرلاستىعىنا نەگىزدەلگەن كەڭەيتىلگەن ستراتەگيالىق ارىپتەستىك رۋحىندا دامىپ كەلە جاتقانىن اتاپ ءوتتى. كەزدەسۋ قورىتىندىسى بويىنشا سەرىكتەستىكتى ودان ءارى نىعايتۋ تۋرالى ۋاعدالاستىقتارعا قول جەتكىزىلدى.