اباي وبلىسىنىڭ ءۇرجار اۋدانىندا اليمەنت تولەمەگەن انا باس بوستاندىعىنان ايىرىلدى.
اباي وبلىسىنىڭ ءۇرجار اۋدانىندا تۇراتىن ايەل بالالارىنا اليمەنت تولەۋدەن جالتارىپ كەلگەن. ايەل اكىمشىلىك جاۋاپقا تارتىلىپ، زاڭدى جازا تاعايىندالدى. ءۇرجار اۋدانى بويىنشا سوت ورىنداۋشىلار مۇنداي جازا اليمەنت تولەمەي جۇرگەن باسقا بورىشكەرلەرگە ساباق بولاتىندىعى جونىندە ايتتى.
بۇگىنگە دەيىن ايەل ادامنىڭ بالالارى الدىنداعى قارىزى 2،7 ملن تەڭگەدەن اسقان. اباي وبلىسىنىڭ كامەلەتكە تولماعاندار ىستەرى جونىندەگى مامانداندىرىلعان سوتىنىڭ ۇكىمى بويىنشا ق ر قك-نىڭ 139-بابىمەن (بالالارىن كۇتىپ-باعۋعا ارنالعان قاراجاتتى تولەۋ جونىندەگى مىندەتتەردى ورىنداماۋ، ەڭبەككە قابىلەتسىز اتا-انالارىن، ەڭبەككە قابىلەتسىز جۇبايىن (زايىبىن) كۇتىپ-باعۋعا ارنالعان قاراجاتتى تولەۋدەن جالتارۋ) ءبىر جىلعا باس بوستاندىعىن شەكتەۋ جازاسى تاعايىندالىپ، ق ر قك-نىڭ 44-بابى 1 بولىگىمەن جىلىنا 100 ساعات ءماجبۇرلى ەڭبەككە تارتىلعان بولاتىن. ءبىراق ايەل سوت ۇكىمىن ورىنداماعان.
– اباي وبلىسى بويىنشا قاجد ءۇرجار اۋداندىق №1 پروباسيا قىزمەتىنىڭ ەسەبىنە الىنىپ، تاربيە جۇمىستارى وتكىزىلگەنىنە قاراماستان ازاماتشا قورىتىندى شىعارماعان. سوت جۇكتەگەن مىندەتتەردى ورىنداماي، قاساقانا اليمەنت تولەمەگەن جانە جۇمىسقا ورنالاسقىسى كەلمەگەن. ءۇرجار اۋداندىق سوت شەشىمىمەن بورىشكەر ايەل سوت زالىنان باس بوستاندىعىن شەكتەۋ جازاسىنىڭ وتەلمەگەن بولىگىنە باس بوستاندىعىنان ايىرۋ جازاسىنا سوتتالدى، – دەپ حابارلايدى پروباسيا قىزمەتىنىڭ اعا ينسپەكتورى ەلميرا مۋكيتانوۆا.