كەزدەسۋگە 40-تان استام كوپ بالالى انا، ازاماتتىق بەلسەندىلەر، حالىقتىڭ الەۋمەتتىك وسال توپتارىمەن جۇمىس ىستەيتىن ۇكىمەتتىك ەمەس ۇيىمداردىڭ (ۇەۇ) باسشىلارى شاقىرىلدى
تالقىلاۋ بارىسىندا مەكتەپكە دەيىنگى ساپالى جانە ورتا ءبىلىم الۋعا، مەديسينالىق قىزمەتتەرگە، جەڭىلدەتىلگەن يپوتەكالىق نەسيەلەندىرۋگە قولجەتكىزۋ، كوپ بالالى وتباسىلارمەن جانە ەرەكشە قاجەتتىلىكتەرى بار بالالارمەن جۇمىس ىستەيتىن ۇەۇ اراسىندا مەملەكەتتىك الەۋمەتتىك تاپسىرىستى ورنالاستىرۋدىڭ تيىمدىلىگى ماسەلەلەرى جانە باسقالارى تالقىلاندى، دەپ حابارلايدى Almaty-akshamy.kz
كەزدەسۋگە قاتىسۋشىلار كوپ بالالى انالارعا اتاۋلى الەۋمەتتىك كومەك تاعايىنداۋ، ونى الەۋمەتتىك مارتەبەسىنە قاراماستان، اعىمداعى پراكتيكادا ءبىرىڭعاي جاردەماقىعا اۋىستىرۋ ماسەلەسىنە جەكە توقتالدى. قالا اكىمى كوپ بالالى انالاردىڭ ۇسىنىستارىن قاراۋعا جانە ودان ءارى ەڭبەك جانە حالىقتى الەۋمەتتىك قورعاۋ مينيسترلىگىمەن تالقىلاۋعا ۋادە بەردى.
ديالوگ بارىسىندا وتكىر تاقىرىپتاردىڭ ءبىرى، بالالاردى الەۋمەتتىك مارتەبەسىنە قاراماستان، ىستىق تاماقپەن قامتاماسىز ەتۋ جانە راسيوننىڭ ءوزىنىڭ ساپاسىن ارتتىرۋ بولدى. وسى ۇسىنىسقا جاۋاپ رەتىندە ەربولات دوسايەۆ، مەملەكەت باسشىسىنىڭ تاپسىرماسىنا سايكەس، بالالار جىلى اياسىندا اكىمدىك قاجەتتى جۇمىس جۇرگىزگەنىن، رەسۋرستار تاپقانىن جانە 2022 جىلدىڭ 1 قىركۇيەگىنەن باستاپ الماتى مەملەكەتتىك مەكتەپتەرىنىڭ بارلىق باستاۋىش سىنىپ وقۋشىلارى (1-4 سىنىپتار) الەۋمەتتىك مارتەبەسىنە قاراماستان تەگىن ىستىق تاماقپەن قامتاماسىز ەتىلەتىنىن حابارلادى.
«بالالاردىڭ ساپالى تاماقتانۋىن ۇيىمداستىرۋ ءۇشىن ءبىلىم باسقارماسى تەڭگەرىمدى جانە ءارتۇرلى راسيوندى قۇرۋ ماسەلەسىن پىسىقتادى. قارجىلاندىرۋ ماسەلەسى جەرگىلىكتى بيۋدجەتتى ناقتىلاۋ شەڭبەرىندە 4 ناۋرىزدا ءماسليحاتتا قارالادى»، - دەدى ەربولات دوسايەۆ.
وقۋشىلار ورىندارىنىڭ جەتىسپەۋشىلىگى جانە بالاباقشالارعا كەزەك تاقىرىبى ەرەكشە پىكىرتالاس تۋدىردى. بۇگىندە قالادا مەكتەپتەردە 19 611 ورىن جانە بالاباقشالاردا 41 080 ورىن جەتىسپەيدى. بالا تۋۋدىڭ جوعارى بولۋىنا جانە حالىقتىڭ مەگاپوليسكە بەلسەندى كوشۋىنە بايلانىستى جىل سايىنعى ءوسىم تيىسىنشە 15 مىڭ جانە 8 مىڭ بالانى قۇرايدى.
«الماتىدا مەكتەپتەر مەن بالاباقشالاردى سالۋعا بوس جەرلەر مۇلدەم جەتىسپەيدى، ال قۇرىلىس قارقىنى تەك جىل سايىنعى ءوسىمدى جابۋعا مۇمكىندىك بەرەدى»، – دەپ اتاپ ءوتتى قالا باسشىسى.
الماتى اكىمى بيىل مەكتەپتەردە 15 461 ورىنعا جانە بالاباقشالاردا 39 520 ورىنعا دەيىن تاپشىلىقتى تومەندەتۋ كۇتىلەتىنىن اتاپ ءوتتى. تاياۋ ۋاقىتتا اكىمدىك جيناقتالعان ماسەلەلەردى شەشۋدى جەدەلدەتۋ ءۇشىن قوسىمشا شارالار ازىرلەپ، ۇسىناتىن بولادى.
تالقىلاۋدىڭ جەكە بلوگى ەرەكشە قاجەتتىلىكتەرى بار بالالارمەن جۇمىس ىستەۋگە، مۇگەدەكتىكتى ەرتە انىقتاۋ پروبلەمالارىنا جانە سونىڭ سالدارىنان بالالاردى ودان ءارى الەۋمەتتەندىرۋدىڭ مۇمكىن ەمەستىگى مەن تيىمسىزدىگىنە ارنالدى.
«بالاباقشالار مەن مەكتەپتەردە بالالاردى وڭالتۋ، ەمدەۋ، ينكليۋزيۆتى قولداۋ – بۇل اكىمدىكتىڭ الەۋمەتتىك بلوك باسقارمالارى جۇمىسىنىڭ نەگىزگى مىندەتتەرى. بالالاردى ينكليۋزيۆتى دامىتۋدىڭ اعىمداعى باعدارلاماسى قايتا قارالاتىن بولادى، سوندىقتان مەن وسى جۇمىسقا قالانىڭ مۇددەلى قوعامدىق قورلارى مەن ۇەۇ بەلسەندى قاتىسۋعا شاقىرامىن»، – دەپ اتاپ ءوتتى مەگاپوليس باسشىسى.
كەزدەسۋ اشىق ديالوگ فورماتىندا ءوتتى جانە 2،5 ساعاتتان استام ۋاقىتقا سوزىلدى، بارلىق قاتىسۋشىلاردىڭ ۇسىنىستارى مەن ەسكەرتۋلەرى تىڭدالدى. الماتى اكىمى ناقتى ديالوگقا دايىن ەكەنىن راستادى.
