مەگاپوليس تۇرعىندارى ءداستۇر بويىنشا قىركۇيەكتىڭ ءۇشىنشى جەكسەنبىسىندە قالا كۇنىن اتاپ وتەدى. الماتىنىڭ ءار جەرىندە مەرەكەلىك ءىس-شارالار – كونسەرتتەر، كورمەلەر، فلەشموبتار، فەستيۆالدەر جانە باسقا دا كوپتەگەن شارالار ءوتىپ جاتىر.
مەرەكەلىك ءىس-شارالار اباي الاڭىندا وتكەن «الماتى – ءبىزدىڭ ورتاق ءۇيىمىز» اتتى وتباسىلىق فەستيۆالدەن باستالىپ، قالا اكىمى ەربولات دوسايەۆ الماتىلىقتاردى قۇتتىقتادى.
«الماتى ءارقاشان الدىڭعى شەپتە بولىپ، وڭ وزگەرىستەردىڭ جارقىن ۇلگىسى بولۋى كەرەك، بۇعان بار كۇشىمىزدى، ءبىلىمىمىزدى جانە تاجىريبەمىزدى جۇمسايمىز. الماتىنى ءاربىر ادام ءوز ۇيىندەي سەزىنەتىن جايلى ءارى ءقاۋىپسىز قالاعا اينالدىرۋ – ءبىزدىڭ قولىمىزدا»، – دەدى مەگاپوليس باسشىسى.
قالا باسشىسى ءداستۇر بويىنشا قالانى دامىتۋعا ۇلەس قوسقان ازاماتتاردى «الماتى قالاسىنىڭ قۇرمەتتى ازاماتى» اتاعىمەن ماراپاتتادى. ولاردىڭ قاتارىندا كوزى ناشار كورەتىن سۋرەتشى الەكسەي ۋتكين، كەسكىندەمەشى ەربولات تولەپباي، كومپوزيتور ەرۇلان قانافيانوۆ، اقىن ۇلىقبەك ەسداۋلەت، تەحنيكا عىلىمدارىنىڭ دوكتورى جۇماباي بايناتوۆ، اقساقالدار كەڭەسىنىڭ ءتوراعاسى احمەتجان شاردينوۆ، پەريناتولوگيا جانە بالالار كارديوحيرۋرگياسى ورتالىعىنىڭ ديرەكتورى گۇلنار نۇرلانوۆا، قۇرمەتتى ۇشقىش دميتريي دۋشيموۆ جانە كاسىپكەر، مەسەنات نۇرلان سماعۇلوۆ بار.
سونىمەن قاتار، قۇرمەتتى اتاق مەملەكەتتىك قۋىرشاق تەاترىنا بەرىلدى.
ماراپاتتان كەيىن قالا اكىمى الاڭداعى بالالار بەلسەندىلىك ايماقتارىن ارالاپ، تۇرعىندارمەن سويلەستى. ءىس-شارا «الماتى اۋەندەرى» شىعارماشىلىق ۇجىمدارى مەن سوليستەرىنىڭ قاتىسۋىمەن وتكەن مەرەكەلىك كونسەرتكە ۇلاستى.
ەستەرىڭىزگە سالا كەتەيىك، اباي الاڭىندا بۇگىن كۇندىز بالالار ءۇشىن انيماتورلاردىڭ ويىن-ساۋىق شوۋى جانە مەديا تۇلعالاردىڭ قاتىسۋىمەن وتباسىلىق ءسان كورسەتىلىمى وتەدى.
كەشكى 18:00-دە رەسپۋبليكا سارايىنىڭ الدىندا الماتىلىقتاردى مەملەكەتتىك قۋىرشاق تەاترىنىڭ «قۋىرشاق شوۋى» قويىلىمى مەن تيكتوك جۇلدىزدارى YOLO HOUSE، BIP HOUSE جانە باسقا دا تانىمال الماتىلىقتاردىڭ قاتىسۋىمەن كونسەرت وتەدى.
سونىمەن قاتار، تۇڭعىش پرەزيدەنت ساياباعىندا ساعات 10:00-دە كوپشىلىككە تانىمال بولعان Apple Fest فەستيۆالى باستالدى. فەستيۆالدە 21:00-گە دەيىن جالعاساتىن كەڭ اۋقىمدى مادەني جانە كونسەرتتىك باعدارلاما بار.
تۇڭعىش پرەزيدەنت ساياباعىندا بىرنەشە ساحنا قويىلعان. باستى ساحنادا 14:30-دا روزا رىمبايەۆا مەن الماتى قالاسى اكىمى ەسترادالىق-سيمفونيالىق وركەسترىنىڭ ونەر كورسەتۋى جوسپارلانعان. كونسەرتتى Steppe Sons ەتنوتوبى، Umberto Project، «مۋزارت Life» توبى جانە باسقا دا تانىمال ارتيستەر جالعاستىرادى. كەشتىڭ باستى حەدلاينەرلەرى Hiro مەن Captown.
