ءاليحان اسحان ۇلى سمايىلوۆتىڭ كانديداتۋراسىن دەپۋتاتتار ءبىراۋىزدان قولدادى.
ق ر پرەمەر-مينيسترى لاۋازىمىنا ءاليحان سمايىلوۆ تاعايىندالدى، دەپ حابارلايدى Almaty-akshamy.kz
بۇگىنگى ءماجىلىس وتىرىسىنا بەينەبايلانىس ارقىلى قاتىسقان مەملەكەت باسشىسى قاسىم-جومارت توقايەۆ ق ر پرەمەر-مينيسترى لاۋازىمىنا تاعايىنداۋعا كەلىسىم بەرۋ ءۇشىن ءاليحان اسحان ۇلى سمايىلوۆتىڭ كانديداتۋراسىن دەپۋتاتتاردىڭ قاراۋىنا ۇسىنعان بولاتىن.
تالقىلاۋ بارىسىندا ءماجىلىس دەپۋتاتتارى پرەزيدەنتتىڭ ۇسىنىسىن ءبىراۋىزدان قولداپ، ءاليحان سمايىلوۆتىڭ ۇكىمەت باسشىسى بولىپ تاعايىندالۋىنا كەلىسىم بەردى.
ءاليحان اسحان ۇلى سمايىلوۆ 1972 جىلى الماتى قالاسىندا دۇنيەگە كەلگەن. 1994 جىلى ءال-فارابي اتىنداعى قازاق مەملەكەتتىك ۇلتتىق ۋنيۆەرسيتەتىن «قولدانبالى ماتەماتيكا» ماماندىعى بويىنشا ءتامامداعان.
1996 جىلى — ق ر پرەزيدەنتى جانىنداعى قازاقستان مەنەدجمەنت، ەكونوميكا جانە بولجامداۋ ينستيتۋتىنىڭ مەملەكەتتىك باسقارۋ ماگيسترى دارەجەسىنە يە بولدى.
1993–1999 جىلدارى — «ا-ينۆەست» ينۆەستيسيالىق–جەكەشەلەندىرۋ قورىنىڭ باس مامانى؛ ءبولىم باسشىسىنىڭ ورىنباسارى؛ ق ر ۇلتتىق ستاتيستيكا اگەنتتىگىنىڭ باسقارما باسشىسى؛ ق ر ستاتيستيكالىق جوسپارلاۋ جانە رەفورمالار جونىندەگى اگەنتتىگىنىڭ ستاتيستيكا جانە تالداۋ كوميتەتى ءتوراعاسىنىڭ ورىنباسارى؛ باس ساراپشى، ەكونوميكا سەكتورىنىڭ مەڭگەرۋشىسى، ق ر پرەزيدەنتى اكىمشىلىگىنىڭ مەملەكەتتىك ينسپەكتورى بولىپ قىزمەت اتقارعان.
1999–2003 جىلدارى — ق ر ستاتيستيكا اگەنتتىگىنىڭ ءتوراعاسى.
2003–2006 جىلدارى — ق ر سىرتقى ىستەر ۆيسە-مينيسترى، «ەكسپورتتىق نەسيەلەر مەن ينۆەستيسيالاردى ساقتاندىرۋ جونىندەگى مەملەكەتتىك ساقتاندىرۋ كومپانياسى» اق باسقارما ءتوراعاسى.
2006–2009 جىلدارى — ق ر قارجى ۆيسە-مينيسترى، «قازاگرو» ۇبح پرەزيدەنتى.
2009–2014 جىلدارى — ق ر ستاتيستيكا اگەنتتىگىنىڭ ءتوراعاسى.
2014–2015 جىلدارى — ق ر ۇلتتىق ەكونوميكا مينيسترلىگىنىڭ ستاتيستيكا جونىندەگى كوميتەتىنىڭ ءتوراعاسى.
2015–2018 جىلدارى — ق ر پرەزيدەنتىنىڭ كومەكشىسى.
2018 جىلعى قىركۇيەكتەن باستاپ 2019 جىلعى اقپانعا دەيىن — قارجى ءمينيسترى.
2019 جىلعى 25 اقپاندا پرەزيدەنت جارلىعىمەن پرەمەر-مينيستردىڭ ءبىرىنشى ورىنباسارى – قارجى ءمينيسترى قىزمەتىنە تاعايىندالدى.
2021 جىلى 18 قاڭتاردا ق ر پرەزيدەنتىنىڭ جارلىعىمەن پرەمەر-مينيستردىڭ ءبىرىنشى ورىنباسارى بولىپ قايتا تاعايىندالعان ەدى.