مەردىگەرمەن كەلىسىمشارت بۇزىلدى، قۇرىلىس جۇمىستارىن بۇزعانى ءۇشىن كومپانيادان 56،1 ملن. تەڭگە كولەمىندە تۇراقسىزدىق ايىبى وندىرىلەتىن بولادى
الماتى قالاسى مامانداندىرىلعان اۋدانارالىق ەكونوميكالىق سوتىنىڭ شەشىمىمەن ءاليا مولداعۇلوۆا مەن مانشۇك مامەتوۆا سكۆەرىن قايتا جاڭارتۋ جۇمىستارىن جۇرگىزگەن مەردىگەر ۇيىم («شاح» قۇرىلىس كومپانياسى ج ش س) مەملەكەتتىك ساتىپ الۋدىڭ تالاپتاردى تولىق ورىندامايتىن قاتىسۋشى رەتىندە تانىلدى، دەپ حابارلايدى اlmaty-akshamy.kz.
الماتى قالاسى ەكولوگيا جانە قورشاعان ورتا باسقارماسى جاڭا مەردىگەردى انىقتاۋعا قايتا كونكۋرس جاريالادى. كونكۋرستىق راسىمدەردىڭ اياقتالۋىنىڭ بولجامدى كۇنى - 2024 جىلعى 25 مامىر، سكۆەردى رەكونسترۋكسيالاۋ جۇمىستارىنىڭ تولىق ورىندالۋى - اعىمداعى جىلدىڭ سوڭىنا دەيىن.
ەستەرىڭىزگە سالا كەتەيىك، «الماتى ق. ەكولوگيا جانە قورشاعان ورتا باسقارماسى» كمم مەن «شاح «قۇرىلىس كومپانياسى» ج ش س اراسىندا سكۆەردى اباتتاندىرۋ جانە رەكونسترۋكسيالاۋ جۇمىستارىن جۇرگىزۋگە شارت 2022 جىلدىڭ 15 قىركۇيەگىندە جاسالعان. نىساندى اياقتاۋ 2023 جىلدىڭ 31 مامىرىنا دەيىن جوسپارلانعان. جوبادا سكۆەر اۋماعىندا ورنالاسقان «ودۋۆانچيك» جانە «اققۋ» سۋبۇرقاق كەشەندەرىن قايتا جاڭارتۋ، تەحنولوگيالىق جابدىقتاردى، قاپتاۋ ماتەريالدارىن اۋىستىرۋ جانە تەحنيكالىق جايلاردى جوندەۋ جۇمىستارى كوزدەلگەن بولاتىن؛ قولدانىستاعى اسفالتتى برۋسچاتكالارعا اۋىستىرۋ، شاعىن ارحيتەكتۋرالىق فورمالاردى (ورىندىقتار مەن قوقىس تاستاۋعا ارنالعان جاشىكتەردى)، اۆتوماتتى سۋارۋ جۇيەسىن ورناتۋ جانە درەناج جۇيەسىن، سىرتقى جارىقتاندىرۋ جۇيەسىن قايتا قۇرۋ جانە قولدانىستاعى جارىقتاندىرۋ قۇرىلعىلارىن اۋىستىرۋ.
اتالعان نىساندا جۇمىستار ۋاقتىلى جۇرگىزىلمەگەندىكتەن، باسقارما مەردىگەر ۇيىممەن شارتتى بۇزۋ، ءونىم بەرۋشىنى مەملەكەتتىك ساتىپ الۋعا تالاپتاردى ورىندامايتىن قاتىسۋشى دەپ تانۋ جانە تۇراقسىزدىق ايىبىن ءوندىرىپ الۋ تۋرالى سوتقا تالاپ ارىز جولدادى. تالاپ ارىزدار تولىعىمەن قاناعاتتاندىرىلدى.