الماتى اكىمى ەربولات دوسايەۆ تۇركسىب اۋدانىنداعى Samal Water زاۋىتىندا بولىپ، قايتا قۇرۋ ناتيجەلەرىمەن جانە ءوندىرىستى ودان ءارى كەڭەيتۋ جوسپارلارىمەن تانىستى، دەپ حابارلايدى aqshamnews.kz
«بيزنەس پارك ناۆيگاتور» ج ش س زاۋىتى اۋىز سۋدى وندىرۋگە، جەتكىزۋگە جانە ساتۋعا ماماندانعان. كاسىپورىندى قايتا قۇرۋ 2024 جىلى اياقتالدى جانە ينجەنەرلىك كوممۋنيكاسيالاردى اۋىستىرۋدى، اۋىز سۋ وندىرۋگە ارنالعان زاماناۋي جابدىقتاردى ورناتۋدى، ىرگەلەس اۋماقتى اباتتاندىرۋدى (اسفالتتاۋ، جارىقتاندىرۋ، كوگالداندىرۋ) قامتيدى.
ينۆەستيسيالاردىڭ جالپى كولەمى 12،4 ملرد تەڭگەنى، قوسىمشا ينۆەستيسيالار 5،7 ملرد تەڭگەنى قۇرايدى. زاۋىتتا 336 تۇراقتى جۇمىس ورنى قۇرىلدى، جىل سايىنعى سالىق اۋدارىمدارى 215 ملن تەڭگەنى قۇرايدى، جاڭعىرتۋ اياقتالعاننان كەيىن 282 ملن تەڭگەگە دەيىن ۇلعايتىلادى. زاۋىت جوسپارىندا ءوندىرىس كولەمىن ۇلعايتۋ عانا ەمەس، سونىمەن قاتار رەسەيگە، قىتايعا، قىرعىزستانعا جانە وزبەكستانعا ەكسپورتتى قوسا العاندا، حالىقارالىق نارىقتارداعى پوزيسيالاردى نىعايتۋ بار.
زاۋىت اۋماعىندا سۋدىڭ جوعارى ساپاسىن قامتاماسىز ەتەتىن تەرەڭدىگى 250 مەتر بولاتىن ەكى ارتەزيان ۇڭعىماسى جانە ءونىمدى جەتكىزۋگە ارنالعان 15 ۇزىن ولشەمدى جۇك كولىگى مەن 125 جۇك كولىگىن قامتيتىن جەكە اۆتوپارك بار. كاسىپورىندا ەكى وندىرىستىك جەلى ورناتىلعان: كولەمى 0،25-تەن 2 ليترگە دەيىن جانە كولەمى 6 ليترگە دەيىنگى پەت-بوتەلكەلەرگە سۋ قۇيۋ.
جاڭعىرتۋدىڭ كەلەسى كەزەڭى شەڭبەرىندە 2024-2025 جىلدارى شىنى بوتەلكەلەرگە سۋ قۇيۋدىڭ جاڭا جەلىسىن ورناتۋ، دامدىك سۋسىندار جەلىسىن ىسكە قوسۋ، وندىرىستىك قۋاتتىلىقتى ايىنا 15 ملن ليترگە دەيىن ۇلعايتۋ جوسپارلانۋدا.
ەربولات دوسايەۆ زاۋىت جوباسى الماتىنىڭ وندىرىستىك سەكتورىنا ەكونوميكالىق وسۋگە، جاڭا جۇمىس ورىندارىن قۇرۋعا جانە قالانىڭ ەكسپورتتىق الەۋەتىن كەڭەيتۋگە ىقپال ەتەتىن تابىستى ينۆەستيسيالاردىڭ ماڭىزدى ۇلگىسى بولىپ تابىلاتىنىن اتاپ ءوتتى.