الماتى اكىمى ءبىلىم بەرۋ مەن دەنساۋلىق ساقتاۋ سالاسىنداعى قۇرىلىسى ۇزاققا سوزىلعان نىساندارمەن تانىستى

بىلتىر قىركۇيەك ايىندا الماتى اكىمدىگى تاراپىنان جوبانى تۇزەتۋگە بايلانىستى بارلىق ماسەلە شەشىلىپ، قاجەتتى قاراجات ءبولىندى.

ەربولات دوسايەۆ تاپسىرۋ مەرزىمى مەردىگەرلىك ۇيىمداردىڭ ساپاسىز جۇمىسىنا بايلانىستى بىرنەشە رەت وزگەرگەن ءبىلىم بەرۋ مەن دەنساۋلىق ساقتاۋ سالاسىنداعى قۇرىلىسى ۇزاققا سوزىلعان نىسانداردى ارالادى، دەپ حابارلايدى Almaty-akshamy.kz.

قالا باسشىسى №48 مەكتەپ-ليسەيگە قوسىمشا قۇرىلىس سالۋ جۇمىستىڭ بارىسىمەن تانىستى، بۇل مەكتەپتەگى ورىن سانىن 260-تان 510-عا دەيىن ارتتىرۋعا مۇمكىندىك بەرەدى. جاڭا اسحانا، سپورت جانە اكت زالدارىن قوسقاندا عيماراتتىڭ جالپى اۋدانى 6،5 مىڭ شارشى مەتر.

ءبىلىم ۇياسى 2021 جىلدىڭ 30 ماۋسىمىندا رەكونسترۋكسيا ءۇشىن جابىلعان، ءاۋ باستا نىسان 2022 جىلدىڭ 30 ساۋىرىندە پايدالانۋعا بەرىلۋى كەرەك ەدى. «ريگوليت» ج ش س (الماتى قالاسى) باس مەردىگەرىنىڭ كىناسىنەن جۇمىستى اياقتاۋ مەرزىمى ءۇشىنشى رەت وزگەردى. كەستەدەن كەشىگۋگە جوبالاۋ-سمەتالىق قۇجاتتاماعا ەنگىزىلگەن وزگەرىستەر مەن سمەتانى تۇزەتۋ سەبەپ بولعان. «كاسپيي ماڭى قۇرىلىس باسقارماسى-شىمكەنت» ج ش س باس جوبالاۋشىسى (شىمكەنت قالاسى) جوبادا شاتىرعا ارنالعان ماتەريالداردى، درەناجدى، سىرتقى جىلۋ تراسساسىن تارتۋدى ەسكەرمەگەن جانە جىلۋ مەن ىستىق سۋدى الەۋمەتتىك ماڭىزدى نىسانعا جەتكىزۋ ءۇشىن قازاندىقتى رەكونسترۋكسيالاماعان.

بىلتىر قىركۇيەك ايىندا الماتى اكىمدىگى تاراپىنان جوبانى تۇزەتۋگە بايلانىستى بارلىق ماسەلە شەشىلىپ، قاجەتتى قاراجات ءبولىندى. ءبىراق «ريگوليت» ج ش س قاجەتتى رەسۋرستاردى جۇمىلدىرا المادى جانە مەكتەپ قۇرىلىسىن 2022 جىلدىڭ سوڭىنا دەيىن اياقتاي الماي، مىندەتتەمەلەرىن ورىندامادى. 

قازىرگى تاڭدا ءبىرىنشى جانە ەكىنشى بلوكتاعى جۇمىستار 95%-عا اياقتالدى، كابينەتتەر 95%-عا جابدىقتالدى. ءۇش بلوك سالۋ، مەكتەپ اۋماعىن اباتتاندىرۋ بويىنشا جۇمىستار بىتپەدى، سپورتتىق جابىن، جاس توپتارى بويىنشا قورشاۋ جانە ت ب. ورناتۋ قاجەت. 

اۋا رايىن ەسكەرە وتىرىپ، كەيبىر جۇمىستار، سونىڭ ىشىندە اباتتاندىرۋ كوكتەمگە اۋىستىرىلدى. 2023 جىلدىڭ ەكىنشى توقسانىندا جۇمىستى تولىق اياقتاۋ جوسپارلانعان. اكىم قۇرىلىس باسقارماسىنا مەجەلى مەرزىمنىڭ تاعى دا وزگەرمەۋىنە جول بەرمەۋ ءۇشىن، جۇمىستى قاتاڭ باقىلاۋعا الۋدى تاپسىردى.

