بۇل جارنانى قازاقستاندىقتار تولەمەيدى.
وڭىرلىك كوممۋنيكاسيالار قىزمەتىندە وتكەن بريفينگتە الماتى قالاسى اكىمىنىڭ ورىنباسارى الىشەر ءابدىقادىروۆ 2023 جىلدىڭ قاڭتارىنان باستاپ شەتەلدىكتەردەن الىناتىن تۋريستىك جارنانىڭ نەلىكتەن 5 پايىز بولعانىن ءتۇسىندىردى، دەپ حابارلايدى Almaty-akshamy.kz.
«Bed Tax دەپ اتالاتىن تۋريستىك جارنا، 2021 جىلى زاڭعا ەنگىزىلگەن. سودان كەيىن ۇكىمەت ەرەجەلەردى بەكىتتى، وعان سايكەس، ەسەپتەۋ ادىستەمەسى بويىنشا تۋريستەر اعىنىنىڭ 20%-عا ۇلعايۋىنا بايلانىستى Bed Tax جارناسى 5% دەڭگەيىندە ەنگىزىلەدى. ياعني، ءبىز ءقازىر ادىستەمەگە سايكەس وسىنداي شەشىم قابىلدادىق. بۇل الىم الەمدىك تاجىريبەگە سايكەس ءتۋريزمدى ودان ءارى دامىتۋعا باعىتتالعاندىقتان، كەلەسى جىلدان باستاپ ءتيىستى زاڭ كۇشىنە ەنەدى دەپ سەنەمىز. ونى ءبىزدىڭ ازاماتتار تولەمەيدى»، - دەپ جاۋاپ بەردى ول.
ايتۋىنشا، الماتىدا شەتەلدىك تۋريستەر سانى 2،8 ەسە، ىشكى تۋريستەر سانى 1،4 ەسە ءوستى.
«جارنا دا وزگەرۋى مۇمكىن. شەتەلدىك تۋريستەر اعىنى ازايسا، سايكەسىنشە، ونىڭ قۇنى دا تومەندەيدى»، - دەپ قوستى سپيكەر.