مەملەكەتتىڭ قولداۋىنا مۇقتاج ازاماتتاردى الەۋمەتتىك قورعاۋ مەملەكەتتىك ساياساتتىڭ نەگىزگى باعىتتارىنىڭ ءبىرى بولىپ تابىلادى، دەپ حابارلايدى aqshamnews.kz.
سوندىقتان وسى سالاداعى جەمقورلىق كورىنىستەرى سىبايلاس جەمقورلىققا قارسى قىزمەتتىڭ تۇراقتى نازارىندا بولادى.
بيىل الەۋمەتتىك سالادا 95 جەمقورلىق قىلمىس تىركەلىپ، 58 ادام اشكەرەلەندى، 34 ادام سوتتالدى.
ماسەلەن، سىبايلاس جەمقورلىققا قارسى قىزمەتتىڭ ماڭعىستاۋ وبلىسى بويىنشا دەپارتامەنتى «№2 جاڭاوزەن قالالىق ەمحاناسى» شجق مكك ديرەكتورى مەن باس بۋحگالتەرىنە قاتىستى سوتقا دەيىنگى تەرگەۋدى اياقتادى.
ولار مەملەكەتتىك ساتىپ الۋ شارتى شەڭبەرىندە مەديسينالىق بۇيىمداردى جەتكىزبەستەن جەكە كومپانيانىڭ شوتىنا 10،5 ملن تەڭگە سوماسىندا اقشا اۋدارۋ ارقىلى قاراجات جىمقىردى دەپ كۇدىكتەلۋدە.
سوتتىڭ سانكسياسىمەن كاسىپورىن ديرەكتورى قاماۋعا الىندى.
قىلمىستىق-پروسەستىك كودەكستىڭ 201-بابىنا سايكەس وزگە اقپارات جاريا ەتۋگە جاتپايدى.
وسى جىلدىڭ 26 تامىزىندا اتىراۋ قالاسىنىڭ سوتى №4 اتىراۋ قالالىق ەمحاناسىنىڭ ديرەكتورى ە. سابيروۆقا، شارۋاشىلىق مەڭگەرۋشىسى ا. ءالجانوۆاعا، باس بۋحگالتەر م. دۇيسەنعالييەۆاعا جانە كاسىپكەر ا. ەرالييەۆاعا قاتىستى ۇكىم شىعاردى.
الدىن الۋ شارالارى شەڭبەرىندە سوت پروسەسى اشىق رەجيمدە وتكىزىلدى.
پروسەسكە ونلاين تۇردە وبلىستىق دەنساۋلىق ساقتاۋ باسقارماسىنىڭ جانە ونىڭ 28 ۆەدومستۆولىق باعىنىستى ۇيىمدارىنىڭ قىزمەتكەرلەرى قوسىلدى.
سوتتالۋشىلار زاڭناما تالاپتارىن بۇزا وتىرىپ جاسالعان شارتتار شەڭبەرىندە ءىس جۇزىندە قىزمەت كورسەتۋسىز كاسىپكەرگە 231،8 ملن تەڭگە سوماسىندا اقشا اۋدارۋ جولىمەن قاراجات جىمقىرعانى ءۇشىن كىنالى دەپ تانىلدى.
سوت ۇكىمىمەن ولارعا 5 جىلدان 7 جىلعا دەيىنگى مەرزىمگە باس بوستاندىعىنان ايىرۋ جازاسى تاعايىندالدى.
سونداي-اق، ەمحانا باسشىسى سابيروۆ ءومىر بويى مەملەكەتتىك قىزمەتتە جانە كۆازيمەملەكەتتىك سەكتور سۋبەكتىلەرىندە قىزمەت اتقارۋ قۇقىعىنان ايىرىلدى. ءالجانوۆا، دۇيسەنعالييەۆا جانە ەرالييەۆا مەملەكەتتىك ۇيىمداردا 7 جىل مەرزىمگە ماتەريالدىق-جاۋاپتى لاۋازىمداردى اتقارۋ قۇقىعىنان ايىرىلدى.
سوت ۇكىمى زاڭدى كۇشىنە ەنگەن جوق.