مەملەكەت باسشىسى قاسىم-جومارت توقايەۆتىڭ تاپسىرماسى بويىنشا شاعىن جانە ورتا بيزنەسكە كەلتىرىلگەن شىعىندى عانا ەمەس، قاڭتار ايىنداعى وقيعالار كەزىندە اۆتوموبيلدەرى بۇلىنگەن نەمەسە جويىلعان الماتى قالاسىنىڭ تۇرعىندارىنا دا قاتىستى جۇمىستار جۇرگىزىلۋدە، دەپ حابارلايدى اlmaty-akshamy.kz.
قازىرگى ۋاقىتتا الماتى قالاسى اۋداندارىنىڭ اكىمدىكتەرىنە اۆتوكولىك يەلەرىنەن كەلتىرىلگەن زالالدى وتەۋ تۋرالى 99 ءوتىنىش كەلىپ ءتۇستى. جەكە تۇلعالارعا كەلتىرىلگەن شىعىندى وتەۋ تەتىگىنە سايكەس (ۇكىمەتتىڭ 2013 جىلعى 28 تامىزداعى №877 قاۋلىسىمەن بەكىتىلگەن تەرروريزم اكتىسى سالدارىنان جەكە جانە زاڭدى تۇلعالارعا كەلتىرىلگەن مۇلىكتىك زياندى وتەۋ قاعيدالارى بويىنشا)، جالپى سوماسى 258 ملن تەڭگەگە 54 ءوتىنىم قاناعاتتاندىرىلدى (المالى اۋدانى – 33، اۋەزوۆ اۋدانى – 9، تۇركسىب اۋدانى – 12).
اۋدان اكىمدىكتەرىنىڭ قاراۋىندا بۇلىنگەن جانە جانىپ كەتكەن اۆتوكولىكتەر جونىندە تاعى 45 ءوتىنىم بار (بوستاندىق اۋدانى – 40، مەدەۋ اۋدانى – 5). ولار بويىنشا تولەمدەردى اعىمداعى جىلدىڭ 15 مامىرىنا دەيىنگى مەرزىمدە جۇرگىزۋ جوسپارلانۋدا. قوسىمشا وتىنىمدەردىڭ تۇسۋىنە قاراي الماتىنىڭ اۋداندىق اكىمدىكتەرى وسى باعىتتاعى جۇمىستى جالعاستىراتىن بولادى.
وتىنىشتەردى اۋداندىق اكىمدىكتەر تۇسكەن كۇننەن باستاپ 1 اي ىشىندە قارايدى. مۇلىككە كەلتىرىلگەن زالالدى باعالاۋ ءوتىنىش تىركەلگەن كۇننەن باستاپ 7 كۇن مەرزىم بەلگىلەنەدى جانە زارداپ شەگۋشىنىڭ ءوزى تاڭداعان تاۋەلسىز ساراپشىلار جۇرگىزەدى. باعالاۋ بويىنشا شىعىستاردى جۇرگىزۋ مەملەكەتتىك ورگاندارعا، ياعني اۋداندىق اكىمدىكتەرگە جۇكتەلگەن.