«قازاقتەلەكوم» وزىنە قاتىستى كەز كەلگەن ماسەلەنىڭ ءتۇيىنىن نەگە وزىنەن ەمەس، وزگەدەن ىزدەيدى؟
«قازاقتەلەكوم» مەكەمەسىنىڭ قىزمەت كورسەتۋ جۇمىسىن سىنعا العان ماقالالارىمىزدان كەيىن «Alataý اqparat» ۇجىمىنىڭ رەداكسيالارىنا ۇلتتىق وپەراتوردىڭ الماتىداعى بولىمشەسىنە كوڭىلى تولمايتىن وقىرماندارىمىزدان شاعىم حاتتاردىڭ جاڭا لەگى كەلىپ ءتۇستى. رەداكسياعا شاعىمدانعانداردىڭ كوپشىلىگى – ومىردە تالاي كويلەك توزدىرعان قۇرمەتتى جاستاعى ءبىزدىڭ وقىرماندارىمىز. ولاردىڭ كوپشىلىگى ۇلتتىق بايلانىس وپەراتورىنىڭ ءوز قىزمەتتەرىنىڭ قۇنىن اشىق تۇردە «وسىرەتىنىن»، سويتە تۇرا، بايلانىستىڭ لايىقتى ساپامەن قامتاماسىز ەتپەيتىنىن، نە ءوز قىزمەتتەرىن مۇمكىندىگىنشە نەمقۇرايلى جاسايتىندارىن ايتادى.
زەينەتكەرلەر «الماتىتەلەكومعا» نەگە نارازى؟
89 جاستاعى زەينەتكەر ابليميت جاپپاروۆ ۇلتتىق بايلانىس وپەراتورىنىڭ «كىشى بالاسى» – «الماتىتەلەكوممەن» قانداي شيەلەنىسكەن قارىم-قاتىناستا ەكەنىن بايانداپ بەردى. ول رەداكسيامىزعا «الماتىتەلەكوم» باسشىلىعىنا جازىلعان مالىمدەمەنى جانە وعان «بولشەك بيزنەس بويىنشا ديۆيزيوننان» بەرىلگەن جاۋاپتى كورسەتتى – «قازاقتەلەكوم»اق-نىڭ تاعى ءبىر فيليالى وسىلاي اتالادى. «ديۆيزيون» ءسوزىنىڭ ءوزى ميليتاريستىك ماعىنا بەرەدى، وسىدان-اق وتاندىق بايلانىس وپەراتورى تۇتىنۋشىلارىمەن ءوز پايداسى ءۇشىن قانداي دا داۋعا بارۋعا دايىن ەكەنى جانە جالپى قانداي يدەولوگيا ۇستاناتىنى كورىنەتىندەي سەزىم تۋادى.
ابليميت ابدۋللا ۇلى «الماتىتەلەكوم» باسشىلىعىنا جازعان حاتىندا ونى تەلەفون ارقىلى كومپانيا قىزمەتكەرى باسقا وپەراتوردان باس تارتۋعا جانە «قازاقتەلەكوم» قىزمەتتەرىنە اۋىسۋعا قالاي كوندىرگەنى تۋرالى باياندايدى. زەينەتكەر ادەپكىدە بايلانىس وپەراتورى قىزمەتكەرىنىڭ ارباۋ-ۇسىنىسىنا كەلىسىپ، الدانىپ قالعانىن ايتادى.
– مەن اي سايىن جانە بىرنەشە مارتە قىزمەتتەردى تولەۋگە رەسمي شوت جىبەرۋلەرىڭىزدى سۇراپ كەلەمىن. وعان قاراماستان، ماعان قالالىق تەلەفون ارقىلى تولەم سوماسىن اۋىزشا حابارلاۋ جالعاسۋدا. مەن 89 جاستامىن، ەكىنشى توپتاعى مۇگەدەكپىن، ايىنا ءبىر رەت پوشتا بولىمشەسىنە كوممۋنالدىق تولەمدەردى تولەۋ ءۇشىن بارامىن، – دەلىنگەن زەينەتكەر مالىمدەمەسىندە.
«بۇل – قارجىلىق ءتارتىپتى ورەسكەل بۇزۋ»
ول «الماتىتەلەكوم» قىزمەتىنىڭ تولەمى تۋرالى جازبانى تۇبىرتەككە قوسۋدى بىرنەشە رەت سۇراعان. زەينەتكەرگە ءار جولى ۋادە بەرىلەدى ەكەن، الايدا ەشتەڭە وزگەرمەيدى.
– بۇل قارجىلىق ءتارتىپتى ورەسكەل بۇزۋ بولسا دا، تولەم سوماسىن اۋىزشا حابارلاۋ ءبىراز ۋاقىتقا جالعاستى، – دەپ شاعىمدانادى زەينەتكەر.
2022 جىلدىڭ اقپان ايىندا قۇرمەتتى جاستاعى الماتىلىقتىڭ ءوتىنىشى ورىندالادى – تولەم تۇبىرتەگىندە «الماتىتەلەكوم» بويىنشا جازبا پايدا بولدى. ءبىراق... بۇل قاعازدا 450 تەڭگە ءوسىماقى ەسەپتەلگەن. زەينەتكەر مۇنى ادامدى قورلاۋ دەپ سانايدى.