الماتى اكىمى 760 وقۋشىعا ارنالعان №145 جالپى ءبىلىم بەرەتىن مەكتەپتى سەيسميكالىق كۇشەيتۋ جانە كۇردەلى جوندەۋ جۇمىسىمەن دە تانىستى. مەكتەپ 30 جىلدان استام ۋاقىت بۇرىن سالىنعان جانە جوندەۋدى قاجەت ەتكەن.

ءتيىستى جۇمىس 2021 جىلدىڭ تامىزىندا باستالدى، باستاپقىدا نىساندى 2022 جىلدىڭ ناۋرىزىندا پايدالانۋعا بەرۋ جوسپارلانعان. الايدا، «كورپوراسيا اق ورداسى» ج ش س باس مەردىگەرىنىڭ ساپاسىز جۇمىسىنا بايلانىستى مەرزىمدى ءۇشىنشى رەت اۋىستىردى. كەستەدەن كەش قالۋعا جوبالاۋ-سمەتالىق قۇجاتتامانىڭ شيكىلىگى (ازىرلەنگەن جىلى – 2020، اۆتورى – «شەبەر» كومپانياسى» ج ش س، جەزقازعان قالاسى) جانە ماتەريالدار مەن قىزمەتتەردىڭ قازىرگى باعالارعا ساي كەلمەۋى باستى سەبەپ بولدى. 

قازىرگى تاڭدا ارلەۋ، شاتىرلاۋ، اۋماقتى اباتتاندىرۋ بىتپەگەن. نىساندى جاڭا وقۋ جىلىنا دەيىن تاپسىرۋ جوسپارلانۋدا. ەربولات دوسايەۆ كەزەكتى مەرزىم سوزىلعان جاعدايدا مەردىگەردى سوتقا بەرۋدى تاپسىردى.

«كورپوراسيا اق ورداسى» ج ش س تاعى ءبىر جوبا – «بالالار شۇعىل مەديسينالىق كومەك ورتالىعى» شارۋاشىلىق جۇرگىزۋ قۇقىعىنداعى مەملەكەتتىك كوممۋنالدىق كاسىپورنى ءۇشىن وپەراسيالىق بلوگى بار قابىلداۋ ءبولىمى عيماراتىن سالۋمەن اينالىستى. بۇل جۇمىس 2021 جىلدىڭ تامىزىندا باستالدى، كەلىسىمشارتقا سايكەس، بىلتىر جەلتوقساندا اياقتالۋ كەرەك ەدى. الايدا «كورپوراسيا اق ورداسى» ءجشس-نىڭ ساپاسىز جۇمىسىنىڭ سالدارىنان الەۋمەتتىك ماڭىزدى نىسان ۋاقىتىندا تاپسىرىلعان جوق.

سونىڭ ناتيجەسىندە قالا اكىمدىگى جۇمىس قارقىنىن جەدەلدەتۋ ءۇشىن ءبىرقاتار ۇيىمداستىرۋشىلىق شارالاردى قابىلدادى، قوسىمشا جۇمىس كۇشى مەن تەحنيكا جۇمىلدىرىلدى. قۇرىلىس-مونتاج جۇمىستارىن جالعاستىرۋ ءۇشىن «اتريكس ستروي» ج ش س قوسالقى مەردىگەرلىك ۇيىمى تارتىلدى. ەربولات دوسايەۆ قۇرىلىس باسقارماسىنا مەجەلى مەرزىمدە ورىنداۋدى ءجىتى باقىلاۋدا ۇستاۋدى جانە «كورپوراسيا اق ورداسى» ج ش س كومپانياسىنىڭ جەرگىلىكتى بيۋدجەتتەن بولىنگەن قاراجاتتىڭ ماقساتتى پايدالانىلۋىن تەكسەرۋدى تاپسىردى.

 قالا اكىمى №2 الماتى مەملەكەتتىك گۋمانيتارلىق-پەداگوگيكالىق كوللەدجىنىڭ عيماراتىنداعى قوسىمشا قۇرىلىس جوباسىمەن دە تانىستى. سالىنىپ جاتقان عيماراتتا 300 ورىندىق وقۋ عيماراتى، 129 ورىندىق اكت زالى جانە 84 ورىندىق اسحانا بولادى. قازىرگى عيمارات 60 جىل بۇرىن سالىنعان. بۇگىندە 410 ورىندىق كوللەدجدە 1042 ستۋدەنت وقيدى.

