كودەكستىڭ ماڭىزدى جاڭالىعىنىڭ ءبىرى – زەينەتاقىنى كەزەڭ-كەزەڭمەن ارتتىرۋ.
ق ر پرەمەر-مينيسترى ءاليحان سمايىلوۆتىڭ توراعالىعىمەن وتكەن ۇكىمەت وتىرىسىندا بيىلعى 1 شىلدەدەن باستاپ قولدانىسقا ەنەتىن جاڭا الەۋمەتتىك كودەكستىڭ نورمالارىن ىسكە اسىرۋ ماسەلەلەرى قارالدى، دەپ حابارلايدى Almaty-akshamy.kz
پرەمەر-مينيستردىڭ ايتۋىنشا، جاڭا كودەكستە ۇسىنىلىپ وتىرعان شارالار الەۋمەتتىك قورعاۋ جۇيەسىن حالىقارالىق ستاندارتتارعا ساي قايتا رەتكە كەلتىرۋگە مۇمكىندىك بەرەدى.
«وسىلايشا، الەۋمەتتىك قورعاۋ جانە زەينەتاقىمەن قامتاماسىز ەتۋ سالاسى بويىنشا بارلىق زاڭناما ءبىر جۇيەگە كەلتىرىلدى. الەۋمەتتىك كودەكستە كۇشى جويىلعان 10 زاڭنىڭ نەگىزگى نورمالارى ساقتالدى. سونىمەن قاتار ءبىرقاتار جاڭا ەرەجە قاراستىرىلعان. ولاردىڭ بارلىعى حالىقتىڭ ءومىر ءسۇرۋ ساپاسىن ارتتىرۋعا باعىتتالعان»، - دەدى ءاليحان سمايىلوۆ.
ۇكىمەت باسشىسىنىڭ ايتۋىنشا، كودەكستىڭ ماڭىزدى جاڭالىعىنىڭ ءبىرى – زەينەتاقىنى كەزەڭ-كەزەڭمەن ارتتىرۋ. ماسەلەن، بيىلعى 1 قاڭتاردان باستاپ 2027 جىلعا دەيىن بازالىق زەينەتاقى مولشەرى ورتا ەسەپپەن 51%-عا وسەتىن بولادى. ياعني، 2 ملن-نان استام زەينەتكەر وسى قولداۋ شارالارىمەن قامتىلماق. جالپى قابىلدانىپ جاتقان شارالار 2025 جىلعا قاراي جيىنتىق زەينەتاقىنى ورتا ەسەپپەن 27%-عا ارتتىرۋعا مۇمكىندىك بەرەدى.
سونىمەن قاتار پرەمەر-مينيستر ەندى ازاماتتار وزدەرىنىڭ زەينەتاقى اكتيۆتەرىنىڭ 50%-ىن سەنىمگەرلىك باسقارۋعا بەرۋگە قۇقىلى ەكەنىن ايتتى. جيناقتاردىڭ قالعان بولىگى ءبىرىڭعاي جيناقتاۋشى زەينەتاقى قورىندا قالادى.
«1 شىلدەدەن باستاپ مەملەكەتتىك الەۋمەتتىك جاردەماقى تاعى 14،5%-عا ۇلعايادى. جالپى ءوسىم 23%-دى قۇرايدى. مۇگەدەكتىك مەديسينالىق مەكەمەلەرگە مىندەتتى تۇردە بارماي-اق جانە راستاۋ الماي-اق، پرواكتيۆتى تۇردە بەلگىلەنەتىن بولادى. قورىتىندىنى تاجىريبەلى دارىگەرلەردەن قۇرالعان تاۋەلسىز ساراپشىلار بەرەدى»، - دەدى ءاليحان سمايىلوۆ.
وعان قوسا بالالى وتباسىلاردى قولداۋ ءۇشىن التىن القا، «انا داڭقى» جانە «باتىر انا» ناگرادالارىمەن ماراپاتتالعان انالارعا تولەنەتىن جاردەماقى مولشەرى سارالاندى. ەلىمىز بويىنشا 90 مىڭعا جۋىق انا جوعارى جاردەماقى الادى.
قورىتىندىلاي كەلە، ۇكىمەت باسشىسى جاردەماقىلاردى ارتتىرۋدى، ولاردىڭ ۋاقىتىلى ءارى تولىق كولەمدە تاعايىندالۋىن قامتاماسىز ەتۋ قاجەتتىگىن ايتتى.