ق ر پرەمەر-مينيسترى ءاليحان سمايىلوۆتىڭ توراعالىعىمەن وتكەن ومو مەن جاو ءوزارا ءىس-قيمىل جونىندەگى ۇيلەستىرۋ شتابىندا «اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسىن ىسكە اسىرۋ بارىسى قارالدى، دەپ حابارلايدى Almaty-akshamy.kz primeminister.kz.
دەنساۋلىق ساقتاۋ ءمينيسترى اجار عينيات الداعى ەكى جىلدا اۋىلداردا جاڭا 655 العاشقى مەديسينالىق-سانيتاريالىق كومەك كورسەتۋ نىساندارىن سالۋ بويىنشا جۇرگىزىلىپ جاتقان جۇمىستى باياندادى.
ولاردىڭ قاتارىندا فيزيوتەراپيا كابينەتى مەن ءدارىحانانى، فەلدشەرلىك-اكۋشەرلىك بەكەتتەردى (اقپاراتتاندىرۋ كابينەتى قوسىلدى) جانە دارىگەرلىك امبۋلاتوريالاردى (ەدش زالى قوسىلدى) قامتيتىن زاماناۋي مەديسينالىق بەكەتتەر بار.
فيزيوتەراپيا كابينەتتەرى ەلەكتروتەراپيا، ماگنيتوتەراپيا، ۋلترادىبىستىق تەراپيا، فوتوتەراپيا، ۋلتراكۇلگىن تەراپياسى، ينگالياتورلار جانە باسقا دا قۇرىلعىلارمەن جابدىقتالاتىنى اتاپ ءوتىلدى.
ەشد زالىندا ۇساق موتوريكانى قالپىنا كەلتىرۋ مەن دامىتۋعا ارنالعان ءتۇرلى ترەناجەرلار، ەرگوتەراپياعا ارنالعان ستەندتەر، شۆەد قابىرعاسى، كينەزوتەراپياعا ارنالعان جابدىقتار قاراستىرىلعان.
سونىمەن قاتار بارلىق جاڭا مساك نىساندارى تەلەمەديسينانى ۇيىمداستىرۋ ءۇشىن كومپيۋتەرلىك جانە مەديسينالىق جابدىقتارمەن قامتاماسىز ەتىلگەن.
ۇلتتىق جوبا شەڭبەرىندە ينسۋلت جانە كارديولوگيالىق ورتالىقتار، وڭالتۋ، تراۆماتولوگيا جانە ورتوپەديا، حيرۋرگيا، رەانيماسيا، قارقىندى تەراپيا بولىمشەلەرى اشىلىپ، كوپبەيىندى ورتالىق اۋداندىق 32 اۋرۋحانانى جاڭعىرتۋ جانە كۇردەلى جوندەۋ، سونداي-اق زاماناۋي مەديسينالىق جابدىقتارمەن جاراقتاندىرۋ جۇمىستارى جۇرگىزىلەدى.
سونىمەن قاتار اۋىلدىق دەنساۋلىق ساقتاۋ مەكەمەلەرى ءۇشىن 1100 مەديسينا قىزمەتكەرىن دايارلاۋ جوسپارلانعان.
ولاردىڭ اراسىندا دارىگەرلەر، مەدبيكەلەر، فەلدشەرلەر مەن اكۋشەرلەر بار.
يندۋستريا جانە ينفراقۇرىلىمدىق دامۋ ءمينيسترى مارات قارابايەۆ جاڭا مەديسينالىق نىسانداردىڭ ۇلگىلىك جوبالارىن جەرگىلىكتى جاعدايعا بەيىمدەۋ جۇمىستارى تۋرالى ايتتى.
ۇلتتىق جوبانىڭ وڭىرلەردە جۇزەگە اسىرىلۋ بارىسى تۋرالى اتىراۋ وبلىسىنىڭ اكىمى سەرىك شاپكەنوۆ، قوستاناي وبلىسىنىڭ اكىمى قۇمار اقساقالوۆ، ماڭعىستاۋ وبلىسىنىڭ اكىمى نۇرلان نوعايەۆ جانە قاراعاندى وبلىسىنىڭ اكىمى ەرماعانبەت بولەكپايەۆ باياندادى.
ۇكىمەت باسشىسى جيىندى قورىتىندىلاي كەلە، ۇلگىلىك جوبالاردى جەرگىلىكتى جاعدايمەن بايلانىستىرۋ، سونداي-اق قۇرىلىس الاڭدارىنا ينجەنەرلىك كوممۋنيكاسيا مەن جول تارتۋ جۇمىسىن جەدەلدەتۋدى تالاپ ەتتى.
سونىمەن قاتار ءاليحان سمايىلوۆ دەنساۋلىق ساقتاۋ مينيسترلىگى ۇلتتىق جوبانى ۇيلەستىرۋ مەن باقىلاۋدى كۇشەيتۋى قاجەت ەكەنىن اتاپ ءوتتى.