الماتى اكىمى ەربولات دوسايەۆتىڭ حالىقپەن ەكىنشى كەزدەسۋى الاتاۋ اۋدانىندا ءوتتى. ءىس-شاراعا 600-دەن استام اۋدان تۇرعىندارى كەلدى دەپ حابارلايدى
«الماتى اكىمى لاۋازىمىنا تاعايىندالعاننان كەيىن مەن العاشقى جۇمىس ساپارىمدى الاتاۋ اۋدانىنا جاسادىم. قازىرگى ۋاقىتتا اۋداندا 318 مىڭ ادام نەمەسە قالا حالقىنىڭ 15،8%-ى تۇرادى، اۋدان قالادا حالىق سانى بويىنشا ەكىنشى ورىندا»، - دەدى ەربولات دوسايەۆ ءوزىنىڭ سوزىندە.
الماتى اكىمىنىڭ مالىمەتىنشە، الاتاۋ اۋدانىنىڭ دامۋ الەۋەتى زور. ونىڭ اۋماعىندا الماتىنىڭ يندۋستريالدى ايماعى ورنالاسقان، وندا بۇگىندە 113،7 ملرد تەڭگە ينۆەستيسيا تارتا وتىرىپ، 19 جوبا ىسكە اسىرىلدى. اعىمداعى جىلى 822 جۇمىس ورنىن قۇرۋمەن جاڭا 10 ءوندىرىستى ىسكە قوسۋ جوسپارلانۋدا، بۇل بيۋدجەتتىڭ سالىق تۇسىمدەرىنە وڭ اسەر ەتەدى. جالپى، اعىمداعى جىلى اۋداندا 8 مىڭعا جۋىق جاڭا جۇمىس ورنىن قۇرۋ جوسپارلانۋدا.
حالىقپەن كەزدەسۋ بارىسىندا ەربولات دوسايەۆ اۋداننىڭ نەگىزگى پروبلەمالىق ماسەلەلەرىن، سونىڭ ىشىندە ساپالى اۋىز سۋمەن، كارىزبەن جانە جول جابىنىمەن، الەۋمەتتىك ينفراقۇرىلىممەن، اباتتاندىرۋمەن، قوعامدىق كولىكپەن جانە ت. ب. قامتاماسىز ەتۋدى اتادى.
الەۋمەتتىك نىسانداردىڭ جەتىسپەۋشىلىگى ماسەلەسىن شەشۋ ءۇشىن جاڭا مەديسينالىق مەكەمەلەردىڭ، مەكتەپتەر مەن بالاباقشالاردىڭ قۇرىلىسى جالعاسادى. مەكتەپتەردە ورىن تاپشىلىعىن تومەندەتۋ ماقساتىندا وقۋ جىلىنىڭ باسىندا «سايالى» جانە «توميريس» شاعىن اۋداندارىندا 3 300 ورىندى 2 وقۋ ورنى (№204، 205 مەكتەپتەر) پايدالانۋعا بەرىلەدى. 4 500 ورىندى تاعى 3 مەكتەپ بويىنشا قۇرىلىس جۇمىستارىن ءبىر جىلعا دەيىن اياقتاۋ جوسپارلانۋدا. مەكتەپكە دەيىنگى مەكەمەلەردە ورىن جەتىسپەۋشىلىگىن قىسقارتۋ ماقساتىندا بيىل 2 بالاباقشا – «نۇركەنت» شاعىن اۋدانىندا 320 ورىندى جانە «سايالى» شاعىن اۋدانىندا 160 ورىندى سالۋ جوسپارلانعان.
حالىقتى ساپالى مەديسينالىق قىزمەتپەن قامتاماسىز ەتۋ ماقساتىندا اعىمداعى جىلى سايالى جانە قاراسۋ شاعىن اۋدانداندارىندا ءارقايسىسى 200 كەلۋشىگە ارنالعان وتباسىلىق-دارىگەرلىك امبۋلاتوريالار سالۋ جوسپارلانۋدا. كەلەسى جىلى العابس شاعىن اۋداننىڭ 19 000 تۇرعىنىنا جانە تەرەكتى شاعىن اۋدانى تۇرعىندارىنىڭ ءبىر بولىگىنە قىزمەت كورسەتۋگە ەسەپتەلگەن العاشقى مەديسينالىق-سانيتارلىق كومەك ورتالىعىنىڭ قۇرىلىسىن باستاۋ جوسپارلانعان. ستاسيونارلىق كومەك قىزمەتتەرىنىڭ تاپشىلىعىنا بايلانىستى 2023-2025 جىلدارى كوپبەيىندى اۋرۋحانا سالۋ جوسپارلانۋدا. مەديسينالىق مەكەمەدە پەرزەنتحانا، دياگنوستيكالىق جانە وڭالتۋ ورتالىقتارى بولادى.
