مەملەكەت باسشىسى قاسىم-جومارت توقايەۆتىڭ تاپسىرماسى بويىنشا شاعىن جانە ورتا بيزنەسكە كەلتىرىلگەن زالالدى وتەۋ بويىنشا عانا ەمەس، سونداي-اق قاڭتار وقيعالارى بارىسىندا اۆتوكولىكتەرى بۇلىنگەن نەمەسە جويىلعان الماتى قالاسىنىڭ تۇرعىندارىنا دا قاتىستى جۇمىس جۇرگىزىلۋدە.
قازىرگى ۋاقىتتا الماتى قالاسى اۋداندارىنىڭ اكىمدىكتەرىنە اۆتوكولىك يەلەرىنەن كەلتىرىلگەن زالالدى وتەۋ تۋرالى 143 ءوتىنىم كەلىپ ءتۇستى، دەپ حابارلايدى Almaty-akshamy.kz.
جەكە تۇلعالارعا كەلتىرىلگەن زالالدى وتەۋ تەتىگىنە سايكەس (ۇكىمەتتىڭ 2013 جىلعى 28 تامىزداعى № 877 قاۋلىسىمەن بەكىتىلگەن تەرروريزم اكتىسى ناتيجەسىندە جەكە جانە زاڭدى تۇلعالارعا كەلتىرىلگەن مۇلىكتىك زياندى وتەۋ ەرەجەلەرىنە سايكەس)، بارلىعى 143 وتىنىمگە جالپى سوماسى 566،7 ملن تەڭگەگە قولداۋ كورسەتىلدى.
وتىنىشتەردى اۋدان اكىمدىكتەرى كەلىپ تۇسكەن كۇننەن باستاپ 1 اي ىشىندە قارايدى. مۇلىككە كەلتىرىلگەن زالالدى باعالاۋ ءوتىنىش تىركەلگەن كۇننەن باستاپ 7 كۇن مەرزىمدە بەلگىلەنەدى جانە ونى زارداپ شەككەندەر تاڭداعان تاۋەلسىز ساراپشىلار جۇرگىزەدى. شىعىستار بويىنشا باعالاۋدى جۇرگىزۋ مەملەكەتتىك ورگاندار اتىنان اۋدان اكىمدىكتەرىنە جۇكتەلگەن.