الماتى اكىمدىگى قوعامدىق كولىكتەر جۇمىسىنىڭ ءجۇرۋ كەستەسىندە نەگە كەشىگۋلەر بولعانىن ءتۇسىندىردى، دەپ حابارلايدى almaty-akshamy.kz
«6 قازان كۇنى الماتىدا اۋا تەمپەراتۋراسى تومەندەپ، قار ارالاس جاۋىن جاۋدى. وسىعان بايلانىستى قوعامدىق كولىكتەردىڭ ءجۇرۋ كەستەسىندە كەشىگۋلەر مەن ارالىق ۇزىلىستەر پايدا بولدى، جوسپارلى كەيبىر باعىتتار تەك ساعات 8-گە تامان قالپىنا كەلتىرىلدى»، - دەپ حابارلادى الماتى قالالىق موبيلدىلىك باسقارماسىنان.
باسقارما مالىمەتىنشە، سونداي-اق بۇگىن قوسالقى ستانسالاردىڭ بىرىندە (№16) ەلەكتر كابەلى ىستەن شىقتى. سالدارىنان شالياپين كوشەسىنەن ساين جانە مومىشۇلىنا دەيىن، مومىش ۇلى بويىمەن ابايعا دەيىن 3-ىقشاماۋداننان ساين كوشەسىنە دەيىن جانە ساين بويىمەن جۇبانوۆتان ستۋدەنت كوشەسىنە دەيىن تروللەيبۋس باعىتتارىنىڭ قوزعالىسى بۇزىلدى.
«مارشرۋتتاردىڭ تولىق توقتاپ قالۋىن بولدىرماۋ ءۇشىن، جوسپارلانعان №5، 12، 6، 11 تروللەيبۋستار سانىن قىسقارتۋ تۋرالى شەشىم قابىلداندى. قازىرگى ۋاقىتتا بارلىق تروللەيبۋستار 100 پايىز جولعا شىقتى»، - دەدى باسقارمادا.
ال تاڭەرتەڭگى ۋاقىتتا اۆتوبۋستار سانىنىڭ 94%-عا دەيىن ازايىپ كەتۋى اۋا رايىنا بايلانىستى بولدى. سەبەبى، تومەن تەمپەراتۋرانىڭ اسەرىنەن ديزەل وتىنى قويۋلانىپ كەتكەن. تاسىمالداۋشىلار ماۋسىمدىق وتىندى جىلدىق كەستە بويىنشا 15 قازانعا دەيىن جەتكىزۋگە تاپسىرىس بەرگەن. «باسقارما مەن تاسىمالداۋشى كومپانيا اۆتوبۋستاردىڭ مارشرۋتتارعا جوسپارلى شىعارىلۋىن قامتاماسىز ەتۋ ءۇشىن كەشەندى شارالار قولدانىپ جاتىر»، - دەلىنگەن حابارلامادا.