ق ر پرەمەر-مينيسترى ءاليحان سمايىلوۆ پەن ءباا مينيسترلەر كابينەتى ىستەرى جونىندەگى ءمينيسترى مۇحاممەد ال-گارگاۋي مەملەكەتارالىق ىنتىماقتاستىقتىڭ نەگىزگى ماسەلەلەرىن تالقىلادى.
استانادا وتكەن كەزدەسۋدە تاراپتار ساۋدا-ەكونوميكالىق ءوزارا ءىس-قيمىلدى ارتتىرۋ پەرسپەكتيۆالارىن، ينۆەستيسيالىق ىنتىماقتاستىق، مەملەكەتتىك باسقارۋ سالاسىنداعى تاجىريبە الماسۋ قادامدارىن جانە باسقا دا ماسەلەلەردى قاراستىردى، دەپ حابارلايدى Almaty-akshamy.kz Primeminister.kz-كە سىلتەمە جاساپ.
پرەمەر-مينيستر بىرىككەن اراب امىرلىكتەرى قازاقستاننىڭ پارسى شىعاناعى ايماعىنداعى نەگىزگى ساۋدا-ەكونوميكالىق سەرىكتەستەرىنىڭ ءبىرى ەكەنىن ەرەكشە اتاپ ءوتتى. ماسەلەن، وتكەن جىلدىڭ قورىتىندىسىنا سايكەس ەكى ەل اراسىنداعى تاۋار اينالىمى $633 ملن-دى قۇرادى. سونىمەن قاتار جاقىن ارادا ءوزارا ساۋدا اۋقىمىن كەڭەيتۋ ارقىلى بۇل كورسەتكىشتى $1 ملرد-قا دەيىن ارتتىرۋعا مۇمكىندىك بار.
ءاليحان سمايىلوۆ اتاپ وتكەندەي، ينۆەستيسيالىق ءوزارا ءىس-قيمىل جاڭا جوبالارمەن دە قولداۋ تاۋىپ وتىر. ماسەلەن، قازاقستانعا تارتىلعان امىرلىكتەر ينۆەستيسياسى وتكەن جىلى – 27%-عا ءوسىپ، شامامەن $420 ملن-عا دەيىن جەتكەن.
«ءبىرىنشى جارتىجىلدىقتا بۇل كورسەتكىش 3 ەسەدەن استام ءوستى جانە ءقازىردىڭ وزىندە $400 ملن-نان استى. ءبىز بارلىق باسىم باعىتتار بويىنشا ودان ءارى ىنتىماقتاستىققا اشىقپىز جانە امىرلىكتەر ينۆەستورلارىنا ولاردىڭ باستامالارىن ىسكە اسىرۋدا جان-جاقتى قولداۋ كورسەتۋگە دايىنبىز»، — دەدى پرەمەر-مينيستر.
سونداي-اق ول بۇگىندە قازاقستان مەن ءباا اراسىندا مەملەكەتتىك باسقارۋ سالاسىنداعى ءوزارا ءىس-قيمىل بەلسەندى دامىپ كەلە جاتقانىن ايتتى. اقپان ايىندا دۋبايدا وتكەن دۇنيەجۇزىلىك ۇكىمەت ءسامميتى اياسىندا ءتيىستى مەموراندۋمعا قول قويىلدى.
«ءبىز تاجىريبە الماسۋدىڭ بۇل مۇمكىندىگىن جوعارى باعالايمىز جانە مەملەكەتتىك جۇيەنىڭ تيىمدىلىگىن ارتتىرۋ ءۇشىن امىرلىكتەردىڭ وزىق تاجىريبەسىن زەردەلەۋگە مۇددەلىمىز»، — دەدى ءاليحان سمايىلوۆ.
ءوز كەزەگىندە مۇحاممەد ال-گارگاۋي بىرىككەن اراب امىرلىكتەرى قازاقستانمەن قارىم-قاتىناستى دامىتۋعا ۇلكەن ءمان بەرەتىنىن باسا ايتتى.
«ءبىز ەكونوميكالىق سالادا وڭ ناتيجەلەردى كورىپ وتىرمىز. ارينە، بىزدە ورتاق ۇلكەن الەۋەت بار. ەكونوميكالىق دامۋمەن قاتار، ءبىزدىڭ حالقىمىزدىڭ اراسىنداعى دوستىقتىڭ، تۋريستەر سانىنىڭ ارتا تۇسكەنىن دە كورىپ وتىرمىز. ءبىز بۇل كورسەتكىشتەردىڭ بارلىعى ودان ءارى وسەدى دەپ ۇمىتتەنەمىز»، — دەدى ول.