كاسىبي مەرەكە قارساڭىندا الماتى اكىمى دارحان ساتىبالدى اۋىل شارۋاشىلىعى سالاسىن دامىتۋعا، ازىق-تۇلىك قاۋىپسىزدىگىن قامتاماسىز ەتۋگە جانە مەگاپوليستى ساپالى ونىممەن تۇراقتى قامتاماسىز ەتۋگە ەلەۋلى ۇلەس قوسقان اگروونەركاسىپ سالاسىنىڭ ۇزدىك وكىلدەرىن مەملەكەتتىك ناگرادالارمەن ماراپاتتادى.
ءىس-شارا بارىسىندا الماتى اكىمى اگروونەركاسىپ كەشەنىنىڭ ستراتەگيالىق ماڭىزىن اتاپ ءوتىپ، پرەزيدەنت قاسىم-جومارت توقايەۆتىڭ اۋىل شارۋاشىلىعىن ۇلتتىق قاۋىپسىزدىكتىڭ نەگىزگى باعىتتارىنىڭ ءبىرى رەتىندە دامىتۋعا ەرەكشە كوڭىل ءبولىپ وتىرعانىن ايتتى. قايتا وڭدەۋ كاسىپورىندارى، لوگيستيكالىق ينفراقۇرىلىم جانە ءعىلىمي-بىلىم بەرۋ ورتالىقتارىنىڭ ارقاسىندا الماتى اگرارلىق تىزبەكتىڭ ماڭىزدى بۋىنىنا اينالىپ وتىر.
سالتاناتتى ءراسىم اياسىندا "پاراسات" وردەنى قازاق ۇلتتىق اگرارلىق زەرتتەۋ ۋنيۆەرسيتەتىنىڭ "اگرونوميا، سەلەكسيا جانە بيوتەحنولوگيا" كافەدراسىنىڭ پروفەسسورى تاستانبەك اتاقۇلوۆقا جانە "ماسلو-دەل" ج ش س باس ديرەكتورى پاۆەل سەليۆانوۆقا تابىستالدى. "ەرەن ەڭبەگى ءۇشىن" مەدالىمەن "سين-كاز" ج ش س زەرتحانا مەڭگەرۋشىسى ايمان كۇدەرينا ماراپاتتالدى. بۇل ناگرادالار - سالا ماماندارىنىڭ كوپجىلدىق ادال ەڭبەگى مەن كاسىبيلىگىنە، اگرارلىق سەكتوردىڭ دامۋىنا قوسقان زور ۇلەسىنە بەرىلگەن جوعارى باعا.
قالا اكىمى اۋىل شارۋاشىلىعى سالاسىندا ەڭبەك ەتىپ جۇرگەن بارشا ماماندارعا ريزاشىلىعىن ءبىلدىرىپ، اگروونەركاسىپ سەكتورىنا قولداۋ كورسەتۋ جۇمىسى جۇيەلى تۇردە جالعاساتىنىن اتاپ ءوتتى.
بۇگىندە الماتىدا اگروونەركاسىپ سالاسىندا 60-قا جۋىق كاسىپورىن جانە ازىق-تۇلىك وندىرەتىن 300-دەن استام كومپانيا جۇمىس ىستەيدى. ايتا كەتەيىك، قازاقستاندا قاراشانىڭ ءۇشىنشى جەكسەنبىسىندە اۋىل شارۋاشىلىعى قىزمەتكەرلەرىنىڭ كۇنى ءداستۇرلى تۇردە اتالىپ وتەدى.