پرەزيدەنت ۇلتتىق ەكونوميكا ءمينيسترى الىبەك قۋانتىروۆتى قابىلدادى
مەملەكەت باسشىسىنا ەلىمىزدىڭ بيىلعى 10 ايداعى الەۋمەتتىك-ەكونوميكالىق دامۋىنىڭ الدىن-الا ناتيجەلەرى تۋرالى ەسەپ بەرىلدى، دەپ حابارلايدى almaty-akshamy.kz
قاسىم-جومارت توقايەۆقا 2023 جىلدىڭ قورىتىندىسى بويىنشا جالپى ىشكى ءونىمنىڭ ءوسىمى 5 پايىز كولەمىندە بولادى دەگەن بولجام جاسالىپ وتىرعانى جونىندە باياندالدى. ءبىرىنشى جارتىجىلدىقتا شەتەلدەن تارتىلعان تىكەلەي ينۆەستيسيا كولەمى 13،3 ميلليارد دوللارعا جەتتى. جىلدىق ينفلياسيا 2 ەسە، ياعني 10،8 پايىزعا دەيىن (اقپان ايىندا 21،3 پايىز) تومەندەدى.
الىبەك قۋانتىروۆ جالپى ىشكى ونىمدەگى شاعىن جانە ورتا بيزنەستىڭ ۇلەسى 36،4 پايىزعا جەتكەنىن مالىمدەدى. بۇل – رەكوردتىق كورسەتكىش. شاعىن جانە ورتا بيزنەس وندىرگەن ءونىم كولەمى 28 تريلليون تەڭگەدەن استى. بۇل سالادا 4،3 ميلليون ادام جۇمىسپەن قامتىلعان. بيىل 9 مىڭ جوباعا سۋبسيديا بەرىلدى. نەسيەنىڭ جالپى كولەمى – 669 ميلليارد تەڭگە.
مەملەكەت باسشىسىنا بيزنەستى تەكسەرۋ ءىسىن 2 ەسە ازايتۋ ءۇشىن كاسىپكەرلىك سالاسىنا جاڭا رەتتەۋ ساياساتى ەنگىزىلەتىنى تۋرالى مالىمەت بەرىلدى. مىندەتتى تالاپتار رەەسترى جاسالىپ، سىن-قاتەرلەردى باسقارۋ جۇيەسى اۆتوماتتاندىرىلادى.
قاسىم-جومارت توقايەۆقا جاڭا بيۋدجەت جانە سالىق كودەكستەرىنىڭ ازىرلەنۋ بارىسى، سونداي-اق ينۆەستيسيالىق ساياسات، مەملەكەتتىك-جەكەشەلىك ارىپتەستىكتى دامىتۋ شارالارى تۋرالى ايتىلدى.
بۇدان بولەك، ۇلتتىق ەكونوميكا ءمينيسترى «ءتاريفتى ينۆەستيسياعا ايىرباستاۋ» باعدارلاماسىنىڭ جۇزەگە اسىرىلۋى جونىندە باياندادى. اتاپ ايتقاندا، بيىل 267 ميلليارد تەڭگە ينۆەستيسيا تارتۋ، 5،8 مىڭ شاقىرىم جەلىنى جوندەۋ، ءتۇرعىن-ۇي كوممۋنالدىق شارۋاشىلىق سالاسى قىزمەتكەرلەرىنىڭ جالاقىسىن 50 پايىزعا كوتەرۋ، جەلىلەردىڭ توزۋ دەڭگەيىن 3،2 پايىزعا ازايتۋ جوسپارلانىپ وتىر.
پرەزيدەنتكە اۋىلدىق اۋماقتاردى دامىتۋ تۇجىرىمداماسىنىڭ ىسكە اسىرىلۋى جايىندا مالىمەت بەرىلدى. «اۋىل – ەل بەسىگى» باعدارلاماسى ىسكە قوسىلعالى بەرى رەسپۋبليكالىق بيۋدجەتتەن قارجىلاندىرۋ كولەمى 7 ەسە ارتتى. بيىل 771 اۋىلدا 1،8 مىڭ جوبانى ورىنداۋ جوسپارلانىپ وتىر.
كەزدەسۋ سوڭىندا قاسىم-جومارت توقايەۆ ساپالى جانە ورنىقتى ەكونوميكالىق ءوسىمدى قامتاماسىز ەتۋ، سونداي-اق رەفورمالاردى ءتيىمدى جۇرگىزۋ جۇمىستارىن جالعاستىرۋدى تاپسىردى.