 باستاپقى جوبا بويىنشا ىرگەلەس ستاديون اۋماعىندا جەكە عيمارات سالۋ كوزدەلگەن. جوبانى تالقىلاۋ بارىسىندا اكىمدىك جەرگىلىكتى تۇرعىنداردىڭ تالابىن ەسكەرىپ، جاسىل ايماق پەن سپورت نىسانىن ساقتاۋ ماقساتىندا قولدانىستاعى كوللەدج عيماراتىنا قوسىمشا قۇرىلىس سالۋ ماسەلەسى قارالدى. قۇرىلىس باسقارماسى جوبالاۋ-سمەتالىق قۇجاتتامانى ازىرلەۋگە كىرىستى. جوبا فۋتبول، باسكەتبول، ۆولەيبول الاڭى، ۆوركاۋت-ايماقتار مەن بالالار الاڭدارى ورنالاساتىن ستاديوندى جاڭعىرتۋدى كوزدەيدى. باس جوبالاۋشى - «دياس پروەكت» ج ش س، قۇرىلىس 2023 جىلعى شىلدەدە باستالادى. 

 ەربولات دوسايەۆ قۇرىلىس باسقارماسىنا قاڭتار ايىنىڭ سوڭىنا دەيىن تۇرعىنداردىڭ پىكىرى مەن ۇسىنىسىن ەسكەرە وتىرىپ، ەسكيزدىك جوبانى قالا قۇرىلىسى جانە ۋربانيستيكا باسقارماسىمەن كەلىسۋدى، سونىمەن قاتار بارلىق جاسىل جەلەكتى كوللەدج اۋماعىنان كوشىرۋدى جانە ساقتاۋدى تاپسىردى.

 نىسانداردى ارالاۋ بارىسىندا قالا باسشىسىنا № 9 مەكتەپ-ينتەرناتقا قوسىمشا قۇرىلىس جۇمىستارى كورسەتىلدى. جوبالىق قۋاتى 220 ورىندىق وقۋ ورداسىندا 328 بالا وقيدى. سالىنىپ جاتقان عيماراتتا وقۋ عيماراتى مەن اسحانا ورىن تەبەدى. 

 باس مەردىگەر – «Barat & Co» ج ش س (شىمكەنت قالاسى). كومپانيا قۇرىلىس-مونتاج جۇمىستارىن 2021 جىلعى 20 شىلدەدە باستادى، العاشىندا نىسان وتكەن جىلدىڭ قاڭتارىندا پايدالانۋعا بەرىلۋى ءتيىس بولاتىن. سول كەزدەن باستاپ بۇل  مەرزىم ەكى رەت وزگەردى. 

 2020 جىلعى جوبا قۇرىلىس ماتەريالىنىڭ قىمباتتاۋىنا بايلانىستى قازىرگى باعالارعا سايكەستەندىرىپ، تۇزەتۋگە باعىتتالعان. مۇنى ەسكەرە وتىرىپ، «BARAT & CO» ج ش س قۇرىلىستى بىلتىر جىل سوڭىنا دەيىن اياقتاۋى ءتيىس ەدى، سەبەبى قۇرىلىس باسقارماسىنا تاپسىرىس بەرۋشى قۇرىلىسقا ارنالعان بارلىق ءراسىمدى ورىندادى، قاجەتتى قاراجات ءبولىندى. جەلتوقسان ايىندا «Barat & Co» ج ش س مەردىگەرلىك ۇيىمىنا قاتىستى ۇزارتىلعان مەرزىمدى بۇزعانى ءۇشىن سوتقا تالاپ ارىز بەرىلدى. كومپانيانىڭ كىناسىنەن مەكتەپ-ينتەرنات ءتورتىنشى جىل جۇمىس ىستەمەي تۇر، وقۋشىلار باسقا وقۋ ورىندارىندا ۋاقىتشا وقۋعا ءماجبۇر.

 نىساندى ارالاۋ بارىسىندا ەربولات دوسايەۆ قۇرىلىس-مونتاج جۇمىستارىنا، ونىڭ ىشىندە ىشكى ەسىكتىڭ جانە ت.ب. ماتەريالدىڭ ساپاسىزدىعى تۋرالى ەسكەرتۋ جاسادى. اباتتاندىرۋ جۇمىستارىن ەسكەرە وتىرىپ، نىساندى بيىلعى جىلدىڭ مامىر ايىندا تاپسىرۋ جوسپارلانىپ وتىر، وقۋشىلار وقۋ جىلىنىڭ باسىنان قايتا قابىلدانادى. 

 جۇمىس ساپارىنىڭ قورىتىندىسى بويىنشا قالا اكىمى ءتيىستى باسقارماعا قۇرىلىس قارقىنىن جەدەلدەتۋدى، قۇرىلىس جۇمىستارى مەن قولدانىلاتىن ماتەريالداردىڭ ساپاسىنا، سونىمەن بىرگە، الەۋمەتتىك نىسانداردى زاماناۋي جابدىقتارمەن قامتاماسىز ەتۋگە باسا نازار اۋدارۋدى تاپسىردى.