المالى اۋدانىندا وقۋشى ورىندارىنىڭ تاپشىلىعىنا بايلانىستى احۋال سالىستىرمالى تۇردە قالىپتى جاعدايدا.
وقۋشىلاردىڭ جالپى كونتينگەنتى 37 مىڭ وقۋشىنى قۇرايدى، ال تاپشىلىق 1 مىڭ (1 028) ورىننان ءسال اسادى، دەپ حابارلايدى Almaty-akshamy.kz.
بۇل جايىندا بۇگىن قالا اكىمىنىڭ المالى اۋدانى تۇرعىندارىمەن وتكەن كەزدەسۋىندە بەلگىلى بولدى.
مەملەكەت باسشىسى ىسكە قوسقان «جايلى مەكتەپ» ۇلتتىق جوباسىنىڭ اياسىندا بيىل المالى اۋدانىنداعى رايىمبەك داڭعىلى مەن اۋەزوۆ كوشەسىنىڭ قيىلىسىندا 1،5 مىڭ ورىندىق جاڭا مەكتەپ قۇرىلىسى باستالادى. وبەكتى 2024 جىلدىڭ IV توقسانىندا بەرىلەدى.
ءساۋىر ايىندا № 15 گيمنازيانى سەيسميكالىق كۇشەيتىپ، كۇردەلى جوندەۋ اياقتالدى. تامىز ايىندا №136 مەكتەپ-گيمنازيانى كۇردەلى جوندەپ، سەيسميكالىق كۇشەيتۋ ءۇشىن جوبالاۋ-سمەتالىق قۇجاتتاماسىنىڭ ساراپتاما قورىتىندىسىن الۋدى جوسپارلاپ وتىرمىز.
سونداي-اق اكىمدىك ەكى مەكتەپكە، ياعني: №16 مەكتەپكە 300 ورىندىق قوسىمشا عيمارات جانە №58 مەكتەپكە سپورت زالى مەن اكت زالىن (قازىرگى عيماراتتاردى بۇزىپ) سالۋ ءۇشىن جوبالاۋ-سمەتالىق قۇجاتتاما ازىرلەۋدە. ساراپتامالارى IV توقساندا شىعادى.
وتكەن كەزدەسۋدە ايتىلعانداي، ءساۋىر ايىندا "تاستاق" شاعىناۋدانىندا (گرانوۆسكيي كوشەسى، 96 مەكەنجايى بويىنشا) از قامتىلعان وتباسىلاردان شىققان بالالارعا باعىتتالعان «شىڭعا ورلەۋ» الەۋمەتتىك كلۋبىنىڭ ەكىنشى فيليالى اشىلدى.