اتى اڭىزعا اينالعان وپەرا ءانشىسى بيبىگۇل تولەگەنوۆا 95 جىلدىعىن اتاپ وتۋدە
16 جەلتوقساندا اتى اڭىزعا اينالعان وپەرا ءانشىسى، اكتريسا، پەداگوگ بيبىگۇل تولەگەنوۆا تۋعان كۇنىن اتاپ وتەدى. بيىل كسرو حالىق ءارتىسى، «وتان» وردەنىنىڭ يەگەرى، الماتى قالاسىنىڭ قۇرمەتتى ازاماتى جانە اكادەميك 95 جاسقا تولىپ وتىر.
بيبىگۇل احمەتقىزىن وسىنداي ايتۋلى كۇنمەن قۇتتىقتاۋعا الماتى اكىمى ەربولات دوسايەۆ كەلدى. ول قازاقستان پرەزيدەنتى قاسىم-جومارت توقايەۆتىڭ اتىنان قۇتتىقتاۋ حاتتى وقىدى. حاتتا ۇلتتىق مادەنيەتتىڭ دامۋىنا زور ۇلەس قوسقان كورنەكتى ونەر قايراتكەرىنىڭ ەڭبەگى ەرەكشە اتالىپ وتىلگەن.
«ۇزاق جىلعى جەمىستى شىعارماشىلىق جولىڭىز ءسىزدى ابىروي بيىگىنە كوتەردى. ەلىمىزدىڭ التىن قورىنا مول مۇرا قالدىردىڭىز. ونەگەلى دە ونەرلى شاكىرتتەر تاربيەلەپ شىعاردىڭىز. ەرەن ەڭبەگىڭىزدىڭ جوعارى مەملەكەتتىك ناگرادالارمەن، مارتەبەلى اتاقتارمەن جانە ايرىقشا سىيلىقتارمەن اتالىپ ءوتۋى - زور مەرەي»، - دەلىنگەن مەملەكەت باسشىسىنىڭ قۇتتىقتاۋىندا.
ءوز كەزەگىندە بيبىگۇل احمەت قىزى جىلى لەبىزدەر ءۇشىن العىسىن ءبىلدىرىپ، بارشا قازاقستاندىقتاردى تاۋەلسىزدىك كۇنىمەن قۇتتىقتادى.
21 جەلتوقسان كۇنى ساعات 15:00-دە رەسپۋبليكا سارايىندا بيبىگۇل تولەگەنوۆانىڭ 95 جىلدىعىنا ارنالعان سالتاناتتى كونسەرت وتەدى. باعدارلامادا بيبىگۇل احمەت قىزىنىڭ شىعارماشىلىعىنان شابىت العان جانە وزدەرى دە جەتەكشى جۇلدىزعا اينالعان كورنەكتى ارتىستەردىڭ ورىنداۋىنداعى كلاسسيكالىق جانە قازاق مۋزىكاسىنىڭ ۇلى تۋىندىلارى ورىندالادى.