كەلۋشىلەرگە ىڭعايلى بولۋ ءۇشىن ساياباق اۋماعى بىرنەشە تاقىرىپتىق ايماققا بولىنگەن، ءاربىر ايماقتا الما جارمەڭكەسى، ەلشىلىك اللەياسى، باقشا يننوۆاسيالارى الاڭى، گۇلدەر عاجايىپ بۋلۆارى، ءدام ساياحاتى كوشەسى، قولونەر شەبەرلەر كوشەسى، ۇلى دالا مادەنيەتى داڭعىلى، بالالارعا ارنالعان ويىن-ساۋىق الاڭدارى، «كىتاپ وقيعالارى» كۆەستى جانە اشىق اسپان استىنداعى كينوتەاتر ورنالاسقان، مۇندا قازاق كينوسىنىڭ «التىن قورىنا» ەنگەن فيلمدەر كورسەتىلەدى.
ايتا كەتەيىك، فەستيۆال تاريحىندا العاش رەت 1 700 ليتر الما كومپوتى قايناتىلىپ، بۇل گيننەستىڭ رەكوردتار كىتابىنا ەنەدى. كومپوتتى ساتۋدان تۇسكەن قاراجات كوشەتتەر، قۇستارعا ارنالعان قورەكتەندىرگىشتەر جانە قالالىق ساياباقتارعا ارنالعان ۇيالار ساتىپ الۋعا جۇمسالادى.
سيرك ونەرىن سۇيەتىندەر ءۇشىن 12:00-دەن 17:00-گە دەيىن شاپيتو سيركى جۇمىس ىستەيدى. باعدارلامادا ەفيوپيادان كەلگەن Black Eagles يكارلىق ويىندارى، «كۋرەز» اتتى كلوۋندىق كۆارتەت، سىرىقتاعى ەكۆيليبر جانە تاعى باسقا ونەرلەر بار. سيرك شوۋىنا كىرۋ ءۇشىن بيلەت كەرەك، ال ساياباقتاعى باسقا ءىس-شارالار تەگىن. شاپيتو بيلەتتەرى 3-4 مىڭ تەڭگە ارالىعىندا ساتىلىپ جاتىر. فەستيۆالدەن كەيىن سيرك ساياباق اۋماعىندا تاعى ون كۇن جۇمىس ىستەيدى.
- ارباتتا 11:00-دەن باستاپ «تۋعان كۇنىڭمەن، الماتىم» فەستيۆالى وتۋدە، وندا قالا تۇرعىندارى مەن قوناقتارى سۋرەتشىلەر كورمەسىن، قولونەرشىلەر جارمەڭكەسىن، شەبەرلىك دارىستەرىن جانە ت.ب. ءىس-شارالاردى تاماشالاي الادى. سونىمەن قاتار، مۇندا جىل سايىنعى «كىتاپ fest» فەستيۆالى ءوتىپ جاتىر.
- ساعات 17:00-دە استانا الاڭىندا Almaty Cover Show باستالادى، وعان قازاقستاندىق ەسترادا جۇلدىزدارى قاتىسادى. ساحنادا ناعيما ەسقالييەۆا، مەيرامبەك بەسبايەۆ، Kalifarniya، RaiM، نۇرلان مەن مۇرات، ARO، ەربولات قۇدايبەرگەن، قايرات تۇنتەكوۆ جانە باسقا انشىلەر ونەر كورسەتەدى. وسى كۇنى ورتالىق ستاديوندا قالا كۇنىنە وراي ەلدەگى ەڭ تانىمال ءارى جاس ءارتيستىڭ ءبىرى سادراددين العاشقى جەكە كونسەرتىن قويادى.
- قالا كۇنىن مەرەكەلەۋ «كوكتوبە» تەلەمۇناراسىندا تۇرعىندار مەن قالا قوناقتارىنا ارنالعان قۇتتىقتاۋ جارىعىنىڭ قوسىلۋىمەن اياقتالادى. بۇعان قوسا، 21:00-دە «كوكتوبە» ساياباعىندا مەرەكەلىك وتشاشۋ بولادى.
ايتا كەتەيىك، مەرەكەلىك ءىس-شارالاردىڭ تولىق ءتىزىمىن www.almaty.kz سايتىنان جانە قالالىق اكىمدىكتىڭ www.instagram.com/akimat_almaty جانە مادەنيەت باسقارماسىنىڭ www.instagram.com/almatymadeniet ينستاگرام پاراقشالارىنان كورۋگە بولادى.