تۇركىستان وبلىسىنداعى الاپات ورتتەن امان قالعان بالانىڭ جاعدايى وتە اۋىر. ال ەكى ەرەسەك ادامنىڭ از دا بولسا بەتى بەرى قاراعان، - دەپ حابارلايدى aqshamnews.kz ءتىلشىسى ktk.kz-كە سىلتەمە جاساپ.
"بۇگىندە ەكى ەرەسەك ادامنىڭ جاعدايى تۇراقتى. زارداپ شەككەندەر شىمكەنتكە جەتكىزىلىپ، ولارعا كومەك كورسەتىلىپ جاتىر. دەگەنمەن بالانىڭ جاعدايى وتە اۋىر. ماماندار كەڭەس بەرىپ، ەم-دومىن تۇزەتىپ، بالانىڭ جاعدايىن باعالاپ وتىر. دەنساۋلىق ساقتاۋ مينيسترلىگى جاعدايدى قاداعالاپ وتىر"، - دەدى دەنساۋلىق ساقتاۋ ۆيسە-مينيسترى تيمۋر سۇلتانعازييەۆ.
جەتىساي اۋدانىنىڭ العاباس اۋىلىنداعى ءورت وتكەن سەيسەنبى كۇنى بولعان. ەكى قاباتتى ۇيدە تۇتانعان ءورت 12 ادامنىڭ ءومىرىن جالماعان ەدى. ونىڭ توعىزى - بالا. اعايىندى جىگىتتەر بالا-شاعاسىمەن تويدان كەلىپ شىرت ۇيقىعا كەتكەن بەتى ەكەن. ورتسوندىرۋشىلەر ءبىرىنشى ەس-تۇسسىز جاتقان ءۇش ادامدى قۇتقارىپ، اۋرۋحاناعا جەتكىزدى. امان قالعان ەكى ەرەسەك ادامنىڭ قازىرگى جاعدايى تۇراقتى. ال كىشكەنتاي بالا ءحال ۇستىندە. وعان كومەك كورسەتۋ ءۇشىن الماتىدان ارنايى جوعارى بىلىكتى ماماندار شاقىرىلىپتى.