پرەمەر-مينيستر ءاليحان سمايىلوۆ قۇزىرلى ورگاندارعا مەكتەپ فورماسى مەن كانسەلياريالىق تاۋارلار باعاسىن ۇستاپ تۇرۋ بويىنشا ءبىرقاتار شۇعىل شارا قابىلداۋدى تاپسىردى، دەپ حابارلايدى Almaty-akshamy.kz Inform.kz-كە سىلتەمە جاساپ.
«ساناۋلى كۇندەردەن سوڭ جاڭا وقۋ جىلى باستالادى. اتا-انالار بالالارىنىڭ مەكتەپ فورماسى مەن اياق كيىمدەرىن، وقۋ قۇرالدارىن تۇگەندەۋ قامىنا كىرىستى. الايدا ولاردىڭ باعاسى ەڭ وزەكتى ماسەلەنىڭ ءبىرى بولىپ وتىر.
البەتتە، باعا ساياساتىنا الەمدىك لوگيستيكانىڭ قىمباتتاۋى، شيكىزات پەن قىزمەتتەردىڭ قۇنى تىكەلەي اسەر ەتەدى. ءبىراق ۇكىمەت پەن اكىمدىكتەردە قازاقستاندىقتار ءۇشىن قارجىلىق شىعىنداردى جەڭىلدەتۋگە مۇمكىندىك بەرەتىن مەحانيزمدەر بار.
بۇل رەتتە، مەن ءبىرقاتار شۇعىل شارالاردى قابىلداۋدى تاپسىردىم»، - دەدى پرەمەر-مينيستر.
بىرىنشىدەن، مەكتەپ فورماسىنا باعانى ۇستاپ تۇرۋ ءۇشىن يندۋستريا مينيسترلىگى «اتامەكەن» ۇكپ-مەن جانە اكىمدىكتەرمەن بىرلەسىپ، جەڭىل ونەركاسىپ قاۋىمداستىعىنىڭ، ءىرى تىگىن سەحتارى مەن اتەلەلەردىڭ وكىلدەرىمەن كەلىسسوزدەر جۇرگىزەدى؛
ەكىنشىدەن، ساۋدا مينيسترلىگى «اتامەكەن» ۇكپ-مەن جانە اكىمدىكتەرمەن بىرلەسىپ، ءىرى ساۋدا ورتالىقتارىمەن جانە بازارلارمەن كانسەلياريالىق تاۋارلارعا، سومكەلەر مەن اياق كيىمدەرگە جانە باسقا دا كەرەك-جاراقتارعا باعالاردى ۇستاپ تۇرۋ ماسەلەلەرىن پىسىقتايدى؛
ۇشىنشىدەن، اكىمدىكتەر «اتامەكەن» ۇكپ-مەن بىرلەسىپ، وبلىس جانە اۋدان ورتالىقتارىندا، نۇر-سۇلتان، الماتى، شىمكەنت قالالارىندا تومەندەتىلگەن باعامەن مەكتەپ جارمەڭكەلەرىن، سونداي-اق جىلجىمالى مەكتەپ اۆتودۇكەندەرىنىڭ شالعاي اۋىلدارعا شىعۋىن ۇيىمداستىرادى؛
تورتىنشىدەن، اكىمدىكتەر تۇرمىسى تومەن وتباسىلارعا مەملەكەتتىك ورگاندار مەن بيزنەس-قۇرىلىمداردى اتاۋلى كومەك كورسەتۋ ءۇشىن بەكىتىپ بەرەتىن بولادى؛
بەسىنشىدەن، بۇگىنگى تاڭدا مۇقتاج وتباسىلاردى قولداۋ ءۇشىن قۇرىلعان «جاپپاي وقىتۋ» قورىنا وڭىرلەردىڭ ءبارى بىردەي قاراجات ءبولىپ وتىرعان جوق. سوندىقتان اكىمدەرگە اتالعان جوبانى قاجەتتى كولەمدە قارجىلاندىرۋدى قامتاماسىز ەتۋ تاپسىرىلدى.
«قۇرمەتتى دوستار، ءبىلىمدى ۇرپاق – ءبىزدىڭ باستى قۇندىلىعىمىز، سوندىقتان وقۋدىڭ بارلىق كەزەڭىندە ولارعا قولايلى جاعداي جاساۋ، قامقورلىققا الىپ، كوڭىل ءبولۋ – ءبىزدىڭ نەگىزگى مىندەتىمىز. وسىعان بايلانىستى مەملەكەتتىك ورگاندار مەن اكىمدىكتەر مەن بەلگىلەپ بەرگەن باعىتتار بويىنشا جۇمىس ىستەۋى كەرەك. بۇل ماسەلە ۇكىمەتتىڭ باقىلاۋىندا بولادى.
P. S. كەشە حالىق تىعىز ورنالاسقان ەسىل اۋدانىنداعى جالپى ءبىلىم بەرەتىن مەكتەپ قۇرىلىسىنىڭ بارىسىمەن تانىستىم. وقۋ ورنى بىردەن بىرنەشە مەكتەپتە ورىن تاپشىلىعى ماسەلەسىن شەشەدى»، دەپ جازدى ءاليحان سمايىلوۆ.