قالا باسشىسى ەربولات دوسايەۆ «الماتى حالىقارالىق اۋەجايى» اق پرەزيدەنتى الپ ەر تۋنگا ەرسويمەن كەزدەسىپ، اۋەجاي مەن ىرگەلەس اۋماقتىڭ كولىك ينفراقۇرىلىمىن دامىتۋ بويىنشا بىرلەسكەن ءىس-شارالاردى تالقىلادى، دەپ حابارلايدى Almaty-akshamy.kz
الماتى اكىمىنە الماتى حالىقارالىق اۋەجايى مەن ىرگەلەس اۋماقتىڭ كولىك ينفراقۇرىلىمىن دامىتۋدىڭ 2050 جىلعا دەيىنگى پەرسپەكتيۆاسى جايلى شەبەر جوسپار تانىستىرىلدى. بۇل قۇجات قالا باسشىسىنىڭ تاپسىرماسىمەن الماتىنىڭ باس جوسپارىمەن ۇيلەستىرىلدى.
شەبەر جوسپاردىڭ ءبىرىنشى كەزەڭى جاڭا جولاۋشىلار تەرمينالىن سالۋدى جانە قولدانىستاعى تەرمينالدى جاڭعىرتۋدى كوزدەيدى. بۇگىنگى تاڭدا ۇشاققا شىعاتىن جولدار كەڭەيتىلدى، قوسىمشا اۋا باپتاۋ جۇيەسى ەنگىزىلدى، جاڭا جايلى اۆتوبۋستار ساتىپ الىندى. باسقا كەزەڭدەر اياسىندا قۇجاتقا سايكەس، حالىقارالىق باعىتتاردىڭ سانىن كوبەيتۋ، جاڭا عيماراتتار سالۋ، اۆتوتۇراق ايماعىن كەڭەيتۋ جانە ت.ب. جوسپارلانىپ وتىر.
بارلىق باعىت بويىنشا قۇرىلىس جۇمىستارى قارقىن الاعان. وسىلايشا، جاڭا جولاۋشىلار تەرمينالى 80% دايىن، جالپى ماقساتتاعى اۆياسيا عيماراتىنىڭ قۇرىلىسى اياقتالدى، ەستاكادانى، ۇشۋ-قونۋ جولاعىن جانە ۆوكزال ماڭى اۋماعىن قايتا جاڭارتۋ جالعاسىپ جاتىر. اۋە ايلاعىنىڭ قازىرگى كورسەتكىشتەرى تۋرالى ايتا كەلە الپ ەر تۋنگا ەرسوي جۇك تاسىمالىنىڭ ءوسىپ وتىرعانىن حابارلادى جانە بيىل جىل سوڭىنا دەيىن 9-ميلليون جولاۋشى تىركەلەدى دەپ بولجام جاسادى.
ءوز كەزەگىندە ەربولات دوسايەۆ جولاۋشىلار سانىنىڭ ەداۋىر ارتۋىنا بايلانىستى قۇرىلىس جۇمىستارىن جەدەلدەتۋدىڭ ماڭىزىنا نازار اۋداردى. «الماتى حالىقارالىق اۋەجايى» اق پرەزيدەنتى قالا باسشىسىنا جۇمىستىڭ جوعارى قارقىنىن ەسكەرىپ، جاڭا تەرمينالدى ىسكە قوسۋ جازعى ماۋسىمنىڭ باسىندا، دەمالىس كەزەڭىنە دەيىن جۇزەگە اسىرىلاتىنىن باياندادى.
ەستەرىڭىزگە سالا كەتەيىك، جاڭا حالىقارالىق جولاۋشىلار تەرمينالىنىڭ اۋدانى 53،500 م2. بۇل تەرمينالدى ىسكە قوسۋ اۋەجايدىڭ وتكىزۋ قابىلەتىن جىلىنا 7 ملن-نان 14 ملن ادامعا دەيىن ارتتىرۋعا، قالا تۇرعىندارى مەن قوناقتارى ءۇشىن مەيلىنشە قولايلى جاعداي جاساۋعا، سونىمەن بىرگە الماتىنىڭ بۇكىل ورتالىق ازياداعى كولىك-لوگيستيكالىق حاب رەتىندەگى پوزيسياسىن نىعايتۋعا مۇمكىندىك بەرەدى.