تاراپتار تۋريزم، مادەنيەت جانە ازاماتتىق اۆياسيا سالالارىنداعى ىنتىماقتاستىقتى كەڭەيتۋ ماسەلەلەرىن تالقىلادى.
ق ر پرەمەر-مينيسترى ءاليحان سمايىلوۆ ساۋد ارابياسى كورولدىگىنىڭ قاجىلىق جانە ۋمرا ءمينيسترى تاۋفيك بەن فاۋزان ال-رابيامەن كەزدەسۋ وتكىزدى، دەپ حابارلايدى Almaty-akshamy.kz ۇكىمەتتىڭ رەسمي رەسۋرسىنا سىلتەمە جاساپ.
پرەمەر-مينيستر وتكەن جىلدار ىشىندە قازاقستان رەسپۋبليكاسى مەن ساۋد ارابياسى اراسىندا دوستىق جانە سىندارلى قاتىناستار ورناعانىن اتاپ ءوتتى.
«الەم مۇسىلماندارى قاجىلىق پارىزىن وتەۋدى اسىعا كۇتەدى. بيىل ءبىزدىڭ 4 مىڭ وتانداسىمىز دا وسىنداي مۇمكىنشىلىككە يە بولدى. بۇعان ساۋد ارابياسى باسشىلىعىنىڭ نازارى مەن كۇش-جىگەرىنىڭ ارقاسىندا قول جەتكىزىلدى»، — دەدى ءاليحان سمايىلوۆ.
سونداي-اق ول استانادا وتكەن الەمدىك جانە ءداستۇرلى دىندەر كوشباسشىلارىنىڭ VII سەزىنە بەلسەندى قاتىسقانى ءۇشىن كورولدىك وكىلدەرىنە العىسىن ءبىلدىردى.
«ەلدەر اراسىنداعى ىنتىماقتاستىق كەڭەيىپ، نىعايا تۇسەتىنىنە سەنىمدىمىن»، — دەدى ءاليحان سمايىلوۆ.
ءوز كەزەگىندە تاۋفيك بەن فاۋزان ءال-رابيا تۇراقتى اۋە رەيستەرىنىڭ اشىلۋى ەكىجاقتى قارىم-قاتىناستى نىعايتۋعا قوسىمشا سەرپىن بەرەتىنىن اتاپ ءوتتى.
«ساپار اياسىندا مەن قازاقستاندىق ارىپتەستەرىممەن ءبىرقاتار تابىستى كەزدەسۋلەر وتكىزدىم. تىكەلەي تۇراقتى رەيستەردىڭ اشىلۋى قازاقستاننان كەلەتىن تۋريستەر مەن قاجىلىققا بارۋشىلار سانىنىڭ وسۋىنە ىقپال ەتەدى دەپ ۇمىتتەنەمىز»، — دەدى تاۋفيك بەن فاۋزان ءال-رابيا.