پويىز 26 ساۋىردە جولعا شىعىپ، 6 جەلتوقسانعا دەيىن قاتىنايدى.
«قازاقستان تەمىر جولى» كومپانياسىنىڭ مالىمەتىنشە، پويىز باعىتى مەديسينالىق كابينەتتەرى جوق ايماقتاردى قامتيدى. دەنساۋلىق پويىزدارى ەڭ شالعايداعى ستانسالاردىڭ تۇرعىندارىنا جوعارى بىلىكتى مەديسينالىق كومەك الۋعا مۇمكىندىك بەرەدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
ماسەلەن، وتكەن جىلدىڭ قورىتىندىسىندا 150-گە جۋىق ستانسانىڭ 80 649 تۇرعىنى ەمدەۋ-كونسۋلتاسيالىق قىزمەت الدى، ونىڭ ىشىندە 21 867 بالا بار. 5 097 ادامعا شاعىن وتا جاسالىپ، 26 587 ادامعا ستوماتولوگيالىق كومەك كورسەتىلدى. سونىمەن قاتار، مەديسينالىق پويىز ماماندارى 59 بالانى سۇندەتتەدى.
«بيىل شالعايداعى ستانسا تۇرعىندارى تەراپيەۆت، ستوماتولوگ، وفتالمولوگ، لور، حيرۋرگ، ۋرولوگ، ماممولوگ، پەدياتر جانە باسقادا مامانداردان تەگىن تەكسەرۋدەن جانە ەمدەۋدەن وتۋگە مۇمكىندىك الادى. پويىز زاماناۋي دياگنوستيكالىق جانە ەمدىك جابدىقتارمەن، ۋلترادىبىستىق، فليۋوروگرافيالىق اپپاراتپەن، شاعىن وپەراسيالىق بولمەمەن، زەرتحانامەن، ينتەرنەتكە سىمسىز قول جەتكىزۋگە ارنالعان بايلانىس قۇرالدارىمەن جابدىقتالادى. مەديسينالىق پويىزدىڭ بۇل جولعى قوزعالىس كەستەسى شالعايداعى ستانسالاردا مەديسينالىق پۋنكتتەردىڭ جوقتىعىن ەسكەرۋ جانە ازاماتتار مەن مەملەكەتتىك ورگانداردىڭ وتىنىشتەرى نەگىزىندە جاسالدى»، - دەپ اتاپ ءوتتى كومپانيادان.