– تولەم شوتىن ۇسىنباي، ءتارتىپتى بۇزعان ءسىز، مەنىڭ جۇيكەمدى جۇقارتىپ، قىزمەتتەردى ۇنەمى وشىرەمىن دەپ قورقىتقان دا ءسىز، مەنىڭ كوممۋنالدىق تولەمدەر تۋرالى تۇبىرتەككە اي سايىنعى تولەم بويىنشا جازبانى قوسۋ تۋرالى ءوتىنىشىمدى ەلەمەگەن دە ءسىز. سوندا مەن نە ءۇشىن ايىپپۇل تولەۋىم كەرەك؟ – دەپ ابليميت جاپپاروۆ «الماتىتەلەكوم» باسشىلىعىنا جازعان حاتىندا تاڭدانىسىن بىلدىرەدى.
ساپاسىز قىزمەت – جاۋاپسىز قىزمەتكەر...
الماتىلىق اقساقالدىڭ بۇل نارازىلىعىنا تەك ءبىر ايدان كەيىن عانا جاۋاپ بەرىلگەن.
– 21 شىلدە كۇنى ماعان كوپتەن كۇتكەن جاۋاپ كەلدى (كوشىرمەسى ساقتاۋلى – رەداكسيا). شىنىمدى ايتسام، ولار مەنىڭ ءوتىنىشىمدى قاراپ، وزدەرىنە دە، ماعان دا پايدالى بولاتىن شەشىم شىعارادى دەپ كۇتتىم. ءبىراق ماعان بەرىلگەن ءبىر جاپىراق قاعازدا جاۋاپتىڭ نە ءنومىرى، نە كۇنى، ءتىپتى لاۋازىمدى ادامنىڭ قويىلعان قولى جوق. بۇل «قازاقتەلەكوم» قىزمەتكەرلەرىنىڭ تولىق جاۋاپسىزدىعىن كورسەتەدى. ۇلتتىق وپەراتوردىڭ تۇسىنىگىنشە، ەگەر حابارلاما جەتكىزىلمەسە، «قازپوشتا» كىنالى، سونداي-اق حابارلامانىڭ بار-جوعىنا قاراماستان، «قازاقتەلەكوم» قىزمەتىنە اقى تولەمەگەن ابونەنت كىنالى. ال "قازاقتەلەكومنىڭ" ءوزى «سۇتتەن اق، سۋدان تازا»، – دەيدى زەينەتكەر.
ابليميت جاپپاروۆ اقپان ايىندا «الماتىتەلەكوم» بولىمشەسىنە بارعان. وعان بايلانىس وپەراتورىنىڭ قىزمەتكەرى تۇپكىلىكتى ەسەپ ايىرىسۋ سوماسى – 4449،48 تەڭگە بولعانىن ءوز قولىمەن جازىپ بەرگەن. سونىمەن قاتار، وسى سوما وتەلگەندە، ونىڭ ەشقانداي قارىزى بولمايدى دەپ ۋادە بەرگەن، الايدا ناۋرىز ايىندا – 233،47 تەڭگەگە ابونەنتتىڭ قايتا قارىزى شىعادى.
– ءبىز، توقسان جاستاعى قارتتار مەن زەينەتكەرلەر، ۇيالى تەلەفوندى نەگىزىنەن تۋىستارىمىزبەن جانە جەدەل جاردەم بولىمشەسىمەن سويلەسۋ ءۇشىن قولدانامىز. وسىمەن تەلەفونداعى بار قاجەتتىلىگىمىز اياقتالادى. سوندىقتان «قازاقتەلەكومنىڭ» جاۋابىنان عانا مەن 24-تارماق (تەلەكوممۋنيكاسيا قىزمەتتەرىن كورسەتۋ شارتى – رەداكسيا) بويىنشا شوت نە تولەم تۋرالى تۇبىرتەك ۇسىنىلماسا دا، بارلىق قىزمەتتەرگە اقى تولەۋگە مىندەتتەلەتىنىمدى ءبىلدىم. ءقازىر بۇل تارماق «...ەشقانداي قىزمەت كورسەتىلمەسە دە» دەگەن سوزدەرمەن تولىقسا دا، تاڭقالماس ەدىم، – دەيدى زەينەتكەر.
ارداگەرلەر قامقورلىق پەن قولداۋعا ءزارۋ
ءسوز سوڭىندا ابليميت جاپپاروۆ رەداكسيامىزعا تاعى ءبىر زەينەتكەردىڭ وقيعاسىن ايتىپ بەردى. ول كىسى مۇمكىندىگى شەكتەۋلى جان بولسا دا، ءوزى ەڭبەك ارداگەرى. وعان ءوزىن «قازاقتەلەكومنىڭ» قىزمەتكەرى دەپ تانىستىرعان بويجەتكەن حابارلاسىپ، ارداگەردىڭ تەلەفونى باسقا بايلانىس تۇرىنە اۋىستىرىلاتىنىن ايتىپ، ەلەكتر قۋاتى جوعالعان جاعدايدا، بايلانىس وشەتىنىن ەسكەرتكەن. ارداگەرگە ءاردايىم مەديسينالىق كومەك جانە بايلانىس قاجەت بولعاندىقتان، مۇنداي وزگەرىستەردەن باس تارتقان. دەگەنمەن، ونى تىڭداعان ەشكىم بولعان جوق، ونىڭ تەلەفونى... جاي عانا ءوشىپ قالعان.
ابليميت جاپپاروۆ قالالىق ارداگەرلەر كەڭەسىنىڭ مۇشەسى رەتىندە جولداسىنا كومەكتەسۋگە تىرىسىپ، «قازاقتەلەكومعا» تىنىمسىز قوڭىراۋ شالادى. ءبىراق زەينەتكەردى ەلەپ-ەسكەرگەن، ەستىگەن ەشكىم بولمادى. سودان كەيىن ونىڭ تەلەفونى ىستەمەي قالدى…