اۋداننىڭ وتكىر ماسەلەلەرىنىڭ ءبىرى باعىتتىق جەلىلەر مەن جىلجىمالى قۇرامنىڭ جەتىسپەۋشىلىگى بولىپ تابىلادى. قالا باسشىسىنىڭ مالىمەتىنشە، ماسەلەنى شەشۋ ءۇشىن التى شاعىن اۋداندا 3 جاڭا باعىت اشىلىپ، 4 باعىت ۇزارتىلىپ، كۇشەيتىلەدى (№109، 129، 25، 57)، سونداي-اق №115 باعىتتىڭ بارلىق جىلجىمالى قۇرامى جاڭارتىلدى. بيىل اۆتوبۋس ايالدامالارىنىڭ تاپشىلىعىن تولىعىمەن شەشۋ جوسپارلانعان - 50 ايالداما كەشەنى سالىنادى.
جايلىلىق جاساۋ جانە قالانى اباتتاندىرۋدى جاقسارتۋ ماقساتىندا 2019 جىلدان باستاپ الماتىدا «حالىقتىڭ بيۋدجەتكە قاتىسۋى» باعدارلاماسى ىسكە اسىرىلۋدا. سوڭعى 2 جىلدا اۋداندا بوس جاتقان 60 ۋچاسكەنى اباتتاندىرۋ جانە كوگالداندىرۋ جۇمىستارى جۇرگىزىلدى – بالالار ويىن الاڭدارى، ۆوركاۋت الاڭدارى، سپورت كەشەندەرى، جاياۋ جۇرگىنشىلەر جانە جاسىل ايماقتار سالىندى. اعىمداعى جىلدىڭ ناۋرىز ايىندا وسى جوبا اياسىندا الماتى اكىمىنىڭ ۇسىنىسى بويىنشا الاتاۋ اۋدانى ءۇشىن قارجىلاندىرۋ كولەمى 500 ملن تەڭگەدەن 1،8 ملرد تەڭگەگە دەيىن ۇلعايتىلدى.
بيىلعى جىلى تۇرعىنداردىڭ ۇسىنىستارى بويىنشا بالالار جانە سپورت الاڭدارىن، مومىش ۇلى كوشەسى بويىندا كورۋ الاڭىن، راحات-مادەنيەت، سايالى، قاراسۋ، شاپاعات شاعىن اۋداندارىندا فۋتبول الاڭدارىن جانە جاسىل ايماققا ارنالعان سۋارۋ جۇيەلەرىن سلاۋ بويىنشا 36 جوبا ايقىندالدى.
تۇرعىندار جولداردىڭ ساپاسى مەن جوندەۋ، سۋمەن قامتاماسىز ەتۋ، كارىز، ەلەكتر جەلىلەرىنىڭ جاعدايى جانە ت. ب. ماسەلەلەردى كوتەردى.
حالىقپەن كەزدەسۋ 3 ساعاتتان استام ۋاقىتقا سوزىلدى. قالا باسشىسى تۇرعىنداردىڭ 150 وزەكتى سۇراقتارىنا جاۋاپ بەردى. كەزدەسۋ اياسىندا ناقتى تاپسىرمالار بەرىلدى، اكىمدىكتىڭ جاۋاپتى بولىمشەلەرى بەكىتىلىپ، مەرزىمدەرى بەلگىلەندى.
مەملەكەت باسشىسى قاسىم-جومارت توقايەۆتىڭ جارلىعىمەن بەكىتىلگەن حالىقپەن كەزدەسۋلەردىڭ جاڭا فورماتىنا سايكەس الماتى قالاسىنىڭ اكىمى ەربولات دوسايەۆ قالانىڭ بارلىق اۋداندارىنىڭ تۇرعىندارىمەن توقسان سايىن كەزدەسەتىن بولادى.
ەسكە سالساق، الماتى اكىمىنىڭ حالىقپەن العاشقى كەزدەسۋى 14 ساۋىردە بوستاندىق اۋدانىندا وتكەن بولاتىن.